भदौमै कोरलाबाट भित्रिए १ हजार २५३ ईभी, उठ्यो १ अर्ब ९४ करोड राजस्व
मुस्ताङ । चीनसँग जोडिएको मुस्ताङको कोरला नाका हुँदै भदौ महिनामा मात्रै १ हजार २५३ वटा विद्युतीय सवारी नेपाल भित्रिएका छन् । रसुवागढी र तातोपानी नाकाबाट हुने व्यापार अवरुद्ध भएपछि कोरला चीनबाट सवारी तथा मालवस्तु आयात गर्ने मुख्य वैकल्पिक मार्गका रूपमा प्रयोग हुन थालेको हो ।
मुस्ताङ भन्सार कार्यालयका अनुसार
साउनमा कोरलाबाट एक सय वटा ईभी भित्रिएका थिए । भदौमा यो संख्या बढेर १ हजार २५३
पुगेको छ । चालु आर्थिक वर्षको पहिलो दुई महिनामा यस नाकाबाट कुल १ हजार ३५३ ईभी
नेपाल आएका छन् ।
ईभीको आयात बढेसँगै भन्सार राजस्व
पनि उल्लेख्य रूपमा बढेको छ । कार्यालयले ईभीबाट साउनमा १७ करोड ३४ लाख र भदौमा १
अर्ब ९३ करोड ९७ लाख रुपैयाँ राजस्व संकलन गरेको छ । दुई महिनामा विद्युतीय
सवारीबाट मात्रै २ अर्ब ११ करोड ३१ लाख रुपैयाँ राजस्व उठेको हो ।
ईभीसहित सबै मालवस्तुको
जाँचपासबाट मुस्ताङ भन्सारले साउन र भदौमा कुल ३ अर्ब ७ करोड ९३ लाख रुपैयाँ
राजस्व संकलन गरेको छ । साउनमा २६ करोड ३९ लाख रुपैयाँ उठेकोमा भदौमा राजस्व बढेर
२ अर्ब ८१ करोड ५४ लाख रुपैयाँ पुगेको कार्यालयको तथ्यांक छ ।
यस अवधिमा कोरलाबाट कन्टेनर आयात
पनि तीव्र भएको छ । साउनमा ५७ वटा कन्टेनर भित्रिएकोमा भदौमा ६९७ वटा आएका छन् ।
दुई महिनामा भित्रिएका कुल ७५४ कन्टेनरबाट ९६ करोड ६२ लाख रुपैयाँ राजस्व संकलन
भएको छ ।
भदौ १० गते रसुवामा आएको बाढीले
सडक तथा भन्सार पूर्वाधारमा क्षति पुर्याएपछि रसुवागढी नाका अवरुद्ध भएको थियो ।
तातोपानीबाट हुने व्यापारसमेत रोकिएपछि आयातकर्ताले कोरला नाका प्रयोग गर्न थालेका
हुन् । भदौ १० देखि २५ गतेसम्म मात्रै कोरलाबाट ६४१ ईभी र ४३४ कन्टेनरको जाँचपास
भएको यसअघिको विवरणमा उल्लेख थियो ।
कोरलाबाट आयात बढे पनि नाकादेखि
पोखरासम्मको लामो पहाडी सडक, सीमित भन्सार पूर्वाधार, चालक तथा सवारी व्यवस्थापन र
चार्जिङ सुविधा चुनौतीका रूपमा छन् । पछिल्लो तथ्यांकले भने कोरला आपत्कालीन
विकल्पमा मात्र सीमित नरही चीनबाट नेपालमा ईभी तथा मालवस्तु ल्याउने प्रमुख
व्यापारिक मार्गका रूपमा विकसित भइरहेको देखाएको छ ।
