बीएआईसी र आर्कफक्सको बिक्री सञ्जाल पोखरामा विस्तार

काठमाडौँ । बीएआईसी र यसको विद्युतीय सवारी ब्रान्ड आर्कफक्सको संयुक्त शोरुम पोखराको अमरसिंह चोकमा सञ्चालनमा आएको छ । नेपालका लागि दुवै ब्रान्डको आधिकारिक आयातकर्ता तथा वितरक लक्ष्मी मोटर हब प्रालिले पोखरा र गण्डकी प्रदेशका ग्राहकलाई लक्षित गर्दै शोरुम सञ्चालनमा ल्याएको हो ।

नयाँ शोरुमबाट ग्राहकले दुवै ब्रान्डका गाडी अवलोकन तथा खरिद गर्न सक्नेछन् । कम्पनीका अनुसार गाडीको प्रविधि, विशेषता र खरिद प्रक्रियाबारे जानकारी तथा परामर्श पनि उपलब्ध हुनेछ । शोरुममा बीएआईसीको बीजे३०ई हाइब्रिड एसयूभी र आर्कफक्सको टी१ इलेक्ट्रिक कार उपलब्ध छन् ।

बीजे३०ईको मूल्य १ करोड २५ लाख ९६ हजार रुपैयाँ तोकिएको छ । फोर ह्विल ड्राइभ प्रणाली भएको यो एसयूभीको पावरट्रेनले ६८५ एनएम टर्क उत्पादन गर्ने कम्पनीले जनाएको छ । यसले शून्यदेखि १०० किलोमिटर प्रतिघण्टाको गति ६.९ सेकेन्डमा हासिल गर्ने र प्रतिलिटर २० किलोमिटर माइलेज दिने कम्पनीको दाबी छ । यसमा हिउँ, बालुवा, हिलो र पानी भएका बाटोका लागि छुट्टाछुट्टै ड्राइभिङ मोड दिइएको छ ।

आर्कफक्स टी१ को एलभी३ भेरियन्टको मूल्य ३७ लाख ९६ हजार रुपैयाँ छ । यसमा ७० किलोवाटको मोटर र ४२.३ किलोवाट आवर क्षमताको ब्याट्री जडान गरिएको छ । एकपटकको चार्जमा ३१० किलोमिटरसम्म रेन्ज दिने कम्पनीको दाबी छ । सीएएलबीको लिथियम आइरन फस्फेट ब्याट्री प्रयोग गरिएको यो कारमा इको, स्पोर्ट्स, कम्फर्ट र पर्सनलाइज्ड ड्राइभिङ मोड छन् ।

उद्घाटन कार्यक्रममा लक्ष्मी ग्रुपका अध्यक्ष गणेशबहादुर श्रेष्ठले नयाँ शोरुमले गण्डकी प्रदेशका ग्राहकलाई दुवै ब्रान्डका सवारी र प्रविधिसम्म पहुँच बढाउने बताए । कार्यकारी निर्देशक सुनिल श्रेष्ठले पोखराका ग्राहकलाई गाडी खरिद र बिक्रीपछिको सेवा एउटै स्थानबाट उपलब्ध गराउने उद्देश्य रहेको उल्लेख गरे ।