एथरको बिक्रीमा तीव्र छलाङ, ८ लाखको आँकडा पार
काठमाडौं । भारतीय विद्युतीय दुईपाङ्ग्रे निर्माता एथर इनर्जीले सञ्चित खुद्रा बिक्रीमा ८ लाख ई–स्कुटरको आँकडा पार गरेको छ । भारतको वाहन पोर्टलमा उपलब्ध दर्ता तथ्याङ्कअनुसार कम्पनीले सेप्टेम्बर २८ मा यो उपलब्धि हासिल गरेको हो ।
एथरलाई ८ लाखको आँकडासम्म पुर्याउन
पछिल्लो डेढ वर्षको बिक्रीले ठूलो भूमिका खेलेको छ । जनवरी २०२५ यता मात्रै
कम्पनीका करिब ४ लाख ७५ हजार ई–स्कुटर दर्ता भएका छन् । यसअनुसार एथरको कुल
बिक्रीमध्ये आधाभन्दा बढी हिस्सा पछिल्लो डेढ वर्षमै थपिएको देखिन्छ ।
कम्पनीको बिक्रीमा अहिले
पारिवारिक प्रयोगलाई लक्षित एथर रिज्टाको सबैभन्दा ठूलो योगदान छ । स्पोर्टी
प्रकृतिको ४५० सिरिजबाट बजारमा पहिचान बनाएको एथरलाई रिज्टाले फराकिलो ग्राहक
समूहसम्म पुर्याएको छ । परिवारमैत्री सिट, दैनिक प्रयोगमा केन्द्रित बनावट र
व्यावहारिक सुविधाका कारण यसको माग बढेको बताइएको छ ।
एथरको नयाँ कोनार्कले भने बजारमा
प्रारम्भिक यात्रा गरिरहेको छ । उपलब्ध तथ्याङ्कअनुसार पहिलो महिनामा यसका २१७ वटा
दर्ता भएका छन् । बिक्रीमा यसको वास्तविक प्रभाव मूल्याङ्कन गर्न अझै केही समयको
तथ्याङ्क आवश्यक पर्नेछ ।
भारतको विद्युतीय स्कुटर बजारमा
बजाज, टीभीएस, ओला इलेक्ट्रिक र एथरबीच प्रतिस्पर्धा तीव्र छ । यस्तो अवस्थामा
एउटा नयाँ पुस्ताको ईभी कम्पनीले ८ लाख खुद्रा बिक्री पार गर्नु विद्युतीय स्कुटर
सीमित ग्राहकको रोजाइबाट ठूलो परिमाणको बजारतर्फ बढिरहेको संकेत हो ।
छिमेकी भारतमा पारिवारिक ई–स्कुटरको बिक्री तीव्र रूपमा बढ्नु नेपाली बजारका लागि पनि चासोको विषय हो । नेपालमा पनि रेन्जसँगै व्यावहारिकता, सर्भिस, स्पेयर पार्ट्स, ब्याट्री वारेन्टी र दीर्घकालीन स्वामित्व खर्च ग्राहकको निर्णयमा महत्त्वपूर्ण बन्दै गएको छ ।
