दक्षिण कोरियाली अटो दिग्गज हुण्डाईको नयाँ रणनीति, थाइल्यान्डलाई बनायो निर्यात हब

काठमाडौं । दक्षिण कोरियाली अटोमोबाइल समूह हुण्डाई मोटर ग्रुपअन्तर्गतको हुण्डाई मोबिलिटी थाइल्यान्ड ले सन् २०२६ को अन्तिम त्रैमासदेखि थाइल्यान्डमा उत्पादन हुने ब्याट्री विद्युतीय सवारी (बीईभी) अस्ट्रेलियामा निर्यात गर्ने तयारी थालेको छ । यो योजनाले थाइल्यान्डलाई विश्वव्यापी विद्युतीय सवारी उत्पादन तथा निर्यात केन्द्रका रूपमा थप स्थापित गर्ने अपेक्षा गरिएको छ ।

बैंकक पोस्ट का अनुसार कम्पनीले अस्ट्रेलियाली बजारका लागि उपयुक्त मोडल छनोट गर्ने तथा त्यहाँ लागू रहेको न्यू भेहिकल एफिसिएन्सी स्ट्यान्डर्ड (एनभीईएस) सम्बन्धी मापदण्ड पूरा गर्ने विषयमा अध्ययन गरिरहेको छ । उक्त मापदण्डले नयाँ कार, एसयूभी तथा हल्का व्यावसायिक सवारीसाधनबाट उत्सर्जन हुने औसत कार्बन डाइअक्साइडको सीमा निर्धारण गर्छ । साथै, अस्ट्रेलियामा कुनै पनि सवारी निर्यात गर्नुअघि आयात स्वीकृति लिनुपर्ने भएकाले नियामकीय प्रक्रिया पूरा गर्नु कम्पनीका लागि महत्वपूर्ण चरण हुने बताइएको छ ।

हुण्डाईको थाइल्यान्डस्थित उत्पादन केन्द्रको वार्षिक क्षमता ५ हजार युनिट रहेको छ । ब्याट्री उत्पादन सुविधा सहित करिब १ अर्ब बाह्टको लगानीमा स्थापना गरिएको यो परियोजनाले थाइल्यान्ड सरकारको ईभी ३.५ प्रोत्साहन योजनाबाट समेत सुविधा प्राप्त गरेको छ । सन् २०२४ देखि २०२७ सम्म सञ्चालन हुने उक्त योजनाअन्तर्गत स्थानीय रूपमा बीईभी उत्पादन गर्ने कम्पनीलाई कर छुट र अनुदान उपलब्ध गराइन्छ । बदलामा कम्पनीले आयातको तुलनामा निश्चित अनुपातमा स्थानीय उत्पादन गर्नुपर्ने व्यवस्था छ ।

यसै योजनाअन्तर्गत हुण्डाईले हालै थाइल्यान्डमै उत्पादन गरिएको आयोनिक ५ लाई पहिलो स्थानीय बीईभीका रूपमा बजारमा ल्याएको छ । कम्पनीले मासिक करिब १०० युनिट उत्पादन गर्ने लक्ष्य राखेको छ भने चालु वर्ष करिब ८०० आयातित सवारीको दायित्व स्थानीय उत्पादनमार्फत पूरा गर्ने योजना बनाएको जनाएको छ ।

थाइल्यान्डस्थित उत्पादन केन्द्रमा प्रयोग हुने विद्युतीय सवारीका कम्पोनेन्टमध्ये ४६ प्रतिशत लागत स्थानीय स्रोतबाट आपूर्ति भइरहेको कम्पनीले जनाएको छ । यो अनुपात सरकारले तोकेको न्यूनतम ४० प्रतिशतभन्दा बढी हो । यसले स्थानीय आपूर्ति शृङ्खला मजबुत बन्दै गएको संकेत पनि दिएको छ ।

कम्पनीले सन् २०२६ भित्र आयोनिक ५ को बिक्री २ हजार ८०० युनिट पुर्‍याउने लक्ष्य लिएको छ । गत वर्ष यसको बिक्री २ हजार ३०० युनिट रहेको थियो । साथै, देशभर आफ्ना बिक्री तथा सेवा केन्द्रको संख्या बढाएर २८ पुर्‍याउने योजना पनि कम्पनीले अघि सारेको छ ।

हुण्डाई मोबिलिटी थाइल्यान्डका प्रबन्ध निर्देशक वालोप चालेर्मभोङ्साभेजले वर्षको दोस्रो आधामा थाइल्यान्डको अर्थतन्त्रमा सकारात्मक सुधार आउने विश्वास व्यक्त गरेका छन् । सरकारी प्रोत्साहन कार्यक्रम, वैदेशिक लगानीको वृद्धि तथा निजी क्षेत्रको स्थिर आम्दानीका कारण विशेषगरी प्रिमियम सवारी बजारमा उपभोक्ताको विश्वास बढ्दै गएको उनको भनाइ छ । उनले थाइल्यान्ड स्टक एक्सचेन्ज सूचकांक पनि गत वर्षको तुलनामा उल्लेखनीय रूपमा बढेको उल्लेख गर्दै त्यसले उच्च मूल्यका सवारीको मागमा समेत सकारात्मक प्रभाव पार्ने अपेक्षा व्यक्त गरेका छन् ।