चेरीको बिक्री ३ लाखनजिक, एनईभीमा नयाँ रेकर्ड

काठमाडौँ । चिनियाँ सवारी निर्माता चेरी समूहले सन् २०२६ को अक्टोबरमा २ लाख ९५ हजार ९३४ गाडी बिक्री गरेको छ । यो सन् २०२५ को अक्टोबरको तुलनामा ५.२५ प्रतिशत बढी हो । समूहको नयाँ ऊर्जा सवारीको बिक्रीले पनि हालसम्मकै उच्च मासिक रेकर्ड बनाएको छ ।

अक्टोबरमा चेरीले २ लाख ६१८ गाडी निर्यात गरेको छ, जुन अघिल्लो वर्षको सोही महिनाभन्दा ५८.६७ प्रतिशत बढी हो । कुल मासिक बिक्रीमा निर्यातको हिस्सा करिब ६८ प्रतिशत छ । यस वर्ष चेरीको मासिक निर्यात २ लाख नाघेको यो तेस्रो पटक हो ।

पूर्ण विद्युतीय र प्लगइन हाइब्रिडसमेत समेटिने नयाँ ऊर्जा सवारी अर्थात् एनईभीको बिक्री अक्टोबरमा १ लाख ४० हजार ८९३ पुगेको छ । अघिल्लो वर्षको सोही महिनाभन्दा २७.७ प्रतिशत बढेको यो बिक्री लगातार सातौँ महिना १ लाखमाथि रहेको हो ।

जनवरीदेखि अक्टोबरसम्म समूहको कुल बिक्री २५ लाख २ हजार ७२३ पुगेको छ । अघिल्लो वर्षको सोही अवधिको तुलनामा यो ९.३४ प्रतिशत बढी हो । यही अवधिमा निर्यात ६४.८ प्रतिशत बढेर १७ लाख ५१ हजार ७६६ पुगेको छ । दश महिनाको कुल बिक्रीमध्ये करिब ७० प्रतिशत गाडी निर्यात भएका छन् ।

समूहले पहिलो दश महिनामा ९ लाख ९९ हजार ४१७ एनईभी बिक्री गरेको छ । यो अघिल्लो वर्षको सोही अवधिभन्दा ४३.२ प्रतिशत बढी हो । यससँगै चेरीले सन् २०२५ भरि बिक्री गरेको एनईभीको संख्या यस वर्षको दश महिनामै पार गरेको छ ।

हङकङमा सूचीकृत चेरी अटोको छुट्टै विवरणअनुसार उसका पाँच ब्रान्डको अक्टोबर बिक्री ७.२१ प्रतिशत बढेर २ लाख ८२ हजार ४५८ पुगेको छ । कम्पनीको निर्यात ६१.५३ प्रतिशत बढेर १ लाख ९४ हजार ६७४ पुग्दा चीनभित्रको बिक्री भने ३८.५९ प्रतिशत घटेर ८७ हजार ७८४ मा झरेको छ । पाँच ब्रान्डमध्ये चेरीको बिक्री बढेको छ भने जेटुर, एक्सिड, आइकार र लक्सिडको बिक्री घटेको छ ।