भारतमा टाटा कमर्सियल गाडी महँगियो, नेपालमा पनि मूल्य बढ्ने संकेत

काठमाडौं । भारतको अग्रणी सवारी निर्माता टाटा मोटर्सले आफ्ना कमर्सियल सवारीसाधन को मूल्य आगामी जुलाई १, २०२६ देखि २.५ प्रतिशतसम्म बढाउने घोषणा गरेको छ । कम्पनीले बढ्दो कच्चा पदार्थको मूल्य र उत्पादन लागत मा भएको वृद्धिका कारण मूल्य समायोजन गर्नुपरेको जनाएको छ ।

कम्पनीका अनुसार मूल्यवृद्धि सबै कमर्सियल गाडीमा लागू हुनेछ भने कुन मोडल र भेरियन्टमा कति मूल्य बढ्ने भन्ने कुरा फरक–फरक हुनेछ ।

यो चालू आर्थिक वर्ष (FY27) मा टाटा मोटर्सले गरेको दोस्रो मूल्यवृद्धि हो। लागत व्यवस्थापन र बजारको अवस्थालाई मध्यनजर गर्दै कम्पनीले मूल्य समायोजन गरेको बताइएको छ ।

नेपालमा कस्तो पर्ला प्रभाव ?

नेपालमा टाटा कमर्सियल गाडीहरूको आधिकारिक वितरकले भारतबाट सवारी आयात गर्ने भएकाले भारतीय बजारमा भएको मूल्यवृद्धिको असर नेपाली बजारमा पनि देखिन सक्ने अनुमान गरिएको छ । यद्यपि नेपालका लागि नयाँ मूल्य सूचीबारे आधिकारिक घोषणा भने भइसकेको छैन ।

हालै नेपाल सरकारले पनि कर संरचनामा विभिन्न परिवर्तन गरेको सन्दर्भमा भारतबाट आयात हुने सवारीसाधनको मूल्यमा थप समायोजन हुन सक्ने सम्भावना रहेको अटो बजारका जानकारहरू बताउँछन् ।

यदि भारतीय एक्स–फ्याक्ट्री मूल्य बढेमा त्यसको प्रत्यक्ष असर नेपालमा आयात लागतमा पर्ने भएकाले आगामी दिनमा टाटा ट्रक, टिपर, बस तथा अन्य कमर्सियल सवारीको मूल्य पनि बढ्न सक्ने सम्भावना रहेको छ ।

यद्यपि नेपाली ग्राहकका लागि लागू हुने अन्तिम मूल्यबारे आधिकारिक जानकारी भने नेपालस्थित आधिकारिक वितरकले नयाँ मूल्य सूची सार्वजनिक गरेपछि मात्र स्पष्ट हुनेछ ।