बीवाईडीको विश्व विस्तारमा भू–राजनीति मुख्य चुनौती
काठमाडौं । गाडी बनाउने क्षमता हुँदैमा हरेक बजारमा बिक्री विस्तार गर्न सहज हुँदैन । बीवाईडीकी कार्यकारी उपाध्यक्ष स्टेला लीले कम्पनीको अन्तर्राष्ट्रिय विस्तारमा भू–राजनीति सबैभन्दा ठूलो चुनौती रहेको बताएकी छन् ।
अक्टोबर ८ मा सिंगापुरमा आयोजित
मिल्केन इन्स्टिच्युट एसिया समिटमा उनले लगानीका लागि स्पष्टता र स्थिरता आवश्यक
हुने बताइन् । देशहरूबीचको राजनीतिक सम्बन्धले व्यापारको दिशा अनिश्चित बनाउँदा
कम्पनीलाई योजना कार्यान्वयन गर्न कठिन हुने उनको भनाइ छ ।
यही कारण बीवाईडीले तत्काल अमेरिकामा
यात्रुवाहक गाडी नबेच्ने निर्णय गरेको छ । लामो समयदेखि अमेरिकी बजारमा उपस्थित भए
पनि यात्रुवाहक गाडीको व्यवसाय विस्तारका लागि पर्याप्त स्पष्टता र स्थिरता नभएको
लीले बताइन् ।
यस निर्णयबाट बुझिने कुरा के हो भने
ईभीको विश्वव्यापी प्रतिस्पर्धा उत्पादन र प्रविधिमा मात्र सीमित छैन । कम्पनीले
कहाँ लगानी गर्ने र कुन बजारमा प्रवेश गर्ने भन्ने निर्णयमा राजनीतिक तथा
व्यापारिक वातावरण पनि निर्णायक बन्न सक्छ ।
नेपालका लागि यहाँबाट निकाल्न सकिने
अर्थ नीतिगत स्थिरताको महत्व हो । विदेशी उत्पादकलाई बजार विस्तारको योजना बनाउन र
आयातकर्तालाई दीर्घकालीन व्यवसाय अघि बढाउन अनुमान गर्न सकिने वातावरण आवश्यक
हुन्छ ।
स्रोत : रोयटर्स ।
