गाडी नकिन्नेका लागि पनि विशेष, नाडा अटो शोका पाँच आकर्षण
काठमाडौँ । भृकुटीमण्डपमा केही दिनपछि देखिने भीड नयाँ गाडी हेर्न चाहनेहरूको मात्रै हुने छैन । गाडी किन्ने योजना बनाइरहेका ग्राहकदेखि नयाँ प्रविधि, कर्जा सुविधा र नेपाली अटो बजारको बदलिँदो स्वरूप बुझ्न चाहनेसम्मका लागि यसपटकको नाडा अटो शो विशेष बन्ने देखिएको छ ।
नाडा अटोमोबाइल्स एसोसिएसन अफ नेपालले
आफ्नो स्थापनाको ५० वर्ष पूरा भएको अवसरमा १८औँ नाडा अटो शो स्वर्ण जयन्ती
संस्करणका रूपमा आयोजना गर्दै छ । प्रदर्शनी भदौ ९ देखि १४ गतेसम्म काठमाडौँको
भृकुटीमण्डपमा सञ्चालन हुनेछ ।
करिब तीन लाख वर्गफिट क्षेत्रमा
फैलिने प्रदर्शनीमा दुई सयभन्दा बढी स्टल रहनेछन् । यहाँ २३ यात्रुवाहक गाडी, १७
साना तथा मझौला व्यावसायिक सवारी र १३ दुईपाङ्ग्रे ब्रान्ड सहभागी हुनेछन् ।
पार्ट्स, टायर, ब्याट्री, ल्युब्रिकेन्ट, चार्जिङ पूर्वाधार, ग्यारेज उपकरण, बैंक,
वित्तीय संस्था र बिमा कम्पनीको समेत उपस्थिति रहनेछ ।
१.
करिब ४० नयाँ मोडल एकै ठाउँमा
यस संस्करणमा विभिन्न कम्पनीले करिब
४० नयाँ मोडल तथा उत्पादन सार्वजनिक गर्ने तयारी गरेका छन् । केही गाडी नेपालमा
पहिलोपटक देखाइनेछन् भने केहीको मूल्य, भेरियन्ट र बुकिङसम्बन्धी जानकारी
प्रदर्शनीबाट खुल्नेछ ।
अलग–अलग शोरुम धाउनुपर्ने झन्झटबिना
विभिन्न ब्रान्डका गाडीको डिजाइन, केबिन, फिचर र निर्माण गुणस्तर प्रत्यक्ष हेर्न
पाउनु यसको मुख्य आकर्षण हुनेछ ।
२.
एउटै बजेटका गाडी तुलना गर्ने अवसर
नेपाली बजारमा अहिले एउटै मूल्य
समूहभित्र धेरै विद्युतीय तथा इन्धन गाडी उपलब्ध छन् । बाहिरबाट उस्तै देखिने
गाडीबीच ब्याट्री क्यापासिटी, रेन्ज, ग्राउन्ड क्लियरेन्स, सुरक्षा फिचर, वारेन्टी
र बिक्रीपछिको सेवामा ठूलो अन्तर हुन सक्छ ।
नाइमा नेपाल मोबिलिटी एक्स्पोमा
सहभागी भएका १३ सवारी ब्रान्ड नाडामा पनि दोहोरिँदै छन् । यसले अघिल्लो प्रदर्शनीमा
गाडी हेरेका वा बुकिङ गरेका ग्राहकलाई नयाँ मूल्य, सुविधा र अफर पुनः तुलना गर्ने
अवसर दिनेछ ।
३.
छुटदेखि कर्जा योजनासम्म बुझ्न सकिने
अटो शोका अवसरमा कम्पनीहरूले नगद छुट,
पुरानो गाडी सटही, निःशुल्क बिमा, सडक कर, चार्जर, एसेसरिज तथा विस्तारित
वारेन्टीजस्ता योजना ल्याउने गर्छन् ।
यसपटक १० बैंक, वित्तीय संस्था तथा
बिमा कम्पनी सहभागी हुने भएकाले ग्राहकले डाउनपेमेन्ट, ब्याजदर, मासिक किस्ता, ऋण
अवधि र बिमा शुल्क एकै ठाउँमा बुझ्न सक्नेछन् ।
अफर हेरेर मात्रै निर्णय गर्नु भने
उचित हुँदैन । छुटपछि तिर्नुपर्ने वास्तविक मूल्य, ऋणको कुल ब्याज र अन्य
शुल्कसमेत जोडेर अन्तिम लागत तुलना गर्नुपर्छ ।
४.
रोबोट र नयाँ मोबिलिटी प्रविधिको आकर्षण
यसपटक गाडीसँगै प्रविधिको फरक आकर्षण
पनि रहनेछ । प्रदर्शनीमा मानवजस्तै गतिविधि गर्न सक्ने जी–वान ह्युमनोइड रोबोट र
चार खुट्टामा हिँड्ने गो–टु रोबोट कुकुरसमेत राखिने तयारी छ ।
विद्युतीय गाडी, स्मार्ट कनेक्टिभिटी,
चार्जिङ समाधान र दिगो मोबिलिटीसम्बन्धी प्रविधि पनि हेर्न पाइनेछ । स्मार्ट
मोबिलिटी तथा अटो क्षेत्रको भविष्यसम्बन्धी छलफल र अन्तरक्रियाले प्रदर्शनीलाई
जानकारी आदानप्रदानको थलोसमेत बनाउनेछ ।
५.
नेपालमै बनेका अटो सामग्रीको प्रदर्शनी
नाडा अटो शोमा आयातित गाडी मात्रै
होइन, नेपालमै उत्पादन वा एसेम्बल भएका सवारीसाधन, ल्युब्रिकेन्ट, ब्याट्री,
हेल्मेट तथा अन्य अटो सामग्रीलाई पनि स्थान दिइनेछ ।
करिब ७० कम्पनीले स्पेयर पार्ट्स,
टायर, ब्याट्री, ल्युब्रिकेन्ट, एसेसरिज र ग्यारेज उपकरण प्रदर्शन गर्नेछन् ।
त्यसैले यो मेला ग्राहकसँगै व्यवसायी, टेक्निसियन र वर्कसप सञ्चालकका लागि पनि
उपयोगी हुनेछ ।
नाडा अटो शो तत्काल गाडी किन्नेका
लागि मात्रै होइन । भविष्यमा गाडी किन्ने योजना बनाइरहेका, बजारको मूल्य बुझ्न
चाहने वा नयाँ प्रविधि नजिकबाट हेर्न चाहनेका लागि समेत यो प्रदर्शनी उपयोगी बन्न
सक्छ ।
छ दिनसम्म चल्ने प्रदर्शनी बिहान साढे १० देखि साँझ साढे ६ बजेसम्म खुला रहनेछ । आयोजकले करिब दुई लाख अवलोकनकर्ता आउने अनुमान गरेको छ ।
