सीमा पारिको ईभी यात्रामा राहत, ह्युन्डाईको एपबाट भेटिने ३० हजार चार्जर

काठमाडौं । विद्युतीय गाडी किन्ने सोच बनाउँदा धेरैको मनमा एउटै प्रश्न आउँछ—टाढाको यात्रामा ब्याट्री सकिन लागे कहाँ चार्ज गर्ने ? यही प्रश्नको सहज उत्तर खोज्दै भारतमा एउटा अटोमोबाइल कम्पनीले आफ्नो डिजिटल प्लेटफर्मलाई निकै ठूलो चार्जिङ सञ्जालसँग जोडेको छ ।

ह्युन्डाई मोटर इन्डियाले आफ्नो माइह्युन्डाई मोबाइल एपमार्फत भारतभर ३० हजारभन्दा बढी विद्युतीय सवारी चार्जिङ बिन्दुमा पहुँच उपलब्ध गराएको जनाएको छ । यो सुविधा ह्युन्डाईका ग्राहकमा मात्र सीमित छैन । अन्य ब्रान्डका ईभी मालिकले पनि एपबाट चार्जर खोज्न, उपलब्धता हेर्न, समय बुक गर्न र भुक्तानी गर्न सक्नेछन् ।

कम्पनीले विभिन्न चार्जिङ सेवा प्रदायकका सञ्जाललाई एउटै प्लेटफर्ममा समेटेको हो । यसले अलगअलग एप डाउनलोड गर्ने, फरक भुक्तानी प्रणाली चलाउने र यात्राकै बेला चार्जरको खोजीमा अलमलिनुपर्ने समस्या कम गर्ने अपेक्षा गरिएको छ । ह्युन्डाईका अनुसार प्रयोगकर्ताले औसत २५ किलोमिटरको दायराभित्र चार्जिङ बिन्दु भेट्न सक्ने व्यवस्था बनेको छ ।

दिल्ली–गुरुग्राम–जयपुर, मुम्बई–पुणे–बेङ्गलुरु, मुम्बई–रत्नागिरी–गोवा, चेन्नई–वेल्लोर–बेङ्गलुरु र हैदराबाद–कुर्नुल–बेङ्गलुरुजस्ता महत्त्वपूर्ण सडक खण्डमा पनि यो पहुँच विस्तार गरिएको कम्पनीको भनाइ छ । अन्तरसहर यात्रा गर्ने ईभी प्रयोगकर्ताका लागि यस्ता मार्गमा चार्जर उपलब्ध हुनु गाडीको रेन्जभन्दा पनि ठूलो भरोसाको विषय बन्न सक्छ ।

साझेदारका चार्जर जोड्नुबाहेक ह्युन्डाईले आफैंले १०५ भारतीय सहरमा १८३ वटा डिसी फास्ट चार्जिङ केन्द्र सञ्चालन गरिरहेको छ । यी केन्द्रको क्षमता ६० किलोवाटदेखि २४० किलोवाटसम्म छ । कम्पनीका आफ्नै चार्जर पनि सबै ब्रान्डका विद्युतीय गाडीका लागि खुला राखिएको छ ।

यहाँ एउटा तथ्य भने छुट्याएर बुझ्नुपर्छ । ३० हजारभन्दा बढी संख्या ह्युन्डाईले आफैंले निर्माण गरेका चार्जरको संख्या होइन । ती माइह्युन्डाई एपबाट पहुँचयोग्य साझेदारसहितका चार्जिङ बिन्दु हुन् । ह्युन्डाईको आफ्नै भौतिक फास्ट चार्जिङ सञ्जाल अहिले १८३ केन्द्रमा सीमित छ, जसलाई सन् २०३० सम्म ६ सय पुर्‍याउने लक्ष्य राखिएको छ ।

नयाँ केन्द्रहरू प्रमुख सहर, राष्ट्रिय तथा प्रदेश राजमार्ग, ह्युन्डाईका डिलरसिप र महत्त्वपूर्ण अन्तरसहर मार्गमा केन्द्रित हुनेछन् । कम्पनीका अनुसार सन् २०२४ को अन्त्यसम्म उक्त एपमा १० हजारभन्दा बढी चार्जिङ बिन्दु उपलब्ध थिए । अहिलेको विस्तारसँगै यो पहुँच करिब तीन गुणा बढेको देखिन्छ ।

जनवरी २०२३ देखि जुन २०२६ सम्म माइह्युन्डाई एपमार्फत तीन लाखभन्दा बढी ईभी प्रयोगकर्ताले ह्युन्डाईका चार्जिङ केन्द्र प्रयोग गरेको कम्पनीले जनाएको छ । सो अवधिमा ५० लाख किलोवाट आवरभन्दा बढी विद्युत् आपूर्ति भएको र करिब ३५ लाख किलोग्राम कार्बन डाइअक्साइड उत्सर्जन जोगाउन सहयोग पुगेको कम्पनीको दाबी छ ।