हेटौँडा–काठमाडौं यात्रा गर्दै हुनुहुन्छ ? फेरिएको रुट पहिले बुझ्नुहोस्
काठमाडौं । हेटौँडा र काठमाडौंको यात्रा गर्ने तयारीमा रहेका यात्रुले आफू चढ्ने गाडीको आकार र हिँड्ने समयअनुसार फरक बाटो रोज्नुपर्ने भएको छ । बाढीले मुख्य राजमार्गका संवेदनशील खण्डमा गम्भीर क्षति पुर्याएपछि सवारीको प्रकारअनुसार छुट्टाछुट्टै रुट निर्धारण गरिएको हो ।
धादिङको कृष्णभीर र परेवाभीर
क्षेत्रमा पृथ्वी राजमार्ग भासिएर यातायात पूर्ण रूपमा रोकिएपछि हेटौँडा–काठमाडौं
चल्ने सवारीसाधनलाई वैकल्पिक सडकमा मोडिएको छ । नयाँ व्यवस्थाअनुसार १०
चक्कासम्मका मालवाहक तथा ठूला यात्रुवाहक गाडी हेटौँडाबाट काठमाडौं आउँदा त्रिभुवन
राजपथ हुँदै चल्नुपर्नेछ ।
काठमाडौंबाट हेटौँडातर्फ जाने यस्ता
गाडीका लागि कान्ति राजमार्ग तोकिएको छ । यात्रुवाहक गाडीले साँझ ६ बजेभित्र
मकवानपुरको ठिङ्गनस्थित इलाका प्रहरी कार्यालयको चेकपोस्ट पार गरिसक्नुपर्ने
व्यवस्था गरिएको छ ।
तर कान्ति राजमार्गका विभिन्न स्थानमा
पहिरो जाने र सडक बन्द हुने अवस्था देखिएकाले उक्त रुट प्रयोग गर्नुअघि ट्राफिक
प्रहरीसँग पछिल्लो जानकारी लिन आग्रह गरिएको छ । ललितपुरको भट्टेडाँडास्थित पाङदुर
क्षेत्रमा पहिरोका कारण सडक अवरुद्ध भएको विवरणसमेत सार्वजनिक भएकाले पुरानो
सूचनाका आधारमा मात्र यात्रा गर्नु जोखिमपूर्ण हुन सक्छ ।
साना गाडी आउने र जाने बाटो फरक
१४ सिटभन्दा कम क्षमताका साना
यात्रुवाहक गाडीले हेटौँडातर्फ जाँदा फर्पिङ–फाखेल–कुलेखानी–भीमफेदी रुट प्रयोग
गर्नुपर्नेछ ।
हेटौँडाबाट काठमाडौं आउने साना गाडीका
लागि भीमफेदी–कुलेखानी–सिस्नेरी–दक्षिणकाली रुट तोकिएको छ । एउटै साँघुरो सडकमा
दुवैतर्फको सवारी चाप नबढोस् भनेर आउने र जाने बाटो अलग गरिएको हो ।
मकवानपुरको त्रिखण्डीनजिक रहेको
बेलिब्रिजको भारवहन क्षमता कमजोर देखिएकाले इन्धन तथा भारी मालवाहक गाडीलाई पुलबाट
चलाउन रोक लगाइएको छ । यस्ता गाडीले पुलको छेउमा तयार गरिएको डाइभर्सन प्रयोग
गर्नुपर्नेछ ।
कृष्णभीर र परेवाभीरमा पूर्ण अवरोध
बेनिघाट रोराङ गाउँपालिका–७ स्थित
कृष्णभीरमा त्रिशूली नदीले सडकको तल्लो भाग कटान गरेपछि पृथ्वी राजमार्ग भासिएको छ
। उक्त स्थानमा सवारीसाधन सञ्चालन मात्र होइन, पैदल आवतजावतसमेत कठिन बनेको छ ।
गजुरी गाउँपालिका–२ को परेवाभीरमा पनि
बाढीले सडकको तल्लो भाग भत्काएको छ । यी दुई स्थानमा भएको क्षतिका कारण काठमाडौं
भित्रिने तथा बाहिरिने यात्रुवाहक र मालवाहक गाडी वैकल्पिक मार्गमा मोडिएका हुन् ।
बीपी राजमार्गमा राति गाडी चलाउन रोक
सम्भावित बाढीको जोखिमका कारण बीपी
राजमार्गको खुर्कोट–नेपालथोक–कटुन्जेबेँसी खण्डमा साँझ ६ बजेदेखि बिहान ४ बजेसम्म
सबै प्रकारका सवारीसाधन सञ्चालनमा रोक लगाइएको छ । बिहान ४ बजेदेखि साँझ ६ बजेसम्म
मात्र उक्त खण्डमा गाडी चलाउन पाइनेछ ।
टोखा–छहरे सडकमा पनि राति १० बजेदेखि
बिहान ५ बजेसम्म अत्यावश्यक सेवाबाहेक सार्वजनिक तथा निजी सवारीसाधन सञ्चालन गर्न
रोक लगाइएको छ ।
रसुवागढी जोड्ने मुख्य सडक बन्द
त्रिशूली नदीको कटानले
त्रिशूली–मैलुङ–स्याफ्रुबेँसी सडक र पासाङ ल्हामु राजमार्गका विभिन्न भागमा क्षति
पुगेपछि रसुवागढी जोड्ने मुख्य मार्ग पूर्ण रूपमा अवरुद्ध छ ।
स्याफ्रुबेँसी पुग्न
टोखा–छहरे–विदुर–नुवाकोट
दरबार–फलाँटे–चोकदे–लच्याङ–सरमथली–पार्च्याङ–भोर्ले–कालिकास्थान–स्याउबारी–राम्चे–धुन्चे
रुट प्रयोग गर्न सकिने जनाइएको छ । तर यो लामो, साँघुरो र अधिकांश स्थानमा कच्ची
सडक भएकाले ठूला तथा भारी गाडीका लागि सहज छैन ।
बाढी र पहिरोका कारण सडक खुल्ने तथा बन्द हुने अवस्था छोटो समयमै परिवर्तन हुन सक्ने भएकाले यात्रा सुरु गर्नुअघि नजिकको प्रहरी कार्यालय वा ट्राफिक प्रहरीसँग पछिल्लो जानकारी लिन आग्रह गरिएको छ । अत्यावश्यक कामबाहेक यात्रा नगर्न, पालो मिचेर गाडी नचलाउन र जोखिमयुक्त स्थानमा ओभरटेक नगर्नसमेत प्रहरीले अनुरोध गरेको छ ।
