स्कुटरमा सीमित नरहने हिरो, सन् २०२७ बाट विद्युतीय मोटरसाइकल ल्याउने

काठमाडौँ । विद्युतीय स्कुटरमा आफ्नो उपस्थिति विस्तार गरिरहेको भारतीय दुईपाङ्ग्रे उत्पादक अब मोटरसाइकल बजारमा पनि नयाँ अध्याय सुरु गर्ने तयारीमा जुटेको छ । सहरी यात्रादेखि रोमाञ्चक र उच्च क्षमताको सवारी खोज्ने ग्राहकसम्मलाई लक्षित गर्दै कम्पनीले फरक चरित्रका उत्पादन विकास गरिरहेको छ ।

हिरो मोटोकर्पले आफ्नो पहिलो विद्युतीय मोटरसाइकल सन् २०२७ मा सार्वजनिक गर्ने तयारी गरेको हो । कम्पनीले यस वर्ष मोटरसाइकल सार्वजनिक नहुने स्पष्ट पार्दै अर्को वर्षदेखि नयाँ उत्पादन बजारमा ल्याउने संकेत दिएको छ ।

कम्पनीका प्रमुख कार्यकारी अधिकृत हर्षवर्धन चितालेले लगानीकर्तासँगको कुराकानीमा विद्युतीय मोटरसाइकलसम्बन्धी काम योजनाअनुसार अघि बढिरहेको बताएका छन् । यसबारे थप जानकारी आगामी महिनामा सार्वजनिक गरिने उनको भनाइ छ ।

हिरोले हाल दुईवटा छुट्टाछुट्टै आधार संरचनामा विद्युतीय मोटरसाइकल विकास गरिरहेको छ । सन् २०२५ को इटालीमा आयोजित अन्तर्राष्ट्रिय मोटरसाइकल प्रदर्शनीमा देखाइएका यी अवधारणामध्ये पहिलोको सांकेतिक नाम ‘युबेक्स’ राखिएको छ ।

युबेक्स सहरी प्रयोगलाई केन्द्रमा राखेर तयार भइरहेको खुला बनोटको मोटरसाइकल हो । दैनिक यात्रामा व्यावहारिक हुनुका साथै विद्युतीय मोटरसाइकलको तीव्र गति र रोमाञ्चक अनुभव दिनेतर्फ यसको विकास केन्द्रित छ ।

अर्को ‘भीएक्सजेड’ आधार संरचना भने अमेरिकी कम्पनी जिरो मोटरसाइकल्ससँगको सहकार्यमा विकास भइरहेको छ । यो उच्च क्षमता, लामो यात्रा र साहसिक प्रयोगलाई ध्यानमा राखिएको एड्भेन्चर प्रकृतिको मोटरसाइकल हुने बताइएको छ ।

कम्पनीका अनुसार विद्युतीय स्कुटरबाट प्राप्त अनुभव प्रयोग गरिए पनि मोटरसाइकलका लागि पूर्णतः नयाँ आधार संरचना तयार गरिएको हो । मोटरसाइकल प्रयोगकर्ताको अपेक्षाअनुसार गति, उकालो चढ्ने क्षमता, सञ्चालन सहजता र एकपटकको चार्जमा तय गर्ने दूरीलाई प्राथमिकता दिइएको छ ।

हिरोले विद्युतीय मोटरसाइकलसँगै भिडा ब्रान्डअन्तर्गतका स्कुटरको उत्पादन पनि तीव्र रूपमा विस्तार गर्दै छ । कम्पनीले मासिक विद्युतीय दुईपाङ्ग्रे उत्पादन क्षमता १५ हजारबाट बढाएर चालु आर्थिक वर्षमा ४५ हजार पुर्‍याउने योजना बनाएको छ । बढ्दो माग सम्बोधन गर्न भिडा स्कुटरका थप संस्करणसमेत बजारमा ल्याइएका छन् ।

नेपालमा हिरोका विद्युतीय स्कुटर औपचारिक रूपमा प्रवेश गरिसकेकाले आगामी मोटरसाइकलप्रति पनि चासो बढ्ने देखिन्छ । विशेषगरी पेट्रोल मोटरसाइकलको विकल्प खोजिरहेका सहरी युवा, दैनिक यात्रु तथा एड्भेन्चर रुचाउने ग्राहकका लागि हिरोको योजना महत्त्वपूर्ण हुन सक्छ । यद्यपि, नेपालमा यसको उपलब्धता, मूल्य र बिक्री समयबारे अहिल्यै कुनै औपचारिक जानकारी आएको छैन ।

हिरो विद्युतीय दुईपाङ्ग्रे उत्पादक एथर इनर्जीको सबैभन्दा ठूलो सेयरधनीसमेत हो । तर एथरले तत्काल विद्युतीय मोटरसाइकल बजारमा प्रवेश गर्ने योजना नरहेको बताइरहँदा हिरोले भने आफ्नै ब्रान्डबाट यो खण्डमा अघि बढ्ने बाटो रोजेको छ ।

पेट्रोल मोटरसाइकलमा दशकौँदेखि बलियो प्रभाव बनाएको हिरोको प्रवेशले विद्युतीय मोटरसाइकल बजारमा प्रतिस्पर्धा थप चर्काउने अनुमान गर्न सकिन्छ । यसको वास्तविक प्रभाव भने सन् २०२७ मा सार्वजनिक हुने मोटरसाइकलको रेन्ज, क्षमता, मूल्य र व्यावहारिकताले निर्धारण गर्नेछ ।