डीपलसँगको सहकार्यमा मिस युनिभर्स नेपाल २०२६, काठमाडौं अडिसन सम्पन्न
काठमाडौं । आत्मविश्वास, व्यक्तित्व र आफ्नै पहिचानलाई प्रस्तुत गर्दै देशका विभिन्न भागबाट आएका युवतीहरू बिहीबार राजधानीमा एउटै मञ्चमा उभिए । उद्देश्य थियो, राष्ट्रिय ताजसम्म पुग्ने यात्रामा आफूलाई अर्को चरणका लागि योग्य साबित गर्नु ।
डीपलको शीर्ष प्रायोजनमा आयोजना
भइरहेको मिस युनिभर्स नेपाल २०२६ को काठमाडौं ग्रान्ड अडिसनमा देशभरको छनोट
प्रक्रियाबाट आएका ६५ जनाले सहभागिता जनाएका छन् । उनीहरूमध्ये २५ जना
प्रतियोगीलाई अर्को चरणका लागि छनोट गरिने आयोजकले जनाएको छ ।
यस वर्ष प्रतियोगिताले ‘पर्फेक्ट
एज यु आर’ अर्थात् आफू जस्तो हुनुहुन्छ, त्यही रूपमा पूर्ण हुनुहुन्छ भन्ने
भावलाई मुख्य विषय बनाएको छ । सौन्दर्यको एउटै मापदण्ड पछ्याउनुभन्दा व्यक्तित्व,
आत्मविश्वास र आफ्नो वास्तविक पहिचानलाई स्वीकार गर्न प्रोत्साहित गर्नु यसको
उद्देश्य रहेको आयोजकको भनाइ छ ।
अडिसनका क्रममा निर्णायकहरूले
प्रतियोगीको बाहिरी प्रस्तुतिसँगै आत्मविश्वास, व्यक्तित्व, संवाद क्षमता र मञ्चमा
देखिने उपस्थितिलाई मूल्यांकन गरेका थिए ।
कार्यक्रमको आयोजना ग्लोबल ग्ल्यामर
भेन्चर प्रालिले गरेको हो भने अटोमोबाइल ब्रान्ड डीपल यस संस्करणको शीर्ष
प्रायोजकका रूपमा जोडिएको छ ।
डीपलका प्रबन्ध निर्देशक विवेक
सिकरियाले मानिसलाई कुनै निश्चित ढाँचामा ढाल्नु नभई आफ्नै पहिचानप्रति
आत्मविश्वासी बन्न प्रेरित गर्ने प्रतियोगिताको अवधारणासँग डीपलको सोच मेल खाने
बताए ।
त्यस्तै, मिस युनिभर्स नेपालकी
राष्ट्रिय निर्देशक सङ्गीता पुरीले प्रतियोगितालाई ताज जित्ने प्रतिस्पर्धामा
मात्र सीमित नराखी सहभागीलाई आफ्नो आवाज र क्षमता देखाउने अवसर दिने मञ्चका रूपमा
विकास गरिएको बताइन् ।
काठमाडौं चरण पूरा भएसँगै अब
सहभागीमध्ये उत्कृष्ट २५ को छनोट गरी प्रतियोगितालाई अर्को चरणमा प्रवेश गराइनेछ ।
त्यसपछि विभिन्न चरण पार गर्दै अन्तिम विजेता छनोट हुनेछ ।
मिस युनिभर्स नेपाल २०२६ को विजेताले अन्तर्राष्ट्रिय मिस युनिभर्स प्रतियोगितामा नेपालको प्रतिनिधित्व गर्नेछ ।
