डिजेललाई पछि पार्दै भोल्भोको इलेक्ट्रिक ट्रक बन्यो वर्षकै उत्कृष्ट
काठमाडौं । भोल्भो ट्रक्सको पूर्ण विद्युतीय हेभी ट्रक शृंखलाले ‘इन्टरनेसनल ट्रक अफ द इयर २०२७’ उपाधि जितेको छ । एउटै मोडलको सट्टा एफएच इलेक्ट्रिक, एफएम इलेक्ट्रिक, एफएमएक्स इलेक्ट्रिक र नयाँ एफएच एरो इलेक्ट्रिकसहितको शृंखलालाई निर्णायक मण्डलले यस वर्षको उत्कृष्ट ट्रक छनोट गरेको हो ।
यो उपाधि सन् २०२७ का लागि प्रदान गरिएको हो। वार्षिक अवार्डको प्रचलनअनुसार आगामी वर्षको विजेता अघिल्लो वर्षमै घोषणा गरिने भएकाले ‘इन्टरनेसनल ट्रक अफ द इयर २०२७’ को नतिजा सन् २०२६ को आईएए ट्रान्सपोर्टेसनमै सार्वजनिक गरिएको हो ।
निर्णायकले लामो रेन्ज, फरक क्याब
तथा च्यासिस विकल्प र विभिन्न ढुवानी प्रयोजनअनुसार तयार गर्न सकिने क्षमतालाई
मुख्य आधार मानेका छन् । नयाँ शृंखलाले क्षेत्रीय तथा लामो दूरीको ढुवानीदेखि सहरी
वितरण, निर्माण र सार्वजनिक सेवासम्मका काम समेट्ने भोल्भोले जनाएको छ । अधिकतम
रेन्ज ७०० किलोमिटरसम्म दाबी गरिएको छ, तर वास्तविक दूरी मौसम, हावा, कुल तौल र
चालकको शैलीअनुसार फरक पर्न सक्छ ।
जर्मनीको ह्यानोभरमा आयोजित आईएए
ट्रान्सपोर्टेसन समारोहमा भोल्भो ट्रक्सका अध्यक्ष रोजर आल्मले अवार्ड ग्रहण गरेका
हुन् । कम्पनीका लागि यो इन्टरनेसनल ट्रक अफ द इयरको आठौँ उपाधि हो । भोल्भो एफएच
इलेक्ट्रिकले यसअघि सन् २०२४ मा पनि यही अवार्ड जितेको थियो ।
भोल्भोका अनुसार सन् २०१९ यता
विश्वभर सञ्चालनमा आएका करिब ७ हजार विद्युतीय ट्रकले संयुक्त रूपमा ५० करोड
किलोमिटर यात्रा पूरा गरिसकेका छन् । अहिले ५० भन्दा बढी देशका करिब दुई हजार
ग्राहकले दैनिक ढुवानीमा भोल्भोका विद्युतीय ट्रक प्रयोग गरिरहेका छन् ।
२४ जना युरोपेली व्यावसायिक सवारी पत्रकार सम्मिलित निर्णायक मण्डलले प्राविधिक नवीनता, आराम, सुरक्षा, चलाउने सहजता, ऊर्जा दक्षता, वातावरणीय प्रभाव र कुल स्वामित्व लागतका आधारमा अवार्ड दिने गर्छ । यसपटक एउटै प्रयोगमा सीमित विद्युतीय ट्रकभन्दा फरक ढुवानी आवश्यकतालाई समेट्ने पूर्ण शृंखला विकास गरेकामा भोल्भोले उपाधि पाएको हो ।
