कर नीतिको असर: नेपालमा एमजी एस६ ईभी २ लाख र एस५ ईभी १ लाख रुपैयाँले महँगियो

काठमाडौं । नेपालमा विद्युतीय सवारीसाधन (ईभी) को मूल्यमा फेरि वृद्धि भएको छ । सरकारले लागू गरेको नयाँ कर नीतिको प्रभावसँगै प्यारामाउन्ट मोटर्सले एमजीका दुई लोकप्रिय एसयूभी मोडलको मूल्य संशोधन गरेको हो ।

नयाँ मूल्यसूचीअनुसार एमजी एस६ ईभीको मूल्य २ लाख रुपैयाँले बढाइएको छ भने एमजी एस५ ईभीका दुवै भेरियन्टमा १–१ लाख रुपैयाँको वृद्धि गरिएको छ ।

मे २०२६ मा नेपाली बजारमा भित्रिएको एमजी एस६ ईभी सुरुवातमा ६९ लाख ९९ हजार रुपैयाँमा उपलब्ध थियो । अहिले मूल्य समायोजनपछि यो मोडल अझ महँगो बनेको छ । नेपालमा यो एसयूभी ट्रोफी लङ रेन्ज भेरियन्टमा मात्र बिक्री हुँदै आएको छ ।

यता, एमजी एस५ ईभीको नयाँ मूल्य पनि सार्वजनिक गरिएको छ । संशोधित मूल्यअनुसार ४९ kWh लक्जरी भेरियन्टको मूल्य ५० लाख ९९ हजार रुपैयाँ पुगेको छ भने ६२ kWh लक्जरी भेरियन्ट अब ५५ लाख ९९ हजार रुपैयाँमा उपलब्ध हुनेछ ।

एमजीको नेपाली लाइनअपमा एस५ ईभीभन्दा माथिल्लो सेग्मेन्टमा रहेको एस६ ईभीले प्रिमियम इलेक्ट्रिक एसयूभी बजारलाई लक्षित गरेको छ । कम्पनीसँग हाल एमजी४ ईभी, एमजी एस५ ईभी, एमजी एस६ ईभी र एमजी आईएम६ जस्ता मोडल उपलब्ध छन् ।

कम्पनीले यसपटक एमजी४ ईभी र एमजी आईएम६को मूल्य भने यथावत् राखेको जनाएको छ ।

नेपालमा ईभीसम्बन्धी कर तथा भन्सार नीतिमा हुने परिवर्तनले सवारीसाधनको खुद्रा मूल्यमा प्रत्यक्ष प्रभाव पार्दै आएको छ । त्यसैले आगामी दिनमा पनि नीतिगत परिवर्तनअनुसार मूल्य पुनः समायोजन हुने सम्भावना रहेको देखिन्छ ।

मूल्य बढे पनि एमजी एस५ र एस६ ईभीले उपलब्ध गराउने लामो ड्राइभिङ रेन्ज, आधुनिक टेक्नोलोजी, प्रिमियम फिचर र आरामदायी अनुभवका कारण यी मोडलहरू नेपाली ईभी बजारका महत्वपूर्ण विकल्पका रूपमा रहने अपेक्षा गरिएको छ ।