लागत घटाउन होन्डाको नयाँ रणनीति, टाटा टेक्नोलोजिजसँग गाडी विकास
काठमाडौं । होन्डाले भारतीय बजारका लागि नयाँ गाडी विकास गर्न टाटा टेक्नोलोजिजसँग सहकार्य गर्दै लागत र समय घटाउने लक्ष्य राखेको छ । रोयटर्सले सम्बन्धित स्रोतलाई उद्धृत गर्दै विकास समय आधा र लागत २० प्रतिशतसम्म घटाउने योजना रहेको जनाएको छ ।
यस सहकार्यमा
विकास भइरहेको पहिलो गाडी चार मिटरभन्दा छोटो एसयूभी हुने र सन् २०२८ मा ल्याउने
लक्ष्य रहेको रिपोर्टमा उल्लेख छ । प्रविधि र गुणस्तरको निगरानी होन्डाले गर्नेछ ।
होन्डाले
मूल्यअनुसार उपयोगी उत्पादनको छनोट पर्याप्त दिन नसकेको स्वीकार्दै भारतीय बजारका
लागि आफ्नो प्रस्ताव पुनःनिर्धारण गरिरहेको बताएको छ । कम्पनीले गुणस्तर र
मूल्यबीच सन्तुलन भएका गाडी ल्याउने जनाएको छ । तर आपूर्तिकर्ता छनोटमा जापानी र
भारतीय व्यवस्थापनबीच मतभेद भएको रिपोर्टको दाबी भने अस्वीकार गरेको छ ।
यो कदम होन्डाको बाह्य स्रोत उपयोग गर्ने व्यापक रणनीतिसँग पनि जोडिन्छ । कम्पनीले यसअघि नै भारत र चीनका स्थानीय व्यवसायको लागत प्रतिस्पर्धा र काम गर्ने गति उपयोग गर्दै गाडी विकासलाई थप प्रभावकारी बनाउने योजना सार्वजनिक गरेको थियो ।
