बीवाइडीको नयाँ एम९ सार्वजनिक, एकपटक चार्जमा ११८ किमि र कुल रेन्ज १,१०५ किमि

काठमाडौं । चिनियाँ अटो निर्माता बीवाइडीले राइड-हेलिङ सेवालाई लक्षित गर्दै नयाँ लिङहुई M9 प्लग-इन हाइब्रिड एमपीभी चीनमा सार्वजनिक गरेको छ । यस गाडीको सुरुआती मूल्य १ लाख ८८ हजार ८०० युआन (करिब २७ हजार ७७० अमेरिकी डलर) तोकिएको छ ।

लिङहुई M9 बीवाइडीको Xia एमपीभीमा आधारित मोडल हो, जसलाई चीनबाहिर BYD M9 नामबाट बिक्री गरिन्छ । राइड-हेलिङ प्रयोगलाई ध्यानमा राख्दै यसमा ठूलो क्रोम ग्रिल, पावर स्लाइडिङ डोर, १८ इन्चका ह्विल र नयाँ डिजाइनको रियर लाइट दिइएको छ ।

५,२०० मिमी लम्बाइ र ३,०४५ मिमी ह्विलबेस भएको यो एमपीभीमा २+२+३ सिट लेआउटका साथ ७ जना यात्रु अट्ने व्यवस्था गरिएको छ । भित्र १२.८ इन्च वा १५.६ इन्चको टचस्क्रिन, १२.३ इन्च डिजिटल इन्स्ट्रुमेन्ट क्लस्टर, डिलिङ्क १०० इन्फोटेनमेन्ट सिस्टम, फोर-जोन भ्वाइस असिस्टेन्ट र ह्वावे हाईकार सपोर्ट उपलब्ध छ ।

उच्च भेरियन्टमा अगाडिका तथा दोस्रो पङ्क्तिका सिटमा हिटिङ, भेन्टिलेसन र मसाज फङ्सन, फोल्डिङ टेबल, १२ स्पिकर अडियो सिस्टम तथा कन्टिन्युअस ड्याम्पिङ सस्पेन्सन जस्ता प्रिमियम फिचर समावेश गरिएको छ ।

पावरट्रेनतर्फ यसमा डीएम-आई प्लग-इन हाइब्रिड सिस्टम प्रयोग गरिएको छ । यसमा १.५ लिटर टर्बो पेट्रोल इन्जिनले १४७ एचपी र इलेक्ट्रिक मोटरले २६८ एचपी शक्ति उत्पादन गर्छ । गाडीले ० देखि १०० किमि प्रतिघण्टा गति ८.९ सेकेन्डमा पूरा गर्न सक्छ ।

२६.६ किलोवाट-आवर एलएफपी ब्याट्रीको सहायताले यो एमपीभीले एकपटक चार्जमा ११८ किलोमिटरसम्म शुद्ध विद्युतीय यात्रा गर्न सक्छ । ५० लिटरको इन्धन ट्याङ्कसँग यसको संयुक्त ड्राइभिङ रेन्ज १,१०५ किलोमिटरसम्म रहेको कम्पनीले जनाएको छ ।

लिङहुई M9 को मूल्य १ लाख ८८ हजार ८०० देखि १ लाख ९९ हजार ८०० युआनसम्म राखिएको छ । कम्पनीले यसमा ५ वर्षसम्मको फाइनान्स सुविधा, पहिलो निजी ग्राहकका लागि विद्युतीय कम्पोनेन्टमा लाइफटाइम वारेन्टी, सम्पूर्ण गाडीमा ६ वर्ष वा १ लाख ५० हजार किलोमिटर तथा व्यावसायिक प्रयोगका विद्युतीय कम्पोनेन्टमा ६ वर्ष वा ६ लाख किलोमिटरसम्मको वारेन्टी उपलब्ध गराएको छ ।