भारतमा विद्युतीय दुईपांग्रेले बनायो नयाँ रेकर्ड, किन बढ्दैछ ग्राहकको भरोसा ?

काठमाडौं । विद्युतीय स्कुटर किन्न खोज्ने ग्राहकको सोच अब केवल मूल्य र रेन्जमा सीमित छैन । चार्जिङको सहजता, बिक्रीपछिको सेवा र ब्रान्डमाथिको भरोसाले बजारको दिशा बदल्न थालेपछि छिमेकी भारतमा दुईपांग्रे ईभीको प्रतिस्पर्धा पनि नयाँ मोडमा पुगेको छ ।

भारतमा सन् २०२६ को सुरुआती सात महिनाभित्रै विद्युतीय स्कुटर, मोटरसाइकल र मोपेडको बिक्री १० लाख नाघेको छ । जनवरी १ देखि जुलाई ६ सम्म १० लाख ५ हजार २७९ विद्युतीय दुईपांग्रे दर्ता भएको तथ्यांकले यो खण्ड अहिलेसम्मकै तीव्र गतिमा विस्तार भइरहेको देखाएको छ ।

गत वर्षको यही अवधिमा ६ लाख ५४ हजार ५९२ युनिट बिक्री भएको थियो । यस वर्षको बिक्री त्यसको तुलनामा ५४ प्रतिशतले बढी हो । सवारी दर्तासम्बन्धी वाहन तथ्यांकअनुसार जनवरीदेखि जुनसम्म मात्रै ९ लाख ७० हजार ९९३ विद्युतीय दुईपांग्रे दर्ता भएका छन् ।

मार्चमा सबैभन्दा धेरै १ लाख ९९ हजार ३९३ युनिट बिक्री भएको थियो । जुनमा पनि बजारले १ लाख ९४ हजार १८६ युनिटको बलियो प्रदर्शन गरेको छ । जुलाईको पहिलो छ दिनमै थप ३३ हजार ८७८ युनिट दर्ता हुनुले वर्षको दोस्रो आधामा पनि माग कमजोर नपर्ने संकेत देखाएको छ ।

यस वृद्धिको मुख्य लाभ स्थापित दुईपांग्रे कम्पनीहरूले लिएका छन् । टिभीएसको आइक्युब, बजाजको चेतक, एथरको रिज्टा र हिरोको भिडा शृंखलाले बजार विस्तारमा ठूलो भूमिका खेलेका छन् । यी चार कम्पनीले मात्रै यस अवधिमा थपिएको बिक्री वृद्धिको करिब ९६ प्रतिशत हिस्सा ओगटेको जनाइएको छ ।

एक समय विद्युतीय दुईपांग्रे बजारको प्रमुख नाम बनेको ओला इलेक्ट्रिक भने दबाबमा परेको छ । उसका दर्ता ४४ दशमलव १ प्रतिशतले घटेर ६५ हजार ९९९ युनिटमा सीमित भएका छन् । बजार हिस्सा पनि १८ दशमलव ६ प्रतिशतबाट घटेर ६ दशमलव ८ प्रतिशतमा झरेको छ । बिक्रीपछिको सेवा र ग्राहक भरोसासम्बन्धी प्रश्न उठिरहेका बेला स्थापित कम्पनीहरूतर्फ ग्राहक झुक्न थालेको देखिन्छ ।

नेपालका लागि पनि यो प्रवृत्ति महत्त्वपूर्ण छ । यहाँ विद्युतीय स्कुटरको बजार बढ्दो भए पनि ग्राहकले मूल्यसँगै ब्याट्री वारेन्टी, स्पेयर पार्ट्स, सर्भिस सेन्टर र पुनःबिक्री मूल्यलाई गम्भीर रूपमा हेर्न थालेका छन् । भारतमा स्थापित ब्रान्डको बढ्दो प्रभावले नेपालमा पनि भरपर्दो सेवा सञ्जाल भएका कम्पनीलाई लाभ पुग्न सक्ने देखिन्छ ।

सस्तो मोडेलको आगमन, चार्जिङ पूर्वाधारको विस्तार र पुराना उत्पादकको ठूलो लगानीसँगै भारतको विद्युतीय दुईपांग्रे बजार अब कुल दुईपांग्रे बिक्रीमा दोहोरो अंकको हिस्सा नजिक पुग्ने बहसमा प्रवेश गरेको छ । यसको प्रभाव नेपाली बजारमा आउने नयाँ मोडेल, मूल्य रणनीति र वितरकको सेवामा पनि क्रमशः देखिन सक्छ ।