नयाँ ब्रेजाको आक्रामक प्रवेश, ६–स्पिड गियरबक्स र २६.९० किमी माइलेज मुख्य आकर्षण

काठमाडौँ । मारुती सुजुकीले भारतीय बजारमा सन् २०२६ मोडल ब्रेजा सार्वजनिक गरेको छ । नयाँ कम्प्याक्ट एसयूभीको परिचयात्मक एक्स–शोरुम मूल्य ७ लाख ४० हजार भारुबाट सुरु हुन्छ । बाहिरी डिजाइनमा सामान्य परिमार्जन गरिएको भए पनि यसको इन्जिन, ट्रान्समिसन, सुरक्षा र केबिन सुविधामा महत्वपूर्ण सुधार गरिएको छ ।

फ्रङ्क्सभन्दा शक्तिशाली टर्बो इन्जिन 

नयाँ ब्रेजाको प्रमुख आकर्षण १.० लिटर बुस्टरजेट टर्बो पेट्रोल इन्जिन हो । फ्रङ्क्समा पनि यही इन्जिन प्रयोग भए पनि ब्रेजाका लागि यसलाई थप शक्तिशाली बनाइएको छ । यसले करिब १०९ हर्सपावर शक्ति र १७० एनएम टर्क उत्पादन गर्छ । फ्रङ्क्समा यही इन्जिनले करिब ९९ हर्सपावर शक्ति र १४७ एनएम टर्क दिन्छ । टर्बो इन्जिनसँग ६–स्पिड म्यानुअल गियरबक्स मात्र उपलब्ध छ ।

ब्रेजाको एलएक्सआई र भिएक्सआई टर्बो भेरियन्टले प्रतिलिटर २०.४७ किलोमिटर तथा जेडएक्सआई र जेडएक्सआई प्लसले प्रतिलिटर १९.९६ किलोमिटरसम्म माइलेज दिने कम्पनीको दाबी छ ।

पेट्रोल र सीएनजीमा पनि उपलब्ध

नयाँ ब्रेजामा १.५ लिटर नेचुरल्ली एस्पिरेटेड पेट्रोल इन्जिनलाई पनि निरन्तरता दिइएको छ । यसले १०२ हर्सपावर शक्ति र १३९ एनएम टर्क उत्पादन गर्छ । यो इन्जिन ६–स्पिड म्यानुअल तथा ६–स्पिड टर्क कन्भर्टर अटोमेटिक गियरबक्समा उपलब्ध छ ।

म्यानुअल पेट्रोल संस्करणले प्रतिलिटर २१.०९ किलोमिटरसम्म तथा अटोमेटिक संस्करणले प्रतिलिटर २०.१७ किलोमिटरसम्म माइलेज दिने दाबी गरिएको छ ।

सीएनजी संस्करणले प्रतिकिलो २६.९० किलोमिटरसम्म माइलेज दिनेछ । यसपटक सीएनजी सिलिन्डरलाई गाडीको तल्लो भागमा राखिएको छ । यसले बुटमा सामान राख्ने ठाउँ पहिलेभन्दा बढी उपयोगी बनाउने अपेक्षा गरिएको छ ।

केबिनमा थपियो ठूलो स्क्रिन

नयाँ ब्रेजाको बाहिरी आकार पुरानै मोडलसँग मिल्दोजुल्दो छ । अगाडिको ग्रिल, फग ल्याम्प वरपरको डिजाइन, डोर क्ल्याडिङ र अलोय ह्विल भने परिमार्जन गरिएका छन् ।

केबिनमा १०.१ इन्चको टचस्क्रिन इन्फोटेनमेन्ट प्रणाली, वायरलेस स्मार्टफोन कनेक्टिभिटी, अगाडिका भेन्टिलेटेड सिट, एम्बियन्ट लाइट, एयर प्युरिफायर र इलेक्ट्रिक सनरुफजस्ता सुविधा थपिएका छन् ।

यसमा एक्टिभ कुलिङसहितको वायरलेस फोन चार्जर, पछाडि एसी भेन्ट, ३६० डिग्री क्यामेरा, हेड–अप डिस्प्ले तथा उचाइ मिलाउन सकिने चालक सिट पनि उपलब्ध छन् ।

आधारभूत मोडलमै ६ एयरब्याग

नयाँ ब्रेजा एलएक्सआई, भिएक्सआई, जेडएक्सआई र जेडएक्सआई प्लस गरी चार प्रमुख भेरियन्टमा बिक्री हुनेछ । आधारभूत एलएक्सआईमै ६ एयरब्याग, इलेक्ट्रोनिक स्टेबिलिटी प्रोग्राम, एन्टिलक ब्रेकिङ प्रणाली, हिल होल्ड असिस्ट र आइसोफिक्स चाइल्ड–सिट माउन्ट दिइएको छ ।

जेडएक्सआई र जेडएक्सआई प्लसजस्ता माथिल्ला भेरियन्टमा ब्लाइन्ड स्पट मनिटर, सेफ एक्जिट वार्निङ, रियर क्रस–ट्राफिक अलर्ट, टायर प्रेसर मनिटरिङ प्रणाली र अगाडिका पार्किङ सेन्सर उपलब्ध छन् ।

माथिल्लो जेडएक्सआई प्लस भेरियन्टले एडाप्टिभ क्रुज कन्ट्रोल, ३६० डिग्री क्यामेरा, अटो–फोल्डिङ साइड मिरर, वाक–अवे लकिङ र मेसिन–फिनिस अलोय ह्विलजस्ता सुविधा पाउँछ । नयाँ ब्रेजाले भारत एनक्याप दुर्घटना परीक्षणमा वयस्क र बाल यात्रु सुरक्षातर्फ ५–स्टार रेटिङसमेत पाएको छ ।

भारतीय बजारमा नयाँ ब्रेजाले टाटा नेक्सन, हुन्डाई भेन्यु, महिन्द्रा एक्सयूभी थ्रीएक्सओ, किआ सोनेट र स्कोडा कायलाकसँग प्रतिस्पर्धा गर्नेछ । नेपालमा नयाँ मोडल आउने समय, भेरियन्ट र मूल्यबारे आधिकारिक जानकारी सार्वजनिक भएको छैन । यद्यपि शक्तिशाली टर्बो इन्जिन, ६–स्पिड ट्रान्समिसन, उच्च माइलेज र ५–स्टार सुरक्षा रेटिङले नयाँ ब्रेजालाई नेपाली ग्राहकका लागि पनि प्रतीक्षित मोडल बनाउन सक्छ ।