माइक्रो एसयूभी सेग्मेन्टमा भिनफास्टको प्रवेश, भीएफ३ले कसरी बनाउनेछ फरक पहिचान?

काठमाडौँ । भारतीय अटोमोबाइल बजारमा साना तर एसयूभीको आकर्षक डिजाइन भएका गाडीप्रति बढ्दो आकर्षणलाई लक्षित गर्दै भियतनामी अटोमोबाइल निर्माता भिनफास्टले भीएफ३ नामक माइक्रो इलेक्ट्रिक एसयूभी सार्वजनिक गर्ने तयारीलाई तीव्र बनाएको छ । कम्पनीले यसलाई भारतमा सबैभन्दा किफायती इलेक्ट्रिक एसयूभीमध्ये एक बनाउने लक्ष्य राखेको बताइएको छ ।

भिनफास्टले भारतमा भीएफ६, भीएफ७, भीएफ एमपीभी ७ र लिमोग्रिन सार्वजनिक गरिसकेको छ भने अब भीएफ९सँगै भीएफ३ पनि बजारमा ल्याउने तयारी गरिरहेको विभिन्न भारतीय सञ्चारमाध्यमले उल्लेख गरेका छन् । सन् २०२५ को अटो एक्स्पोमा पहिलो पटक प्रदर्शन गरिएको यो मोडल सानो आकार, आकर्षक डिजाइन र सहरी प्रयोगलाई केन्द्रमा राखेर विकास गरिएकाले सुरुवातदेखि नै चर्चामा छ ।

भीएफ३को डिजाइन परम्परागत सानो ह्याचब्याकभन्दा फरक छ । बाक्सी शैलीको बडी, कालो बडी क्ल्याडिङ र अग्लो ग्राउन्ड क्लियरेन्सको अनुभूतिले यसलाई सानो आकारमै एसयूभीको पहिचान दिन्छ । यसको लम्बाइ ३ हजार १९० मिलिमिटर रहेको छ, जुन एमजी कमेट ईभीभन्दा केही ठूलो भए पनि अधिकांश विद्युतीय कारभन्दा सानो हो । कम्पनीले रोज पिङ्क, इलेक्ट्रिक ब्लु, अर्बन मिन्ट र समर येलो जस्ता आकर्षक रङ विकल्प पनि उपलब्ध गराउने तयारी गरेको छ ।

फिचरतर्फ १० इन्चको टचस्क्रिन इन्फोटेनमेन्ट सिस्टम, म्यानुअल एयर कन्डिसनिङ, अगाडिका पावर विन्डो, रियर पार्किङ सेन्सरलगायत दैनिक प्रयोगका लागि आवश्यक सुविधा समावेश गरिएको छ ।

पर्फर्मेन्सका लागि भीएफ३मा १८.६४ किलोवाट–आवर क्षमताको ब्याट्री प्याक जडान गरिएको छ । यसमा रहेको एकल इलेक्ट्रिक मोटरले ४३.५ बीएचपी शक्ति र ११० न्युटन मिटर टर्क उत्पादन गर्छ । कम्पनीका अनुसार एकपटक पूर्ण चार्ज गर्दा यसले २१० किलोमिटरसम्म यात्रा गर्न सक्छ । रियर–ह्विल ड्राइभ प्रणालीमा आधारित भएकाले सहरभित्रको दैनिक यात्रामा सहज र रमाइलो ड्राइभिङ अनुभव दिने अपेक्षा गरिएको छ ।

भारतीय बजारमा यसको मूल्य करिब ७ लाखदेखि १० लाख भारतीय रुपैयाँ (अनरोड) बीच रहने अनुमान गरिएको छ । कम्पनीले ब्याट्री–एज–अ–सर्भिस (ब्याट्री भाडा) मोडल पनि ल्याउन सक्ने चर्चा छ, जसले प्रारम्भिक खरिद मूल्य अझ प्रतिस्पर्धी बनाउन सहयोग पुग्न सक्छ ।

नेपालको सन्दर्भमा भने भिनफास्ट भीएफ३ कहिले र कसरी भित्रिने भन्नेबारे हालसम्म कम्पनी वा कुनै आधिकारिक आयातकर्ताले औपचारिक जानकारी सार्वजनिक गरेका छैनन् । तर पछिल्लो समय अटोमोबाइल बजारमा भिनफास्टले नेपाल प्रवेशको तयारी गरिरहेको चर्चा बढ्दै गएको छ । यद्यपि, आधिकारिक घोषणा नभएसम्म यसको आयातकर्ता, मूल्य वा सार्वजनिक हुने समयबारे कुनै निश्चित निष्कर्ष निकाल्न सकिने अवस्था छैन ।

यदि कम्पनीले निकट भविष्यमै नेपाललाई पनि आफ्नो बजार विस्तार योजनामा समेट्ने हो भने, भीएफ३ नेपाली बजारमा किफायती विद्युतीय सवारी खोजिरहेका ग्राहकका लागि नयाँ विकल्प बन्न सक्छ । विशेषगरी काठमाडौंसहितका सहरी क्षेत्रमा पार्किङको अभाव, साँघुरा सडक र दैनिक आवतजावतलाई ध्यानमा राख्दा यस्तो माइक्रो इलेक्ट्रिक एसयूभीप्रति राम्रो रुचि देखिन सक्ने अनुमान गरिएको छ । अहिले नेपालमा साना आकारका विद्युतीय गाडीप्रतिको आकर्षण बढिरहेका बेला भीएफ३ले प्रवेश पाएमा यो सेग्मेन्टमा नयाँ प्रतिस्पर्धा सिर्जना हुने सम्भावना पनि उत्तिकै देखिन्छ ।