पानी, उकालो र भारी भारसँग जुध्न तयार जेटुरको नयाँ पिकअप

काठमाडौं । सामान्य सडकमा तीव्र गति र सुविधाजनक यात्रा मात्र होइन, खोलाको गहिरो पानी, कठिन उकालो र भारी भारसहितको यात्रामा पनि उत्तिकै सक्षम हुने पिकअपको माग बढिरहेको छ । यही आवश्यकतालाई सम्बोधन गर्ने गरी शक्तिशाली प्लग–इन हाइब्रिड प्रणालीसहितको नयाँ अफरोड पिकअप बजारमा आएको छ ।

चेरीअन्तर्गतको जेटुरले चीनमा जोङहेङ एफ७०० सार्वजनिक गरेको हो । अन्तर्राष्ट्रिय बजारमा जेटुर एफ७०० नामबाट चिनिने यो पिकअपले ८९२ हर्सपावर शक्ति र ११३५ एनएम टर्क उत्पादन गर्छ । यसको सीमित अवधिको मूल्य २ लाख ९९ हजार ९०० देखि ३ लाख ३९ हजार ९०० युआनसम्म तोकिएको छ ।

एफ७०० मा २.० लिटर टर्बो पेट्रोल इन्जिनसँग अगाडि र पछाडि दुईवटा विद्युतीय मोटर जडान गरिएको छ । दुई गतियुक्त डुअल हाइब्रिड ट्रान्समिसनसँग जोडिएको यो प्रणालीले कुल ६६५ किलोवाट शक्ति निकाल्छ । जेटुरका अनुसार यसले स्थिर अवस्थाबाट प्रतिघण्टा १०० किलोमिटरको गति पाँच सेकेन्डमै समात्न सक्छ ।

क्याटलको ब्याट्री प्रयोग गरिएको पिकअपले विद्युतीय ऊर्जाबाट मात्र १५० किलोमिटर यात्रा गर्न सक्छ । पेट्रोल र ब्याट्री दुवैको ऊर्जा प्रयोग गर्दा यसको संयुक्त रेन्ज १३०० किलोमिटरसम्म पुग्ने कम्पनीको दाबी छ । यसको प्रमाणित इन्धन खपत प्रतिएक सय किलोमिटर ७.९५ लिटर उल्लेख गरिएको छ ।

एफ७०० को सबैभन्दा रोचक पक्ष यसको अफरोड क्षमता हो । छुट्टै फ्रेममा निर्माण गरिएको यो पिकअपमा चारपांग्रे ड्राइभ प्रणाली, अगाडि र पछाडि डिफरेन्सियल लक तथा ऊर्जा नियन्त्रण लक दिइएको छ । यसले ९०० मिलिमिटर गहिरो पानी पार गर्न सक्छ भने विद्युतीय प्रणालीले आईपी६८ स्तरको पानी प्रतिरोधी सुरक्षा पाएको छ ।

यसको अगाडिको प्रवेश कोण ३२ डिग्री र पछाडिको प्रस्थान कोण १५ डिग्री छ । अधिकतम ४५ डिग्रीको उकालो चढ्न सक्ने दाबी गरिएको एफ७००ले ३.५ टनसम्मको भार तान्न सक्छ । ट्रेलर जोड्न आवश्यक विद्युतीय सकेट र विशेष टोइङ मोड पनि सबै संस्करणमा उपलब्ध छ ।

आकारका हिसाबले पनि यो सामान्य पिकअपभन्दा ठूलो छ । यसको लम्बाइ ५४९५ मिलिमिटर, चौडाइ २०५० मिलिमिटर र उचाइ १९८५ मिलिमिटर छ । ३३५० मिलिमिटरको ह्विलबेस रहेको पिकअपमा १३०० लिटरको पछाडिको सामान राख्ने ठाउँ दिइएको छ ।

यसमा रहेको २२० भोल्टको बाह्य विद्युत् सकेटले क्याम्पिङ, निर्माणस्थल वा विद्युत् नपुगेका क्षेत्रमा उपकरण चलाउन सहयोग गर्छ । गाडीलाई स्थिर राखेर २० किलोवाटसम्म विद्युत् उत्पादन गर्न सकिने कम्पनीले जनाएको छ ।

भित्र ३५.४ इन्चको फराकिलो डिस्प्ले र १५.६ इन्चको केन्द्रीय टचस्क्रिन राखिएको छ । क्वालकम स्न्यापड्रागन ८२५५ चिपद्वारा चल्ने यसको सूचना तथा मनोरञ्जन प्रणालीसँगै दैनिक प्रयोगमा सहज हुने भौतिक बटनहरू पनि कायम राखिएका छन् । अगाडिका सिटमा मसाज सुविधा तथा अगाडि र पछाडि दुवै पंक्तिमा सिट तताउने र चिस्याउने सुविधा उपलब्ध छ ।

चालक सहायताका लागि उच्च गतिमा मार्ग निर्देशनसहित चल्न सहयोग गर्ने प्रणाली, स्वचालित पार्किङ र ५४० डिग्री दृश्य देखाउने क्यामरा दिइएको छ ।

नेपालमा जेटुरका एसयूभी बिक्री भइरहे पनि एफ७०० ल्याउने विषयमा आधिकारिक घोषणा भएको छैन । तर निर्माण व्यवसाय, साहसिक पर्यटन, कठिन भौगोलिक क्षेत्र र लामो दूरीको यात्रामा पिकअप प्रयोग हुने नेपाली बजारका लागि यसको शक्ति, टोइङ क्षमता र बाह्य विद्युत् आपूर्ति उपयोगी विशेषता बन्न सक्छन् । यद्यपि नेपालमा आउने सम्भावना, संस्करण र मूल्य भने आधिकारिक निर्णयपछि मात्रै स्पष्ट हुनेछ ।