कुसुन्तीको आकाशे पुलमा लिफ्ट, सिँढी चढ्न कठिन हुनेलाई सहज हुने अपेक्षा
ललितपुर । कुसुन्ती हाइटमा निर्माणाधीन लिफ्टसहितको आकाशे पुल छठअघि वा त्यसलगत्तै सञ्चालनमा ल्याउने लक्ष्य राखिएको छ । निर्माण अन्तिम चरणमा पुगे पनि सर्वसाधारणका लागि खुला गर्ने निश्चित मिति भने सार्वजनिक भएको छैन ।
ललितपुर महानगरपालिका–१३ को चक्रपथ
क्षेत्रमा बनिरहेको पुलमा दुवैतर्फ लिफ्टको व्यवस्था छ । सञ्चालनमा आएपछि सिँढी
चढ्न कठिन हुने ज्येष्ठ नागरिक, अपाङ्गता भएका व्यक्ति र बिरामीलाई सडक वारपार
गर्न सहज हुने अपेक्षा गरिएको छ । बालबालिकासहित हिँड्ने पैदलयात्रीलाई पनि यसले
सुविधा दिनेछ ।
चार करोड ६८ लाख रुपैयाँ लागतको यो
पुल निर्माण २०८० फागुनमा सुरु भएको थियो । सम्झौताअनुसार एक वर्षभित्र काम सक्ने
लक्ष्य थियो । तर प्राविधिक समस्या र निर्माण प्रक्रियाका जटिलताले काम निर्धारित
समयभन्दा लम्बिएको हो ।
व्यस्त चक्रपथमा पैदलयात्रीलाई
सवारीको बीचबाट सडक पार गर्नुपर्ने अवस्था कम गर्नु पुल निर्माणको मुख्य उद्देश्य
हो । दुवैतर्फ लिफ्ट राखिएकाले सिँढी प्रयोग गर्न नसक्ने नागरिकले पनि पुलबाटै सडक
पार गर्न सक्नेछन् ।
हाल पुल निर्माणकै चरणमा छ । छठ आसपास
सञ्चालनमा ल्याउने लक्ष्य राखिए पनि प्रयोगका लागि खुला हुने दिन भने तय हुन बाँकी
छ ।
