एक लाखमाथि लिपमोटरको लगातार तेस्रो छलाङ, सेप्टेम्बरमा फेरि रेकर्ड
काठमाडौं । चिनियाँ न्यू इनर्जी भेहिकल निर्माता लिपमोटरले सेप्टेम्बरमा विश्वभर १ लाख ५ हजार ६५६ गाडी डेलिभरी गर्दै अहिलेसम्मकै उच्च मासिक रेकर्ड बनाएको छ । कम्पनीको डेलिभरी लगातार तेस्रो महिना एक लाख युनिटभन्दा माथि पुगेको हो ।
सेप्टेम्बरको डेलिभरी अघिल्लो
वर्षको सोही महिनाको तुलनामा ५८.५१ प्रतिशत र अगस्टको तुलनामा २.४५ प्रतिशत बढी हो
। अगस्टमा कम्पनीले १ लाख ३ हजार १२९ गाडी डेलिभरी गरेको थियो । यद्यपि वार्षिक
वृद्धिदर अगस्टको ८०.७२ प्रतिशतको तुलनामा केही सुस्त भएको छ ।
लिपमोटरले सन् २०२६ को तेस्रो
त्रैमासमा ३ लाख १० हजार ५२ गाडी डेलिभरी गरेको छ । यो अघिल्लो वर्षको सोही अवधिको
तुलनामा ७८.३४ प्रतिशत र दोस्रो त्रैमासको तुलनामा २५.८७ प्रतिशत बढी हो ।
जनवरीदेखि सेप्टेम्बरसम्म कम्पनीको सञ्चित डेलिभरी ६ लाख ६६ हजार ५३९ युनिट पुगेको
छ, जुन सन् २०२५ भरि भएको ५ लाख ९६ हजार ५५५ युनिट डेलिभरीभन्दा बढी हो ।
कम्पनीले सन् २०२६ मा १० लाख गाडी
डेलिभरी गर्ने लक्ष्य राखेको छ । नौ महिनामा लक्ष्यको करिब ६६.७ प्रतिशत पूरा
भएकाले बाँकी तीन महिनामा थप ३ लाख ३३ हजार ४६१ युनिट डेलिभरी गर्नुपर्नेछ ।
लक्ष्य भेट्न चौथो त्रैमासमा मासिक औसत करिब १ लाख ११ हजार १५४ गाडी डेलिभरी
गर्नुपर्ने देखिन्छ, जुन सेप्टेम्बरको रेकर्डभन्दा पनि माथि हो ।
लिपमोटरको विदेशी बजारतर्फको
डेलिभरी पनि बढेको छ । कम्पनीले सेप्टेम्बरमा २७ हजारभन्दा बढी गाडी निर्यात गरेको
जनाएको छ । जनवरीदेखि सेप्टेम्बरसम्मको सञ्चित निर्यात १ लाख ५० हजार युनिट नाघेको
छ । चीनबाहिरको व्यवसाय स्टेलान्टिससँगको संयुक्त उद्यम लिपमोटर इन्टरनेसनलले
सम्हाल्दै आएको छ भने युरोपमा यसको बिक्री तथा सर्भिस नेटवर्क एक हजारभन्दा बढी
स्थानमा विस्तार भएको छ ।
नेपालमा सांग्रिला मोटर्स प्रालिले लिपमोटरको आधिकारिक वितरण गर्दै आएको छ । नेपाली बजारमा टी०३, बी१०, सी१० र बी०३एक्सजस्ता मोडल उपलब्ध छन् ।
