भीएलएफ स्ट्राडा लन्च, सिटी र म्याक्स गरी दुई विकल्प, रेन्ज २५० किलोमिटर

काठमाडौं । भीएलएफले भारतीय बजारमा नयाँ विद्युतीय स्कुटर स्ट्राडा लन्च गरेको छ । सिटी र म्याक्स गरी दुई भेरियन्टमा आएको स्कुटरको मूल्य क्रमशः करिब १ लाख २० हजार र १ लाख ५५ हजार भारतीय रुपैयाँ तोकिएको छ । यी भारतीय बजारका एक्स–शोरुम मूल्य हुन् ।

सिटी भेरियन्टमा २.१६ किलोवाट आवरको ब्याट्री छ, जसबाट एकपटकको चार्जमा १३० किलोमिटरसम्म आइडीसी रेन्ज पाइने दाबी गरिएको छ । म्याक्समा भने कुल ४.३२ किलोवाट आवरको ब्याट्री क्षमता र २५० किलोमिटरसम्म आइडीसी रेन्जको दाबी छ । ब्याट्री निकालेर छुट्टै चार्ज गर्न सकिने सुविधा पनि दिइएको छ । यो परीक्षण प्रणालीमा आधारित रेन्ज भएकाले वास्तविक प्रयोगमा गति, सडक र चलाउने शैलीअनुसार फरक पर्न सक्छ ।

स्ट्राडामा अधिकतम ४.८ किलोवाट पावर र ३४ न्युटन मिटर टर्क दिने बीएलडीसी हब मोटर प्रयोग गरिएको छ । इको, सिटी र स्पोर्ट गरी तीन राइडिङ मोड छन् । यी मोडमा अधिकतम गति क्रमशः प्रतिघण्टा ४५, ६५ र ८५ किलोमिटर तोकिएको छ ।

अगाडिको भागमा प्रोजेक्टर एलईडी हेडल्याम्प र अग्लो विन्डस्क्रिन दिइएको छ । सुविधातर्फ ५ इन्चको टीएफटी डिस्प्ले, किलेस इन्ट्री तथा युएसबी टाइप–ए र टाइप–सी चार्जिङ पोर्ट छन् । अगाडि १६ इन्च र पछाडि १४ इन्चको ह्विल रहेको स्कुटरमा दुवैतर्फ डिस्क ब्रेक र कम्बाइन्ड ब्रेकिङ सिस्टम उपलब्ध छ । सिटको उचाइ ७८० मिलिमिटर छ ।

कालो, सिल्भर, ग्रे र सेतो गरी चार रंगमा उपलब्ध स्ट्राडाको सुरुवाती मूल्य भएको सिटी भेरियन्ट र २५० किलोमिटर रेन्ज दाबी गरिएको म्याक्स भेरियन्ट फरक हुन् । लामो रेन्ज चाहने ग्राहकले माथिल्लो भेरियन्ट रोज्नुपर्ने हुन्छ ।