अग्रिम टिकटसँगै बसको अवस्था जाँच्ने तयारी, गोंगबुमा निःशुल्क सेवा
काठमाडौं । नेपाल यातायात व्यवसायी राष्ट्रिय महासंघले दसैँमा यात्रा गर्ने यात्रुसँग सरकारले निर्धारण गरेकोभन्दा बढी भाडा नलिन आफ्ना सदस्य व्यवसायीलाई निर्देशन दिएको छ । असोज २३ गतेदेखि अग्रिम टिकट बुकिङ खुल्ने भएपछि महासंघले तोकिएकै भाडामा टिकट उपलब्ध गराउन र यात्रालाई सुरक्षित बनाउन आग्रह गरेको हो ।
महासंघका महासचिव डेकनाथ गौतमले
निर्धारित दरभन्दा बढी भाडा असुल्ने सवारीमाथि कारबाही हुने बताएका छन् । महासंघले
सातवटै प्रदेश समिति, जिल्ला समिति र सम्बद्ध व्यवसायीलाई भाडादर पालना तथा टिकट
व्यवस्थापनका लागि निर्देशन पठाएको जनाएको छ ।
टिकट बिक्री गर्ने काउन्टरका
कर्मचारीले तोकिएको पोसाक र परिचयपत्र लगाउनुपर्नेछ । यात्रुलाई सहज रूपमा टिकट
उपलब्ध गराउने र चाडपर्वको यात्रालाई व्यवस्थित बनाउने विषयमा पनि महासंघले जोड
दिएको छ ।
यात्रुवाहक सवारीको प्राविधिक अवस्था
जाँच्न काठमाडौंको गोंगबुस्थित नयाँ बसपार्कमा निःशुल्क परीक्षणको व्यवस्था
मिलाइने भएको छ । यसका लागि टेकुस्थित सवारी परीक्षण कार्यालयबाट प्राविधिक
कर्मचारी खटाइनेछन् ।
अग्रिम टिकट बुकिङ खुलाउने निर्णय
यसअघि नै भएको थियो । बुकिङ सुरु हुने मिति नजिकिएसँगै महासंघले भाडादर पालना,
काउन्टर कर्मचारीको पहिचान र सवारीको प्राविधिक परीक्षणलाई प्राथमिकता दिएको हो ।
