टेस्लाको कमाइ उस्तै, बचत खुम्चियो

काठमाडौं । टेस्लाले सन् २०२६ को तेस्रो त्रैमासिकमा २८ अर्ब डलरभन्दा बढी आम्दानी गरे पनि नाफा जोगाउन सकेन । अघिल्लो वर्षको समान अवधिसँग तुलना गर्दा आम्दानी लगभग स्थिर रहँदा साधारण सेयरधनीलाई प्राप्त हुने खुद नाफा ४३ प्रतिशत घटेको छ ।

अक्टोबर २१ मा जारी वित्तीय विवरणअनुसार जुलाईदेखि सेप्टेम्बरसम्म कम्पनीको यस्तो नाफा ७८ करोड ७० लाख डलरमा सीमित भएको छ । सञ्चालन नाफा भने अझ तीव्र दरमा, ५६ प्रतिशत घटेर ७१ करोड ८० लाख डलरमा झरेको छ ।

यसको एउटा प्रमुख कारण खर्चको वृद्धि हो । कम्पनीको सञ्चालन खर्च करिब ३९ प्रतिशत बढेको छ । अनुसन्धान तथा विकासमा मात्रै खर्च झन्डै ६९ प्रतिशत बढेको विवरणले देखाउँछ । टेस्लाले आर्टिफिसियल इन्टेलिजेन्स र रोबोटिक्ससहितका क्षेत्रमा लगानी गरिरहेको छ । आम्दानी उस्तै रहँदा बढेको खर्चले नाफाको ठूलो हिस्सा खाएको देखिन्छ ।

गाडी व्यवसायबाट हुने आम्दानी ३ प्रतिशत घट्दा सेवा तथा अन्य व्यवसायको आम्दानी ३३ प्रतिशत बढेको छ । यसले समग्र आम्दानी थाम्न सहयोग गरे पनि सञ्चालन नाफाको गिरावट रोक्न पर्याप्त भएन ।

यो अवधिमा टेस्लाले ४ लाख ८६ हजार ५३२ गाडी डेलिभरी गरेको छ, जुन अघिल्लो वर्षभन्दा करिब २ प्रतिशत कम हो । उत्पादन भने ४ प्रतिशत बढेर ४ लाख ६४ हजार ३९१ पुगेको छ । उत्पादन र डेलिभरी फरक अवधिमा हुन सक्ने भएकाले यी दुई संख्याको अन्तरलाई मात्रै मागको मापन मान्न मिल्दैन ।

नाफा घटे पनि टेस्ला घाटामा गएको छैन । अब हेर्नुपर्ने विषय नयाँ प्रविधिमा गरिएको खर्चले आगामी अवधिमा कति आम्दानी थप्छ र गाडी व्यवसायको नाफा कति सुधारिन्छ भन्ने हो ।