रसुवा बाढीमा हराएका ३३८ मालवाहक सवारीको विवरण विभागमा

काठमाडौं । रसुवाको टिमुरे क्षेत्रमा भदौ १० गते आएको बाढीको करिब एक महिनापछि नेपाल ट्रक यातायात व्यवसायी महासंघले ३३८ वटा ट्रक तथा कन्टेनर सम्पर्कविहीन रहेको प्रारम्भिक विवरण यातायात व्यवस्था विभागमा बुझाएको छ । ती सवारीसँग सम्बन्धित ४४१ चालक, सहचालक तथा व्यवसायी सम्पर्कमा नरहेको महासंघको दाबी छ । यद्यपि उक्त विवरण सरकारी निकायबाट अन्तिम प्रमाणीकरण हुन बाँकी छ ।

यातायात व्यवस्था विभागले सार्वजनिक यातायात क्षेत्रमा भएको मानवीय तथा भौतिक क्षति संकलन गर्न असोज २ गते सात दिनभित्र विवरण उपलब्ध गराउन सरोकारवाला निकायलाई आग्रह गरेको थियो । त्यसपछि महासंघले आफ्ना सदस्य संघ, समिति तथा कम्पनीबाट प्राप्त विवरण संकलन गरी असोज ५ गते विभागमा पठाएको हो । विभागले क्षतिको मूल्याङ्कन, क्षतिपूर्तिको आधार र थप सुझावसहित प्रतिवेदन तयार गर्न समिति गठन गरेको छ ।

महासंघको सूचीअनुसार नेपाल ट्रक कन्टेनर ढुवानी सेवा प्रालि, लोकन्थलीका मात्रै २१७ सवारी तथा २५१ व्यक्ति सम्पर्कविहीन छन् । नारायणी यातायात व्यवसायी संघ, हेटौँडाका ५८ सवारी र ७८ जना तथा तराई यातायात व्यवसायी संघ, सिमराका २१ सवारी र ३५ जना सूचीमा समेटिएका छन् ।

त्यस्तै ट्रक यातायात व्यवसायी संघ नेपाल, बल्खुका १० सवारी र २० जना, गण्डकी ट्रक व्यवसायी संघ, पोखराका २१ सवारी र ३४ जना तथा पश्चिमाञ्चल यातायात व्यवसायी समिति, बुटवलका ११ सवारी र २२ जना सम्पर्कविहीन रहेको विवरण छ । संस्थागत रूपमा उल्लेख गरिएका यी संख्या जोड्दा सवारीको कुल संख्या ३३८ नै हुन्छ, तर व्यक्तिको योग ४४० मात्र देखिन्छ । महासंघले समग्र संख्या भने ४४१ उल्लेख गरेको छ ।

यसअघि बाढीबाट प्रभावित सवारीसाधनको संख्याबारे विभिन्न संस्थाबाट फरक विवरण सार्वजनिक भएका थिए । कतिपय प्रारम्भिक विवरणमा १९१ सवारी प्रभावित भएको उल्लेख थियो भने अन्य विवरणमा ४०० भन्दा बढी कन्टेनर बगेको दाबी गरिएको थियो । पछिल्लो ३३८ सवारीको विवरण पनि महासंघका सदस्य संस्थाबाट संकलित प्रारम्भिक सूची भएकाले यसलाई अन्तिम सरकारी तथ्याङ्क मानिएको छैन ।

अब सवारीको दर्ता नम्बर, स्वामित्व, क्षतिको अवस्था तथा सम्पर्कविहीन भनिएका व्यक्तिको पहिचान अन्य सरकारी विवरणसँग भिडाएर यकिन गर्नुपर्नेछ । एउटै सवारी वा व्यक्तिको विवरण दोहोरिएको छ कि छैन भन्ने प्रमाणीकरणपछि मात्रै वास्तविक क्षति, बीमा दाबी, राहत तथा क्षतिपूर्तिको आधार स्पष्ट हुने देखिन्छ । महासंघले थप विवरण आउने क्रम जारी रहेकाले सूची फेरिन सक्ने जनाएको छ ।