आक्रामक डिजाइन, ठूलो ब्याट्री—म्याक्ससको नयाँ ईभी पिकअप नेपालतर्फ, के हो यो सरप्राइज ?
काठमाडौँ । नेपाली अटोमोबाइल बजारमा नयाँ प्रविधियुक्त र शक्तिशाली सवारीसाधनहरूको प्रतिस्पर्धा तीव्र बन्दै गएको छ । यसैबीच चिनियाँ अटो ब्रान्ड Maxus ले नेपालका लागि आफ्नो नयाँ र रहस्यमय इलेक्ट्रिक पिकअप ट्रक सार्वजनिक गर्ने तयारी गरेको संकेत गरेको छ ।
नेपालमा म्याक्ससको आधिकारिक विक्रेता हिमालय अर्गनाइजेसनले हालै सामाजिक सञ्जालमार्फत “Something Big is Coming” भन्ने सन्देशसहित टिजर सार्वजनिक गरेपछि नयाँ गाडीलाई लिएर बजारमा व्यापक चर्चा सुरु भएको छ ।
टिजर तस्बिरमा देखिएको डिजाइन अनुसार यो गाडी ठूलो, मस्कुलर र आक्रामक लुक्स भएको इलेक्ट्रिक पिकअप ट्रक हुने स्पष्ट संकेत देखिन्छ । नेपालको भू–बनावट, ग्रामीण सडक र अफरोड आवश्यकतालाई लक्षित गर्दै कम्पनीले प्रिमियम सेग्मेन्टको शक्तिशाली ईभी ल्याउन लागेको अनुमान गरिएको छ ।
नाइमा मोबिलिटी एक्स्पो’ मा सार्वजनिक हुने चर्चा
सम्भावित प्राविधिक विशेषताहरू (टिजर अनुसार)
- १०२.२ kWh ठूलो ब्याट्री प्याक – लामो दूरीको यात्रा का लागि उपयुक्त
- ४×४ (AWD) ड्राइभ सिस्टम – अफरोड र कठिन सडकमा उच्च प्रदर्शन
- २३० mm ग्राउन्ड क्लियरेन्स – नेपालको सडक अवस्थालाई ध्यानमा राखेर डिजाइन गरिएको
- प्रिमियम र मस्कुलर डिजाइन – हेभी-ड्युटी पिकअप सेग्मेन्ट लक्षित
अटोमोबाइल क्षेत्रका जानकारहरूका अनुसार आगामी साउन अन्त्यतिर आयोजना हुने NAIMA Mobility Expo मा यस पिकअपलाई औपचारिक रूपमा लन्च गर्न सकिने सम्भावना बलियो छ । यद्यपि कम्पनीले आधिकारिक मिति सार्वजनिक गरेको छैन । तर बजारमा भने एक्स्पो अगाडि नै वा सोही अवसर पारेर यसलाई नेपाली बजारमा प्रस्तुत गरिने अपेक्षा गरिएको छ । टिजरमा उल्लेख गरिएका विवरणहरू अनुसार यो इलेक्ट्रिक पिकअप निकै उच्च क्षमतायुक्त हुने देखिन्छ ।
“A New Surprise is on its Way” भन्ने ट्यागलाइनसहित आएको टिजरपछि नेपाली ईभी बजारमा नयाँ तरंग पैदा भएको छ । विशेषगरी पावरफुल पिकअप सेग्मेन्टमा प्रतिस्पर्धा बढ्दै गइरहेको बेला म्याक्ससको यो नयाँ प्रवेशले बजारमा नयाँ दबाब सिर्जना गर्ने अनुमान गरिएको छ ।
गाडीको आधिकारिक नाम, मूल्य र फिचरबारे कम्पनीले अझै पूर्ण विवरण सार्वजनिक गरेको छैन । तर अटो क्षेत्रका विश्लेषकहरूका अनुसार आगामी महिनाको एक्स्पो आसपास यसले नेपाली बजारमा ठूलो ध्यान आकर्षित गर्ने निश्चित जस्तै देखिन्छ ।
