जापानमा सार्वजनिक भयो नयाँ एलग्रान्ड, आराम र प्रविधामा केन्द्रित प्रिमियम मिनिभ्यान

काठमाडौँ । जापानी अटोमोबाइल निर्माता निसानले आफ्नो चर्चित प्रिमियम मिनिभ्यान एलग्रान्ड को चौथो पुस्तालाई घरेलु बजारमा औपचारिक रूपमा सार्वजनिक गरेको छ । कम्पनीले यसलाई ‘प्राइभेट म्याग्लेभ’ को अवधारणामा विकसित गरिएको भन्दै उच्च स्तरको आराम, अत्याधुनिक प्रविधि र विद्युतीय ड्राइभिङ अनुभवलाई एउटै प्याकेजमा प्रस्तुत गरेको दाबी गरेको छ ।

सन् २०२३ मा सार्वजनिक गरिएको हाइपर टुरर कन्सेप्ट बाट प्रेरित नयाँ एलग्रान्डको उत्पादन संस्करण पहिलो पटक सन् २०२५ को जापान मोबिलिटी शोमा देखाइएको थियो । त्यसको करिब नौ महिनापछि यो मिनिभ्यान अब जापानी ग्राहकका लागि बिक्रीमा आएको हो ।

डिजाइनतर्फ हेर्दा नयाँ एलग्रान्डले अघिल्लो पुस्ताभन्दा निकै आधुनिक र आकर्षक रूप पाएको छ । अगाडिको भागमा तीक्ष्ण एलईडी लाइट, बलियो बडी लाइन र भविष्यमुखी शैलीले यसलाई सामान्य मिनिभ्यानभन्दा फरक पहिचान दिएको छ । कम्पनीले यसलाई पाँचवटा बाह्य रङ विकल्पमा उपलब्ध गराएको छ, जसमा चारवटा मोनो–टोन र एउटा डुअल–टोन संयोजन समावेश छ ।

भित्री भाग भने अझ प्रिमियम बनाइएको छ । अघिल्लो मोडलको तुलनामा सिटको उचाइ बढाइएको छ भने यात्रुका लागि पर्याप्त लेग–रुम र हेड–रुम उपलब्ध गराइएको छ । सबै सिटमा जिरो–ग्राभिटी डिजाइन प्रयोग गरिएको छ भने दोस्रो पङ्क्तिका सिटमा डुअल रिक्लाइन सुविधा राखिएको छ, जसले लामो यात्रालाई थप आरामदायी बनाउने कम्पनीको विश्वास छ ।

सुविधाका हिसाबले नयाँ एलग्रान्ड निकै सम्पन्न देखिन्छ । यसमा २२ स्पिकरको बोस अडियो सिस्टम, दुईवटा स्मार्टफोनका लागि वायरलेस फास्ट चार्जिङ, तीनवटा १०० भोल्ट एसी पावर आउटलेट लगायतका सुविधा दिइएको छ । सामान राख्ने स्थान पनि सुधारिएको छ । कार्गो फ्लोर तल झारिएको र टेलगेटको खुल्ने भाग फराकिलो बनाइएकाले ठूलो सामान राख्न सहज हुने कम्पनीको भनाइ छ । तीनवटै सिट प्रयोग गर्दा पनि सातवटा क्यारी–अन आकारका सुटकेस अट्ने क्षमता रहेको दाबी गरिएको छ ।

सुरक्षातर्फ पनि निसानले नयाँ एलग्रान्डलाई अत्याधुनिक बनाएको छ । आधारभूत एक्स ई–फोरओर्स भेरियन्टमै प्रोपाइलट ड्राइभर असिस्ट सिस्टम स्ट्यान्डर्ड रूपमा उपलब्ध छ । माथिल्लो जी ई–फोरओर्स भेरियन्टमा नेभी–लिङ्क, ट्राफिक जाम ह्यान्ड्स–अफ मोड, लेन चेन्ज सपोर्ट जस्ता सुविधा समावेश गरिएको छ भने प्रोपाइलट २.० वैकल्पिक रूपमा उपलब्ध हुनेछ ।

इन्फोटेनमेन्टतर्फ निसानकनेक्ट प्रणालीमा अब गुगल बिल्ट–इन समावेश गरिएको छ, जसअन्तर्गत गुगल म्याप्स र गुगल असिस्टेन्ट जस्ता सेवाहरू सिधै गाडीभित्रै प्रयोग गर्न सकिन्छ ।

पावरट्रेनका रूपमा नयाँ एलग्रान्डमा निसानको तेस्रो पुस्ताको ई–पावर हाइब्रिड सिस्टम प्रयोग गरिएको छ । यसमा १.५ लिटर क्षमताको टर्बोचार्ज्ड तीन–सिलिन्डर पेट्रोल इन्जिनसँग दुईवटा एसी सिन्क्रोनस विद्युतीय मोटर जोडिएका छन् । पेट्रोल इन्जिनले १३८ हर्सपावर उत्पादन गर्छ भने दुईवटा मोटरको संयुक्त क्षमता ३३७ हर्सपावर पुगेको छ ।

जापानी बजारमा नयाँ एलग्रान्डको प्रारम्भिक मूल्य ६.८९७ मिलियन येन बाट सुरु हुन्छ भने उच्च जी भेरियन्टको मूल्य ७.५७९ मिलियन येन तोकिएको छ । यसको मुख्य प्रतिस्पर्धा टोयोटा अल्फार्ड र होन्डा ओडिसी जस्ता प्रिमियम मिनिभ्यानसँग हुने अपेक्षा गरिएको छ ।

निसानका अनुसार यो नयाँ एलग्रान्ड जापानसहित केही एसियाली बजारमा मात्रै बिक्री हुनेछ । अघिल्लो पुस्ताजस्तै यसलाई उत्तर अमेरिकी बजारमा भने उपलब्ध गराइने छैन । कम्पनीले अमेरिकामा मिनिभ्यान बिक्री सन् २०१७ मा क्वेस्ट मोडल बन्द गरेसँगै रोकेको थियो ।

एलग्रान्डको इतिहास हेर्दा यो पहिलो पटक सन् १९९७ मा सार्वजनिक भएको थियो । प्रारम्भिक वर्षहरूमा जापानमा यसले अत्यन्त राम्रो व्यापार गर्दै वार्षिक ४० हजारभन्दा बढी युनिट बिक्री गरेको थियो भने सन् १९९८ मा करिब ५५ हजार ७७५ युनिट बिक्री हुँदै उच्च कीर्तिमान बनाएको थियो । तर पछिल्ला वर्षहरूमा माग लगातार घट्दै गएको देखिन्छ । सन् २०२४ मा भने यसको वार्षिक बिक्री जम्मा करिब १,३०० युनिटमा सीमित रहँदै अहिलेसम्मकै न्यून स्तरमा झरेको थियो । अब चौथो पुस्ताको आगमनसँगै निसानले एलग्रान्डलाई पुनः प्रिमियम मिनिभ्यान बजारको अग्रपङ्क्तिमा फर्काउने अपेक्षा गरेको छ ।