होन्डाको पहिलो हाइब्रिड एसयूभी भारतमा, जेडआर–भीमा के–के छन् विशेषता ?
काठमाडौं । होन्डा कार्स इन्डियाले आफ्नो पहिलो हाइब्रिड एसयूभी ‘जेडआर–भी हाइब्रिड’ भारतीय बजारमा सार्वजनिक गरेको छ । कम्पनीले यसलाई ४७ लाख ९९ हजार भारतीय रुपैयाँको प्रारम्भिक एक्स–शोरुम मूल्यमा ल्याएको हो । कम्प्लिट्ली बिल्ट–अप (सीबीयू) युनिटका रूपमा आयात गरिने यो एसयूभीको डेलिभरी पनि छिट्टै सुरु हुने बताइएको छ ।
होन्डाको हालको भारतीय लाइनअपकै सबैभन्दा ठूलो मोडल बनेको जेडआर–भीको लम्बाइ ४,६५७ एमएम छ । स्लिम एलईडी हेडलाइट, ग्लस–ब्ल्याक फ्रन्ट ग्रिल, आकर्षक एलईडी टेललाइट, डुअल एक्जस्ट आउटलेट र १८ इन्च अलोय ह्विलले यसलाई प्रिमियम र स्पोर्टी रोड प्रेजेन्स दिएको छ ।
यसको मुख्य विशेषता २.० लिटर ‘ई:एचईभी’ स्ट्रङ हाइब्रिड पावरट्रेन हो । यसले १८१ बीएचपी पावर र ३१५ एनएम टर्क उत्पादन गर्छ । महँगो प्रिमियम एसयूभी भए पनि कम्पनीले यसको माइलेज २२.८० किलोमिटर प्रतिलिटर दाबी गरेको छ । यही इन्धन दक्षताले जेडआर–भीलाई पेट्रोल–केन्द्रित प्रतिस्पर्धीभन्दा फरक बनाउन सक्छ ।
केबिनमा ९ इन्च टचस्क्रिन इन्फोटेनमेन्ट, १० इन्च डिजिटल इन्स्ट्रुमेन्ट क्लस्टर, लेदर अपहोल्स्ट्री, पावर्ड फ्रन्ट सिट, डुअल–जोन क्लाइमेट कन्ट्रोल, वायरलेस फोन चार्जिङ र १२ स्पिकरको बोस साउन्ड सिस्टम दिइएको छ ।
सुरक्षामा पनि होन्डाले ठूलो जोड दिएको छ । जेडआर–भीमा आठ एयरब्यागसँगै होन्डा सेन्सिङ एडीएएस प्याकेज उपलब्ध छ । यसअन्तर्गत एडप्टिभ क्रुज कन्ट्रोल, लेन किप असिस्ट, अटोनोमस इमर्जेन्सी ब्रेकिङ तथा ड्राइभर अटेन्सन मोनिटरिङजस्ता सुविधा समावेश छन् ।
भारतको प्रिमियम एसयूभी सेग्मेन्टमा जेडआर–भीले स्कोडा कोडियाक, फक्सवागन टायरन र जिप मेरिडियनसँग प्रतिस्पर्धा गर्नेछ । तर, सीबीयू आयातका कारण मूल्य उच्च रहेकाले होन्डाको हाइब्रिड प्रविधि, फिचर र ब्रान्डप्रतिको विश्वासले ग्राहकलाई कति आकर्षित गर्छ भन्ने चासोको विषय बनेको छ ।
