नयाँ ईभी किन्ने सोचमा हुनुहुन्छ ? केही दिन पर्खनुको कारण बन्न सक्छ आर्कफक्स टी१

काठमाडौं । विद्युतीय गाडीको बजार विस्तार भइरहेका बेला नेपाली ग्राहकका लागि अर्को नयाँ विकल्प थपिने भएको छ । पछिल्ला केही महिनायता लगातार नयाँ–नयाँ मोडल सार्वजनिक भइरहेका बेला अब मध्यम मूल्यको खण्डमा पनि प्रतिस्पर्धा झन् रोचक बन्ने संकेत देखिएको छ ।

४० लाख रुपैयाँभन्दा कम मूल्यमा १८० मिलिमिटरभन्दा बढी ग्राउन्ड क्लियरेन्स भएको नयाँ विद्युतीय गाडी खोजिरहनुभएको छ भने तपाईंको ध्यान अब यो गाडी तर्फ जान सक्छ ।

यसपटक चर्चा भएको मोडल हो आर्कफक्स टी१ । यो विद्युतीय क्रसओभर साउन २५ गते अर्थात् अगस्ट १० मा नेपाली बजारमा औपचारिक रूपमा सार्वजनिक हुने तयारीमा रहेको छ । नाइमा नेपाल मोबिलिटी एक्स्पो २०२६ सुरु हुनुभन्दा एक दिनअघि यसको सार्वजनिक कार्यक्रम तय गरिएको हो ।

नेपालका लागि बीएआईसी र यसको प्रिमियम विद्युतीय ब्रान्ड आर्कफक्सको आधिकारिक वितरक लक्ष्मी मोटरहबले नयाँ टी१ सार्वजनिक गर्ने तयारी गरेको हो । कम्पनीले यसमार्फत नेपालमा आफ्नो विद्युतीय गाडीको लाइनअप थप विस्तार गर्नेछ ।

आकारका हिसाबले आर्कफक्स टी१ कम्प्याक्ट विद्युतीय क्रसओभर हो । यसमा ४ हजार ३ सय ३७ मिलिमिटर लम्बाइ, १ हजार ८ सय ५० मिलिमिटर चौडाइ र १ हजार ५ सय ७३ मिलिमिटर उचाइ रहने अनुमान छ । २ हजार ७ सय ५० मिलिमिटर ह्विलबेस र १८१ मिलिमिटर ग्राउन्ड क्लियरेन्सका कारण यसले सहर तथा सामान्य नेपाली सडक प्रयोगको आवश्यकता सम्बोधन गर्ने अपेक्षा गर्न सकिन्छ ।

नेपालमा आउने टी१ मा अगाडिको एक्सलमा जडान गरिएको परमानेंट म्याग्नेट सिन्क्रोनस मोटर रहने अनुमान गरिएको छ । यसले ७० किलोवाट पावर र १७० न्युटन मिटर टर्क उत्पादन गर्न सक्नेछ । ऊर्जा आपूर्तिका लागि ४२.३ किलोवाट-आवर क्षमताको लिथियम आइरन फस्फेट ब्याट्री रहने अनुमान छ ।

यो गाडीले डब्लुएलटीसी मापदण्डमा करिब ३१० किलोमिटरसम्म रेन्ज दिन सक्ने जानकारी प्राप्त भएको छ । यसको अधिकतम गति प्रतिघण्टा १४० किलोमिटरभन्दा बढी रहने अनुमान छ भने ३० देखि ८० प्रतिशतसम्म डिसी फास्ट चार्ज गर्न करिब २५ मिनेट लाग्न सक्छ । ७ किलोवाट एसी चार्जरबाट पूर्ण चार्ज हुन करिब ८ घन्टासम्म लाग्ने अनुमान गरिएको छ ।

सुरक्षातर्फ टी१ मा लेभल–२ एड्भान्स्ड ड्राइभर असिस्टेन्स सिस्टम उपलब्ध हुन सक्नेछ । यसअन्तर्गत अडाप्टिभ क्रुज कन्ट्रोल, अटोमेटिक इमर्जेन्सी ब्रेकिङ, फर्वार्ड कोलिजन वार्निङ, लेन डिपार्चर वार्निङ, ट्राफिक जाम असिस्ट तथा अटोमेटिक पार्किङजस्ता फिचर रहने अनुमान छ ।

यसमा १५.६ इन्च टचस्क्रिन, ६ स्पिकर साउन्ड सिस्टम, ३६० डिग्री क्यामरा, पानोरामिक सनरुफ, इलेक्ट्रिक टेलगेट, फ्रेमलेस विन्डो र १८ इन्च अलोय ह्विलजस्ता फिचर पनि उपलब्ध हुन सक्नेछन् ।

कम्पनीले टी१ को मूल्यसमेत सार्वजनिक गरिसकेको छैन । तर, विशेष स्रोतबाट प्राप्त जानकारीअनुसार यसको मूल्य ४० लाख रुपैयाँभन्दा तल राख्ने तयारी भइरहेको छ । यही मूल्यमा आएमा यसले बीवाइडी डल्फिन, प्रोटोन ई.मास ५ र चाँडै सार्वजनिक हुने चेरी क्यू, लिपमोटर बी०३एक्सलगायत यही मूल्य समूहका अन्य विद्युतीय गाडीसँग प्रत्यक्ष प्रतिस्पर्धा गर्नेछ ।

पछिल्लो समय नेपाली बजारमा ४० लाख रुपैयाँ आसपासको विद्युतीय गाडी खण्ड सबैभन्दा प्रतिस्पर्धी बन्दै गएको छ । ग्राहकले अब केवल रेन्ज मात्र होइन, प्रविधि, सुरक्षा, केबिन स्पेस, चार्जिङ क्षमता र बिक्रीपछिको सेवामा पनि ध्यान दिन थालेका छन् । यस्तो अवस्थामा आर्कफक्स टी१ को आगमनले यही खण्डको प्रतिस्पर्धा थप रोचक बनाउन सक्छ ।

यद्यपि, माथि उल्लेख भएका भेरियन्ट, स्पेक्स, फिचर र मूल्यसम्बन्धी जानकारी प्रारम्भिक स्रोतमा आधारित अनुमान हुन् । कम्पनीले अगस्ट १० को सार्वजनिक कार्यक्रममा नेपालका लागि अन्तिम भेरियन्ट, फिचर, मूल्य तथा अन्य आधिकारिक विवरण सार्वजनिक गरेपछि मात्र यसको पूर्ण तस्वीर स्पष्ट हुनेछ ।