भारतमा कार बिक्रीले बनायो नयाँ कीर्तिमान, एक महिनामै साढे चार लाख नजिक
काठमाडौं । भारतको अटो बजारमा लामो समयपछि एकैपटक सबै प्रमुख कम्पनीको व्यापार उकालो लागेको छ । नयाँ मोडलप्रतिको आकर्षण र एसयूभीको बढ्दो मागले बजारको पुरानो समीकरणसमेत फेरिन थालेको देखिएको छ ।
अगस्टमा भारतभर ४ लाख ४८ हजार ३१९
युनिट यात्रुवाहक गाडी डिलर नेटवर्कमा पठाइएको छ । यो भारतको यात्रुवाहक सवारी
उद्योगले कुनै एक महिनामा हासिल गरेको हालसम्मकै उच्च थोक बिक्री हो ।
अघिल्लो वर्षको सोही महिनामा ३ लाख ३०
हजार २५९ युनिट गाडी बिक्री भएका थिए । यस आधारमा एक वर्षमै बिक्री एक लाख १८ हजार
६० युनिट अर्थात् ३५.७ प्रतिशतले बढेको छ ।
बलियो उपभोक्ता माग, घट्दो ब्याजदर,
करसम्बन्धी सहुलियत र एकपछि अर्को गर्दै सार्वजनिक भएका नयाँ मोडलले बजारलाई गति
दिएको बताइएको छ । नजिकिँदै गरेको चाडपर्वका कारण आगामी महिनामा पनि गाडीको माग
बलियो रहने उत्पादकहरूको अनुमान छ ।
मारुती पहिलो, टाटाको वृद्धि सबैभन्दा तीव्र
मारुती सुजुकीले एक लाख ७६ हजार ९७१
युनिट बिक्रीसहित बजारको नेतृत्व कायम राखेको छ । गत वर्षको एक लाख ३१ हजार २७८
युनिटको तुलनामा कम्पनीको बिक्री ३४.८ प्रतिशतले बढेको हो ।
मारुतीको वृद्धिमा एसयूभीले सबैभन्दा
ठूलो भूमिका खेलेका छन् । कम्पनीको कुल बिक्रीमा एसयूभीको योगदान ३२ प्रतिशत
पुगेको छ । नयाँ ब्रेजाको बुकिङ ५० हजार युनिट नाघ्दा करिब ३५ हजार ग्राहक अझै
डेलिभरीको प्रतीक्षामा छन् ।
उत्पादन क्षमताका कारण मागअनुसार गाडी
उपलब्ध गराउन कठिन भइरहेको मारुतीले जनाएको छ । कम्पनीले सञ्चालनमा ल्याउन लागेका
दुई नयाँ उत्पादन लाइन पूर्ण क्षमतामा पुग्न अझै दुईदेखि तीन महिना लाग्ने अनुमान
छ ।
बिक्री वृद्धिदरका आधारमा टाटा मोटर्स
अगाडि देखिएको छ । कम्पनीले अगस्टमा ६५ हजार २५३ युनिट गाडी बिक्री गरेको छ, जुन
गत वर्षको ४१ हजार एक युनिटभन्दा ५९.१ प्रतिशत बढी हो ।
यो वृद्धिसँगै टाटा भारतको दोस्रो
ठूलो यात्रुवाहक गाडी विक्रेता बनेको छ । उसले अगस्टको बिक्रीमा महिन्द्रा र लामो
समयदेखि दोस्रो स्थानमा रहँदै आएको हुन्डाईलाई समेत पछि पारेको छ ।
महिन्द्रा तेस्रो, हुन्डाई चौथो
एसयूभीमा केन्द्रित महिन्द्रा एन्ड
महिन्द्राको बिक्री ५०.४ प्रतिशतले बढेर ५९ हजार २५७ युनिट पुगेको छ । गत वर्षको
अगस्टमा कम्पनीले ३९ हजार ३९९ युनिट गाडी बिक्री गरेको थियो ।
अद्यावधिक स्कोर्पियो–एन र बीई ६
स्पोर्टेकप्रति देखिएको बलियो ग्राहक आकर्षणले बिक्री बढाउन सहयोग गरेको कम्पनीको
भनाइ छ ।
हुन्डाई मोटर इन्डियाले पनि इतिहासकै
उत्कृष्ट अगस्ट घरेलु बिक्री हासिल गरेको छ । कम्पनीले ५४ हजार ३९६ युनिट गाडी
बिक्री गर्दै २३.६ प्रतिशतको वृद्धि हात पारेको हो ।
बिक्री बढे पनि हुन्डाई भारतीय
यात्रुवाहक सवारी बजारको चौथो स्थानमा पुगेको छ । कुनै समय भारतको दोस्रो ठूलो कार
निर्माता रहेको हुन्डाईलाई अगस्टमा टाटा र महिन्द्रा दुवैले उछिनेका छन् ।
किया इन्डियाले २९ हजार ४२ युनिट गाडी
बिक्री गरेको छ । गत वर्षको १९ हजार ६०८ युनिटको तुलनामा कम्पनीको बिक्री ४८.१
प्रतिशतले बढेको हो ।
प्रमुख कम्पनीको बिक्री अवस्था
अगस्टमा मारुती सुजुकीले एक लाख
७६ हजार ९७१ युनिट गाडी बिक्री गर्दै ३४.८ प्रतिशतको वार्षिक वृद्धि हासिल गरेको छ
। टाटा मोटर्सले ६५ हजार २५३ युनिट गाडी बिक्री गर्दै सबैभन्दा उच्च ५९.१
प्रतिशतको वृद्धि हात पारेको छ । महिन्द्रा एन्ड महिन्द्राको बिक्री ५०.४
प्रतिशतले बढेर ५९ हजार २५७ युनिट पुगेको छ ।
यसैगरी, हुन्डाई मोटर इन्डियाले
२३.६ प्रतिशतको वृद्धिसहित ५४ हजार ३९६ युनिट गाडी बिक्री गरेको छ भने किया
इन्डियाको बिक्री ४८.१ प्रतिशतले बढेर २९ हजार ४२ युनिट पुगेको छ ।
फाइनान्सियल एक्सप्रेसले
सार्वजनिक गरेको विवरणअनुसार अगस्टमा भारतका सबै प्रमुख यात्रुवाहक गाडी उत्पादकले
दोहोरो अंकको वृद्धि हासिल गरेका छन् । यसले बिक्री कुनै एउटा कम्पनी वा मोडलमा
मात्रै केन्द्रित नभई समग्र बजारमै माग बढेको देखाउँछ ।
फाइनान्सियल एक्सप्रेसले सार्वजनिक
गरेको विवरणअनुसार अगस्टमा भारतका सबै प्रमुख यात्रुवाहक गाडी उत्पादकले दोहोरो
अंकको वृद्धि हासिल गरेका छन् । यसले बिक्री कुनै एउटा कम्पनी वा मोडलमा मात्रै
केन्द्रित नभई समग्र बजारमै माग बढेको देखाउँछ ।
नेपालका लागि किन महत्त्वपूर्ण ?
भारतको अटो बजारमा आएको परिवर्तनले
नेपाली बजारलाई पनि प्रत्यक्ष प्रभाव पार्न सक्छ । नेपालमा बिक्री हुने मारुती
सुजुकी, टाटा, महिन्द्रा, हुन्डाई र कियाका धेरैजसो मोडल भारतमै उत्पादन हुन्छन् ।
भारतीय बजारमा कुनै मोडलको माग
अस्वाभाविक रूपमा बढ्दा उत्पादन र डेलिभरी प्राथमिकता त्यतै केन्द्रित हुन सक्छ ।
यसले नेपालमा गाडीको आपूर्ति, प्रतीक्षा अवधि र नयाँ मोडल सार्वजनिक हुने समयलाई
असर गर्न सक्छ ।
अर्कोतर्फ, उत्पादन क्षमता
विस्तारसँगै भारतीय कम्पनीबीच बढ्ने प्रतिस्पर्धाले नेपालका लागि नयाँ मोडल र थप
विकल्प उपलब्ध हुने सम्भावना पनि बढाउँछ । विशेषगरी एसयूभी र इलेक्ट्रिक गाडीमा
भइरहेको लगानीले नेपाली बजारमा आउने आगामी उत्पादनको दिशा निर्धारण गर्नेछ ।
अगस्टको बिक्रीले भारतीय ग्राहकको रोजाइ साना ह्याचब्याकबाट एसयूभीतर्फ थप तीव्र गतिमा सरेको देखाएको छ । टाटा र महिन्द्राको आक्रामक वृद्धिले बजारको प्रतिस्पर्धा अब पुरानो बिक्री वरीयतामा मात्र सीमित नरहने संकेतसमेत दिएको छ ।
