उत्पादनभन्दा माग धेरै, नयाँ ब्लेड ब्याट्री नै बन्यो बीवाईडीको चुनौती

काठमाडौं । तीव्र गतिमा नयाँ प्रविधि र मोडल सार्वजनिक गरिरहेको एउटा प्रमुख चिनियाँ अटोमोबाइल कम्पनीलाई अहिले मागको कमीभन्दा आफ्नै उत्पादन क्षमताले बढी पिरोल्न थालेको छ । विदेशी बजारमा गाडीको माग असाधारण रूपमा बढिरहँदा नयाँ पुस्ताको ब्याट्री पर्याप्त उत्पादन गर्न नसक्नु कम्पनीको बिक्री विस्तारमा मुख्य अवरोध बनेको हो ।

चिनियाँ अटोमोबाइल कम्पनी बीवाईडीले सन् २०२६ को पहिलो ६ महिनामा १८ लाख आठ हजार पाँच सय वटा न्यु इनर्जी भेहिकल बिक्री गरेको छ । यो संख्या अघिल्लो वर्षको समान अवधिको तुलनामा १५ दशमलव ७२ प्रतिशत कम हो ।

बिक्री घट्नुको प्रमुख कारण दोस्रो पुस्ताको ब्लेड ब्याट्रीको अपर्याप्त उत्पादन क्षमता रहेको बीवाईडीका अध्यक्ष तथा प्रेसिडेन्ट वाङ चुआनफुले बताएका छन् । उनका अनुसार नयाँ ब्याट्रीको उत्पादन लाइन अझै पूर्ण क्षमतामा पुगिसकेको छैन । त्यसैले यस वर्ष कम्पनीले कति गाडी बिक्री गर्न सक्छ भन्ने विषय ब्याट्री उत्पादनमै निर्भर हुनेछ ।

बीवाईडीले नयाँ ब्याट्री उत्पादनका लागि आफ्ना लाइनहरू स्तरोन्नति गरिरहेको छ । पछिल्ला छ महिनामा उत्पादन क्षमता बढाइए पनि गाडीको मागअनुसार ब्याट्री उपलब्ध गराउन अझै कठिन भइरहेको कम्पनीको फ्ल्यास चार्जिङ व्यवसायसँग सम्बन्धित कर्मचारीले बताएका छन् ।

बिक्रीमा आएको गिरावट कम्पनीको वित्तीय नतिजामा पनि देखिएको छ । बीवाईडीले पहिलो ६ महिनामा तीन खर्ब ४४ अर्ब ८१ करोड ५० लाख युआन आम्दानी गरेको छ । यो अघिल्लो वर्षको तुलनामा ७ दशमलव १३ प्रतिशत कम हो ।

कम्पनीको खुद नाफा २० दशमलव ५४ प्रतिशत घटेर १२ अर्ब ३२ करोड युआनमा सीमित भएको छ । विनिमय दरमा आएको उतारचढाव र त्यसबाट भएको विदेशी मुद्रा घाटाले नाफामा छोटो अवधिको दबाब सिर्जना गरेको बीवाईडीको भनाइ छ ।

यद्यपि कम्पनीको मुख्य व्यवसायको नाफा कमाउने क्षमता कमजोर नभएको दाबी गरिएको छ । दोस्रो त्रैमासिकमा बीवाईडीको खुद नाफा अघिल्लो वर्षको समान अवधिको तुलनामा ३० प्रतिशत बढेको छ भने ग्रस मार्जिन एक वर्षयताकै उच्च १८ दशमलव ९ प्रतिशत पुगेको छ ।

पहिलो छ महिनामा अटोमोबाइल तथा त्यससँग सम्बन्धित व्यवसायबाट बीवाईडीले दुई खर्ब ७५ अर्ब ३४ करोड युआन आम्दानी गरेको छ । यो कम्पनीको कुल आम्दानीको करिब ८० प्रतिशत हो । इलेक्ट्रोनिक्स तथा अन्य व्यवसायबाट भने ६९ अर्ब ४० करोड ५० लाख युआन आम्दानी भएको छ ।

घरेलु बिक्री र नाफामा दबाब देखिए पनि विदेशी बजार बीवाईडीका लागि बलियो आधार बनेको छ । चाइना एसोसिएसन अफ अटोमोबाइल म्यानुफ्याक्चरर्सका अनुसार कम्पनीले पहिलो छ महिनामै सात लाख ९२ हजार गाडी निर्यात गरेको छ । यो अघिल्लो वर्षको तुलनामा ६७ दशमलव ८ प्रतिशतको वृद्धि हो ।

विदेश पठाइएका गाडीले बीवाईडीको कुल बिक्रीको झन्डै ४४ प्रतिशत हिस्सा ओगटेका छन् । यही गति कायम रहे वार्षिक १५ लाख गाडी विदेशमा बिक्री गर्ने लक्ष्यसमेत पार गर्न सकिने अध्यक्ष वाङले बताएका छन् ।

कम्पनीका प्रिमियम ब्रान्ड डेन्जा, फाङ चेङ बाओ र याङवाङको बिक्री पनि ६१ प्रतिशत बढेर करिब दुई लाख २८ हजार पुगेको छ । यी तीन ब्रान्डले बीवाईडीको कुल बिक्रीमा १२ दशमलव ६ प्रतिशत योगदान दिएका छन् ।

चीनभित्र भने प्रतिस्पर्धा थप कडा हुँदै गएको छ । पहिलो छ महिनामा बीवाईडीले घरेलु बजारमा करिब १० लाख १६ हजार गाडी बिक्री गर्दा गिली अटोको बिक्री करिब नौ लाख ५० हजार पुगेको छ । गिलीको तथ्याङ्कमा पेट्रोलियम इन्जिन भएका गाडीसमेत समावेश भए पनि दुई कम्पनीबीचको अन्तर उल्लेख्य रूपमा साँघुरिएको छ ।

नेपालमा बीवाईडीका विभिन्न इलेक्ट्रिक मोडलको बलियो उपस्थिति रहेकाले नयाँ ब्लेड ब्याट्रीको उत्पादन अवस्था यहाँका ग्राहक र वितरकका लागि पनि चासोको विषय हो । ब्याट्री आपूर्ति लामो समयसम्म सहज हुन नसके नयाँ मोडलको उत्पादन, बुकिङपछिको डेलिभरी र अन्तर्राष्ट्रिय बजारका लागि छुट्याइने गाडीको संख्यामा प्रभाव पर्न सक्छ । यद्यपि नेपाली बजारको आपूर्ति प्रभावित भएको विषयमा कम्पनीले कुनै औपचारिक जानकारी दिएको छैन ।

समग्रमा बीवाईडीसँग विदेशी बजारको बढ्दो माग र प्रिमियम ब्रान्डको विस्तारजस्ता सकारात्मक आधार छन् । तर ती अवसरलाई वास्तविक बिक्रीमा बदल्न कम्पनीले दोस्रो पुस्ताको ब्लेड ब्याट्री उत्पादनलाई छिटो पूर्ण क्षमतामा पुर्‍याउनुपर्ने देखिएको छ ।