बीवाईडीले मलेसियामा ईभी एसेम्बल गर्ने, साझेदारमा इनोकोम
काठमाडौं । चिनियाँ विद्युतीय गाडी निर्माता बीवाईडीले मलेसियामा गाडी एसेम्बल गर्न इनोकोम कर्पोरेसनलाई साझेदार चयन गरेको छ । कम्पनीले अक्टोबर १५ मा घोषणा गरेको यो साझेदारीअन्तर्गत केदाह राज्यको कुलिमस्थित इनोकोमको कारखाना प्रयोग गरिनेछ ।
साइम डार्बी समूहसँग सम्बन्धित
इनोकोमले विभिन्न अन्तर्राष्ट्रिय ब्रान्डका गाडी एसेम्बल गर्दै आएको छ । बीवाईडी
र साझेदार पक्षबीच चीनको सेन्जेनस्थित बीवाईडी मुख्यालयमा समझदारीपत्रमा हस्ताक्षर
भएको हो । स्थानीय बजार र उत्पादन क्षमताको मूल्याङ्कनपछि इनोकोमलाई रोजिएको
बीवाईडीले जनाएको छ ।
यो सहकार्यमा सीकेडी विधिबाट गाडी
एसेम्बल गर्ने योजना छ । सरल भाषामा, पूर्ण रूपमा तयार गाडी आयात गर्नुको सट्टा
छुट्टाछुट्टै भाग ल्याएर स्थानीय कारखानामा जोडिनेछ । इनोकोमसँग उपलब्ध पूर्वाधार
र अनुभवी जनशक्तिलाई बीवाईडीले आफ्नो एसेम्बली योजनाको आधार बनाउनेछ ।
यसअघि बीवाईडीले मलेसियाको तान्जुङ
मालिममा आफ्नै एसेम्बली कारखाना स्थापना गर्ने योजना अघि सारेको थियो । स्थानीय
सञ्चारमाध्यमका अनुसार उक्त योजना स्थगित गरेर कम्पनीले विद्यमान कारखानामार्फत
एसेम्बली गर्ने बाटो रोजेको हो । यद्यपि कुन मोडल एसेम्बल गर्ने, वार्षिक क्षमता
कति हुने र उत्पादन कहिले सुरु गर्ने भन्ने विवरण खुलाइएको छैन ।
