चेरीको नयाँ उडान: हरेक १६ सेकेन्डमा एक गाडी विदेशतर्फ, एक महिनामै दुई लाख निर्यात
काठमाडौं । विश्व बजारमा चिनियाँ गाडी ब्रान्डहरूको उपस्थिति तीव्र रूपमा बढिरहेका बेला एउटा कम्पनीले जुलाईमा बनाएको नयाँ आँकडाले प्रतिस्पर्धाको दिशा नै फेरिने संकेत दिएको छ । खासगरी युरोप, अफ्रिका र उदीयमान बजारमा विस्तार गरिरहेको यो ब्रान्डको गति अहिले केवल बिक्री वृद्धिमा सीमित छैन ।
चेरी समूहले जुलाई महिनामा दुई लाख
दुई हजार पाँच सय ३३ वटा गाडी विदेश निर्यात गरेको छ । एकै महिनामा दुई लाखभन्दा
बढी गाडी निर्यात गर्ने चेरी पहिलो चिनियाँ अटोमोबाइल कम्पनी बनेको हो ।
कम्पनीका अनुसार यो संख्या अघिल्लो
वर्षको जुलाईको तुलनामा ७० दशमलव १ प्रतिशतले बढी हो । लगातार पाँचौं महिनासम्म
चेरीले चिनियाँ अटोमोबाइल कम्पनीमध्ये मासिक निर्यातको नयाँ कीर्तिमान कायम गरेको
जनाएको छ । यस हिसाबले औसतमा हरेक १६ सेकेन्डमा एउटा चेरी गाडी विदेश बजारतर्फ
पठाइएको कम्पनीको दाबी छ ।
जुलाईमा चेरी समूहले विश्वभर दुई लाख
७६ हजार आठ सय २० वटा गाडी बिक्री गरेको थियो । यो अघिल्लो वर्षको सोही महिनाभन्दा
२३ दशमलव ३ प्रतिशतले बढी हो । यसमध्ये नयाँ ऊर्जा सवारीसाधनको बिक्री एक लाख २९
हजार ६७ पुगेको छ, जुन वार्षिक आधारमा ९७ दशमलव ५ प्रतिशतको वृद्धि हो ।
तर, यो वृद्धिको मुख्य आधार घरेलु
बजार नभई विदेश बनेको देखिन्छ । जुलाईको कुल बिक्रीमा निर्यातको हिस्सा झन्डै ७३
प्रतिशत पुगेको छ । एक वर्षअघि यस्तो हिस्सा ५३ प्रतिशत मात्र थियो । यसले चेरीको
व्यापारिक विस्तारमा अन्तर्राष्ट्रिय बजारको भूमिका कति निर्णायक बन्दै गएको छ
भन्ने देखाउँछ ।
जनवरीदेखि जुलाईसम्म चेरी समूहले १६
लाख ३४ हजार तीन सय ५३ वटा गाडी बिक्री गरेको छ । यस अवधिमा विदेश पठाइएका गाडीको
संख्या ११ लाख ४६ हजार तीन सय ५० पुगेको छ । सो निर्यात अघिल्लो वर्षको तुलनामा ७१
दशमलव २ प्रतिशतले बढेको हो ।
युरोप चेरीको सबैभन्दा तीव्र गतिमा
विस्तार भइरहेको क्षेत्रमध्ये एक बनेको छ । जनवरीदेखि जुनसम्म कम्पनीले युरोपका २४
देशमा एक लाख ७४ हजार गाडी बिक्री गरेको जनाएको छ । त्यसमध्ये नयाँ ऊर्जा
सवारीसाधनको संख्या ८६ हजार रहेको छ ।
चेरीले केवल गाडी पठाउने रणनीतिमा
मात्र नअडिई विदेशमै उत्पादन र स्थानीय रोजगारीसँग जोडिने बाटो पनि अपनाएको छ ।
दक्षिण अफ्रिकामा निसानबाट अधिग्रहण गरिएको रोज्लिन कारखाना जुलाई ३ देखि
सञ्चालनमा आएको छ । कम्पनीले त्यहाँका सबै ६९२ कर्मचारीलाई निरन्तरता दिएको र
आपूर्ति शृंखलामा करिब तीन हजार रोजगारीलाई सहयोग पुग्ने अपेक्षा गरेको छ ।
नेपालका लागि पनि चेरीको यो विस्तार
चासोको विषय हो । यहाँ चेरी, ओमोडा र आईकौरजस्ता चिनियाँ ब्रान्डप्रति बढ्दो रुचि
देखिएको छ । विश्व बजारमा उत्पादन, प्रविधि, आपूर्ति शृंखला र बिक्री नेटवर्क
बलियो बनाउँदै गएको चेरीले भविष्यमा नेपालमा मोडलको विकल्प, सेवा पूर्वाधार र
मूल्य प्रतिस्पर्धामा समेत प्रभाव पार्न सक्छ ।
जुलाईसम्म चेरी समूहका विश्वभर दुई
करोड १६ लाखभन्दा बढी ग्राहक पुगेका छन् । तीमध्ये झन्डै ७० लाख ग्राहक विदेशमा
रहेका छन् । विश्व बजारमा बीस लाख होइन, दुई करोड गाडी बिक्रीको सीमा पार गर्नु
कम्पनीका लागि अर्को महत्त्वपूर्ण उपलब्धि बनेको छ ।
