कम सञ्चालन खर्चको सवारी खोज्ने व्यवसायीको नजर नाडा अटो शोमा

काठमाडौं । अटो शो भन्नेबित्तिकै चम्किला कार, सुविधासम्पन्न एसयूभी र नयाँ विद्युतीय मोडलको चर्चा अगाडि आउँछ । तर यसपटक भृकुटीमण्डप पुग्ने अवलोकनकर्ताले निजी प्रयोगका गाडीभन्दा फरक, आम्दानी र व्यवसायसँग प्रत्यक्ष जोडिएका सवारीको पनि फराकिलो संसार देख्न पाउनेछन् ।

भदौ ९ देखि १४ गतेसम्म आयोजना हुने १८औँ नाडा अटो शोमा हलुका व्यावसायिक सवारीतर्फ १६ ब्रान्ड सहभागी हुँदै छन् । प्रदर्शनीमा पिकअप, भ्यान, मिनिबस, यात्रुवाहक तथा सामान ढुवानीमा प्रयोग हुने विभिन्न सवारी राखिनेछन् ।

सहभागीको विवरणअनुसार फोटोन, हाइगर, फारिजोन, सोकोन र किङ लङलगायत ब्रान्डले आफ्ना व्यावसायिक सवारी प्रस्तुत गर्नेछन् । फोटोनलाई हल २ र हल ४ दुवैमा स्थान दिइएको छ । फरक प्रकृति र प्रयोगका सवारीलाई छुट्टाछुट्टै क्षेत्रमा प्रस्तुत गर्ने तयारीका कारण यसको उपस्थिति दुई हलमा देखिएको हो ।

निजी प्रयोगभन्दा फराकिलो बजार

व्यावसायिक सवारीको माग व्यक्तिगत रुचिभन्दा व्यवसायको आवश्यकता र सम्भावित आम्दानीसँग जोडिन्छ । विद्यालयका लागि बस, होटल तथा पर्यटन व्यवसायका लागि भ्यान, ढुवानीका लागि पिकअप र सार्वजनिक यातायातका लागि मिनिबस खोज्ने व्यवसायीले सवारीको मूल्यसँगै सञ्चालन खर्च, यात्रु क्षमता, भारवहन क्षमता र बिक्रीपछिको सेवासमेत तुलना गर्छन् ।

यसपटकको प्रदर्शनीले त्यस्ता व्यवसायीलाई विभिन्न ब्रान्डका सवारी एउटै स्थानमा हेर्ने अवसर दिनेछ । विशेषगरी विद्युतीय भ्यान र बसको प्रवेश बढिरहेको अवस्थामा ब्याट्री क्षमता, एकपटकको चार्जमा तय हुने दूरी, चार्जिङ समय तथा दीर्घकालीन सञ्चालन खर्चमा अवलोकनकर्ताको चासो रहने देखिन्छ ।

नेपालमा इन्धनको मूल्य र सञ्चालन खर्च बढ्दै जाँदा व्यावसायिक प्रयोजनका लागि विद्युतीय सवारीप्रतिको आकर्षण पनि बढिरहेको छ । दैनिक लामो दूरी चल्ने सवारीमा इन्धन खर्च घटाउन सकिने भएकाले यातायात, पर्यटन र ढुवानी व्यवसायीले विद्युतीय विकल्पलाई चासोका साथ हेर्न थालेका छन् ।

तर व्यावसायिक सवारीको छनोटमा खरिद मूल्य मात्र निर्णायक हुँदैन । चार्जिङ पूर्वाधार, यात्राको प्रकृति, भारवहन क्षमता, मर्मत सुविधा, जगेडा पार्टपुर्जाको उपलब्धता र सवारी नचल्दा व्यवसायमा पर्ने प्रभावसमेत महत्त्वपूर्ण हुन्छ । त्यसैले प्रदर्शनी व्यवसायीका लागि सवारी हेर्ने मात्र नभई वितरकसँग प्रत्यक्ष जानकारी लिने अवसर पनि बन्नेछ ।

पचास सवारी ब्रान्डको सहभागिता

नाडाका अनुसार अटो शोमा पेसेन्जर कारका २२, हलुका व्यावसायिक सवारीका १६ र दुईपाङ्ग्रे सवारीका १२ गरी कुल ५० सवारी ब्रान्ड सहभागी हुनेछन् । सवारीसाधनसँगै आठ नेपाली उत्पादकसहित ६९ कम्पोनेन्ट तथा अन्य व्यवसायीले पनि आफ्ना उत्पादन र सेवा प्रदर्शन गर्नेछन् ।

निजी कार र एसयूभीले प्रदर्शनीको मुख्य आकर्षण बन्ने गरे पनि १६ व्यावसायिक सवारी ब्रान्डको सहभागिताले नाडा अटो शोको दायरा त्यसभन्दा फराकिलो रहेको देखाउँछ । यसपटकको प्रदर्शनी नयाँ निजी गाडी खोज्ने ग्राहकसँगै व्यवसाय विस्तारका लागि किफायती र उपयोगी सवारी खोजिरहेका व्यवसायीको पनि महत्त्वपूर्ण गन्तव्य बन्नेछ ।