स्पोर्टी लुकमा आउँदै ओरा ५, नयाँ जीटी भर्सनमा के–के पाइन्छ ?
काठमाडौँ । ग्रेट वाल मोटर (जीडब्लुएम) अन्तर्गतको ओरा ब्रान्डले आफ्नो लोकप्रिय क्रसओभर ओरा ५ का दुई नयाँ स्पोर्ट र जीटी ट्रिम सार्वजनिक गर्ने संकेत दिएको छ । कम्पनीले सार्वजनिक गरेका टिजर तस्बिरले नयाँ ट्रिममा आकर्षक डिजाइन, नयाँ पेन्ट स्किम र स्पोर्टी एरो बडी किट समावेश हुने देखाएको छ । हाल चीनमा ओरा ५ को सुरुवाती मूल्य ६९ हजार ८०० युआन रहेको छ भने नयाँ ट्रिमको मूल्य भने अझै सार्वजनिक गरिएको छैन ।
स्पोर्ट ट्रिममा सेतो छानासहितको डुअल–टोन रंग, ठूलो आकारका ह्विल, रातो ब्रेक क्यालिपर तथा ईभी संस्करणमा मात्र उपलब्ध रहेको रूफ–माउन्टेड लाइडार सेन्सर समावेश गरिएको छ । त्यस्तै जीटी ट्रिममा फ्रन्ट स्प्लिटर, साइड स्कर्ट, ठूलो रियर स्पोइलर तथा रातो एक्सेन्टसहितको एरोडाइनामिक बडी किटले यसलाई अझ आक्रामक बनाएको छ । यद्यपि कम्पनीले इन्जिन वा मोटरको क्षमतामा कुनै परिवर्तन हुनेबारे जानकारी दिएको छैन ।
ओरा ५ हाल तीन प्रकारका पावरट्रेनमा उपलब्ध छ । विद्युतीय संस्करणमा १५० किलोवाट (२०१ हर्सपावर) क्षमताको फ्रन्ट मोटरसहित ४५.३ र ५८.३ किलोवाट–आवर ब्याट्री विकल्प उपलब्ध छन्, जसले क्रमशः ४८० र ५८० किलोमिटर सीएलटीसी रेन्ज दिने दाबी गरिएको छ । पेट्रोल संस्करणमा १.५ लिटर टर्बो इन्जिन तथा हाइब्रिड संस्करणमा संयुक्त २२३ हर्सपावर उत्पादन गर्ने प्रणाली प्रयोग गरिएको छ ।
प्रविधिका हिसाबले पनि ओरा ५ निकै आधुनिक मानिन्छ । यसमा कम्पनीको नयाँ कफी पाइलट ३ सहायक ड्राइभिङ प्रणाली प्रयोग गरिएको छ, जसले नेभिगेसन अन अटोपाइलट सुविधा उपलब्ध गराउँछ । कम्पनीका अनुसार यो प्रणालीले बहु–तले पार्किङ भवनभित्र करिब ३ किलोमिटरसम्म स्वचालित रूपमा नेभिगेट गर्न सक्छ । साथै, चीनमा उपलब्ध सबैभन्दा किफायती लाइडारयुक्त गाडीमध्ये ओरा ५ एक हुने कम्पनीको दाबी छ ।
४,४७१ मिमि लम्बाइ र २,७२० मिमि ह्विलबेस भएको ओरा ५ मा अगाडि म्याकफर्सन र पछाडि मल्टि–लिङ्क सस्पेन्सन प्रयोग गरिएको छ । चीनमा सन् २०२६ जुन महिनामा यसको विद्युतीय संस्करण मात्र २,७८९ युनिट बिक्री भएको थियो । कम्पनीले नयाँ स्पोर्ट र जीटी ट्रिमसँगै हालै थपिएका हाइब्रिड तथा पेट्रोल संस्करणले आगामी दिनमा ओरा ५ को लोकप्रियता र बिक्री दुवै बढ्ने अपेक्षा गरेको छ ।
