नेपाल आउँदै गरेको होङ्छीले चीनमा कसरी उछिन्यो रोल्स–रोयस ?

काठमाडौँ । नेपालमा पहिलोपटक प्रवेश गर्न लागेको चिनियाँ लक्जरी कार ब्रान्ड होङ्छी अहिले आफ्नै घरेलु बजारमा पनि नयाँ इतिहास रचिरहेको छ । एक समय चीनका राष्ट्रपति तथा उच्च सरकारी अधिकारीका लागि मात्र सीमित रहेको यो ब्रान्ड अहिले चीनका धनाढ्य व्यवसायी र उच्च वर्गको पहिलो रोजाइ बन्दै गएको छ । अन्तर्राष्ट्रिय सञ्चारमाध्यम निक्केई एसिया का अनुसार होङ्छीका नयाँ अल्ट्रा–लक्जरी मोडलहरूले चीनमा रोल्स–रोयस जस्ता विश्वप्रसिद्ध ब्रान्डलाई समेत कडा चुनौती दिन थालेका छन् ।

सन् १९५८ मा सरकारी स्वामित्वको एफएडब्ल्यू ग्रुप ले स्थापना गरेको होङ्छी चीनकै सबैभन्दा पुरानो यात्रुवाहक कार ब्रान्डमध्ये एक हो । चिनियाँ भाषामा यसको अर्थ ‘रातो झण्डा’ हुन्छ । सुरुवाती दशकमा यो ब्रान्डका कारहरू राष्ट्रपति, प्रधानमन्त्री तथा विदेशी राष्ट्रप्रमुखको स्वागतका लागि मात्र प्रयोग गरिन्थे । त्यसैले होङ्छीलाई चीनको राष्ट्रिय गौरवसँग जोडेर हेरिन्छ ।

सन् २०१८ पछि कम्पनीले आफ्नो रणनीति परिवर्तन गर्दै निजी ग्राहकलाई लक्षित गरी नयाँ पुस्ताका लक्जरी एसयूभी, सेडान र विद्युतीय मोडल सार्वजनिक गर्न थालेको थियो । त्यसयता होङ्छीको बिक्री तीव्र रूपमा बढेको छ । कम्पनीले अहिले विश्वकै प्रतिष्ठित लक्जरी ब्रान्डसँग प्रतिस्पर्धा गर्न गोल्डेन सनफ्लावर नामक विशेष अल्ट्रा–लक्जरी लाइनअपसमेत विकास गरेको छ ।

निक्केई एसियाका अनुसार गुओया र गुओली जस्ता मोडलले चीनको अल्ट्रा–लक्जरी बजारमा रोल्स–रोयससँग प्रत्यक्ष प्रतिस्पर्धा गरिरहेका छन् । केही ग्राहक समूहमा त होङ्छी विदेशी ब्रान्डभन्दा बढी लोकप्रिय बन्न थालेको छ । यसको मुख्य कारण चीनमा बढ्दो राष्ट्रिय गौरव र स्वदेशी ब्रान्डप्रतिको विश्वासलाई मानिएको छ ।

विश्लेषकहरूका अनुसार पहिले विदेशी लक्जरी कार चलाउनु प्रतिष्ठाको विषय मान्ने चिनियाँ धनाढ्यहरू अहिले स्वदेशी उत्पादनलाई आफ्नो पहिचानसँग जोड्न थालेका छन् । राष्ट्रपति सी जिनपिङ लगायत चीनका उच्च सरकारी अधिकारीले होङ्छी प्रयोग गर्ने भएकाले पनि यो ब्रान्डको प्रतिष्ठा झनै बलियो बनेको छ ।

होङ्छीको लोकप्रियतामा अर्को महत्वपूर्ण कारण यसको डिजाइन पनि हो । रोल्स–रोयसका पूर्व डिजाइन प्रमुख जाइल्स टेलर कम्पनीमा आबद्ध भएपछि होङ्छीका नयाँ मोडल अन्तर्राष्ट्रिय स्तरका देखिन थालेका छन् । प्रिमियम सामग्री, आधुनिक प्रविधि र उत्कृष्ट यात्राको अनुभवका कारण यसले विश्वका स्थापित लक्जरी ब्रान्डसँग प्रतिस्पर्धा गर्ने क्षमता विकास गरेको छ ।

हाल कम्पनीको चर्चित गुओया सेडानमा ३.० लिटर भी–६ र ४.० लिटर ट्विन–टर्बो भी–८ हाइब्रिड इन्जिन, आठ–स्पिड अटोमेटिक ट्रान्समिसन, हस्तनिर्मित काठ तथा प्रिमियम छालाले सजिएको केबिन उपलब्ध छ । यस्तै गुओली मोडल चीनका राष्ट्रपति प्रयोग गर्ने आधिकारिक लिमोजिनका रूपमा परिचित छ ।

नेपालमा पनि होङ्छीले चाँडै आफ्नो औपचारिक यात्रा सुरु गर्दैछ । एडभान्स्ड अटोमोबाइल ले यस ब्रान्डलाई नेपाल भित्र्याएको हो भने आगामी नाइमा नेपाल मोबिलिटी एक्स्पो २०२६ मा पहिलोपटक यसको विद्युतीय एसयूभी सार्वजनिक गरिने तयारी छ । प्रारम्भिक चरणमा ईएचएस–९ लगायतका विद्युतीय मोडल नेपाली बजारमा आउने अपेक्षा गरिएको छ । यसको सुरुआती मूल्य करिब ६० देखि ६५ लाख रुपैयाँ आसपास रहने अनुमान गरिएको छ ।

नेपालमा पछिल्ला वर्षहरूमा चिनियाँ विद्युतीय सवारीप्रतिको विश्वास उल्लेखनीय रूपमा बढिरहेको छ । बीवाइडी, जेकर, आयोन, लीपमोटर, ओमोडा र जेको जस्ता ब्रान्डले बजार विस्तार गरिरहेका बेला होङ्छीको प्रवेशले प्रिमियम विद्युतीय सवारी सेग्मेन्टमा थप प्रतिस्पर्धा सिर्जना गर्ने अपेक्षा गरिएको छ ।

विश्व अटो उद्योग अहिले विद्युतीकरण र स्मार्ट प्रविधितर्फ तीव्र रूपमा अघि बढिरहेको छ । यही परिवर्तनसँगै चीन अब केवल सस्तो वा मध्यम मूल्यका गाडी उत्पादन गर्ने देश मात्र होइन, विश्वस्तरीय अल्ट्रा–लक्जरी कार निर्माण गर्ने शक्तिका रूपमा पनि स्थापित हुँदै गएको संकेत होङ्छीको सफलताले दिएको छ । यदि यही गति कायम रह्यो भने आगामी वर्षहरूमा रोल्स–रोयस, बेन्ट्ली र मर्सिडिज–मेब्याक जस्ता परम्परागत युरोपेली ब्रान्डले चीनसहित विश्व बजारमा अझ कडा प्रतिस्पर्धा सामना गर्नुपर्ने देखिन्छ ।