नाइमा एक्स्पोमा देखियो शक्तिशाली हाइब्रिड एसयूभी ‘बीजे–३० ई’
काठमाडौँ । नेपाली बजारमा विद्युतीय सवारीको चहलपहल बढिरहेका बेला पेट्रोल इन्जिनको सहजता र विद्युतीय मोटरको शक्ति एउटै गाडीमा खोज्ने ग्राहकका लागि नयाँ विकल्प थपिएको छ । सहरी प्रयोगसँगै अप्ठ्यारो बाटोमा पनि चलाउन सकिने गरी तयार पारिएको नयाँ हाइब्रिड एसयूभीले नाइमा मोबिलिटी एक्स्पोमा प्रवेश पाएको हो ।
नेपालका लागि बी ए आई सीको आधिकारिक बिक्रेता लक्ष्मी ई–मोबिलिटीले ‘बीजे–३० ई’ सार्वजनिक गरेको छ । फरक देखिने अफरोड बनोट र शक्तिशाली हाइब्रिड प्रणाली यसको प्रमुख आकर्षण हो ।
गाडीमा १.५ लिटर टर्बो पेट्रोल इन्जिनसँगै दुईवटा विद्युतीय मोटर जडान गरिएको छ । यो संयोजनले कुल चार सय नौ हर्सपावर शक्ति र छ सय ८५ न्युटन मिटर टर्क उत्पादन गर्ने कम्पनीले जनाएको छ ।
बीजे–३० ईमा कम्पनीको ‘म्याजिक कोर डीएचईभी’ हाइब्रिड प्रणाली प्रयोग गरिएको छ । आवश्यकता र सडकको अवस्थाअनुसार पेट्रोल इन्जिन तथा विद्युतीय मोटरको शक्ति उपयोग गर्ने यो प्रणालीले दैनिक सहरी यात्रा र लामो दूरी दुवैलाई सहज बनाउने दाबी गरिएको छ ।
नेपालका उकालो, कच्ची तथा असमान सडकलाई ध्यानमा राख्दा यसको दुई सय १५ मिलिमिटर ग्राउन्ड क्लियरेन्स उपयोगी बन्न सक्छ । विभिन्न ड्राइभिङ मोड र मजबुत बडी संरचनाले सामान्य सडकबाहिरको यात्रामा पनि चालकलाई थप आत्मविश्वास दिने कम्पनीको भनाइ छ ।
भित्र १०.२५ इन्चको डिजिटल इन्स्टुमेन्ट क्लस्टर र १४.६ इन्चको इन्फोटेनमेन्ट पर्दा दिइएको छ । आधुनिक कनेक्टिभिटी सुविधा र फराकिलो केबिनले यसलाई प्रविधि तथा व्यावहारिकता दुवै खोज्ने ग्राहकतर्फ लक्षित गरेको देखिन्छ ।
नेपालमा पूर्ण विद्युतीय गाडीको बजार तीव्र रूपमा विस्तार भइरहे पनि लामो यात्रा, चार्जिङ पूर्वाधार र दुर्गम सडकका कारण हाइब्रिड एसयूभीप्रतिको चासो पनि बढ्दो छ । यस्तो अवस्थामा बीजे–३० ईले शक्तिशाली क्षमता, अफरोड बनोट र हाइब्रिड प्रविधिलाई एउटै विकल्पमा समेट्ने प्रयास गरेको छ ।
बी ए आई सी चीनका ठूला सरकारी स्वामित्वका अटोमोबाइल समूहमध्ये एक हो । कम्पनीले एसयूभी, अफरोड तथा विद्युतीय सवारी उत्पादन गर्दै आएको छ । नेपाली बजारका लागि बीजे–३० ईको मूल्य भने कम्पनीले १ करोड १९ लाख ९६ हजार रुपैयाँ कायम गरेको छ ।
