विद्युतीय मोटरसाइकल–स्कुटर आयातमा भारतबाट १०२२६, चीनबाट ७५२०
काठमाडौँ । नेपालमा चालु आर्थिक वर्षको पहिलो तीन महिनामा स्कुटरसहित १७ हजार ७४६ विद्युतीय दुईपांग्रे आयात भएका छन् । त्यसमध्ये असोजमा मात्रै ७ हजार ८५९ वटा भित्रिएका हुन् । यो भदौको तुलनामा करिब ६६ प्रतिशत बढी हो ।
भन्सार विभागको आर्थिक वर्ष
२०८३/८४ को साउनदेखि असोजसम्मको प्रतिवेदनअनुसार यी सवारीको आयात मूल्य २ अर्ब ६३
करोड ९६ लाख रुपैयाँ छ । तिनको आयातबाट सरकारले ९२ करोड ४० लाख रुपैयाँ राजस्व
संकलन गरेको छ ।
महिनागत रूपमा साउनमा ५ हजार १५४
र भदौमा ४ हजार ७३३ वटा आयात भएका थिए । साउनभन्दा भदौमा आयात घटे पनि असोजमा
बढेको हो । भदौको तुलनामा असोजमा ३ हजार १२६ वटा बढी भित्रिएका छन् । तीन महिनाको
कुल आयातमा असोजको हिस्सा ४४.३ प्रतिशत छ ।
देशगत रूपमा भारतबाट १० हजार २२६
र चीनबाट ७ हजार ५२० वटा आयात भएका छन् । विभागले यो विवरणमा विद्युतीय मोटरसाइकल
र स्कुटरलाई एउटै समूहमा राखेकाले स्कुटरको मात्रै संख्या भने छुट्टिँदैन ।
यस संयुक्त समूहबाहेक विद्युतीय
मोटरसाइकलको छुट्टै वर्गमा थप १४१ वटा आयात भएका छन् । साउनमा २०, भदौमा ५५ र
असोजमा ६६ वटा भित्रिएका हुन् । यी सबै भारतबाट आयात भएका छन् ।
पेडल नभएको विद्युतीय मोपेड तथा
स्कुटरको अर्को समूहमा भदौमा भारतबाट एउटा आयात भएको देखिन्छ । तीनवटै समूह जोड्दा
विद्युतीय दुईपांग्रेको कुल आयात संख्या १७ हजार ८८८ पुग्छ । यसमा विद्युतीय साइकल
समावेश छैनन् । उक्त विवरण भन्सारबाट आयात भएका सवारीको हो ।
