एसयूभीको युगमा पनि सेडानको दमदार पुनरागमन : नयाँ हुन्डाई एलान्ट्रा सार्वजनिक

काठमाडौं । हुन्डाईले दक्षिण कोरियामा आयोजित २०२६ बुसान इन्टरनेशनल मोबिलिटी शोमा आठौं पुस्ताको नयाँ एलान्ट्रा (एभान्टे) सार्वजनिक गरेको छ । नयाँ मोडलले अघिल्लो पुस्ताको तुलनामा अझ ठूलो आकार, आकर्षक डिजाइन, अत्याधुनिक प्रविधि तथा सुधारिएको हाइब्रिड पावरट्रेन प्राप्त गरेको छ ।

नयाँ एलान्ट्रामा हुन्डाईको ‘आर्ट अफ स्टिल’ डिजाइन फिलोसोफी अपनाइएको छ । अगाडिको भागमा स्प्लिट एलईडी हेडल्याम्प, टी–आकारको डीआरएल, ठूलो एयर इन्टेक तथा स्पोर्टी बम्पर दिइएको छ । पछाडिको भागमा टी–आकारको एलईडी टेलल्याम्प, इन्टिग्रेटेड डकटेल स्पोइलर तथा नयाँ डिजाइनको बम्परले यसलाई अझ प्रिमियम बनाएको छ ।

नयाँ एलान्ट्राको लम्बाइ ४,७६५ मिमी, चौडाइ १,८५५ मिमी, उचाइ १,४२५ मिमी तथा ह्विलबेस २,७५० मिमी रहेको छ । अघिल्लो मोडलको तुलनामा यो ५५ मिमी लामो, ३० मिमी फराकिलो तथा ३० मिमी लामो ह्विलबेस भएकोले केबिन अझ फराकिलो भएको कम्पनीले जनाएको छ ।

इन्टेरियरमा नयाँ ‘प्लिओस कनेक्ट’ इन्फोटेनमेन्ट सिस्टम, १४.६ इन्चसम्मको टचस्क्रिन, डिजिटल इन्स्ट्रुमेन्ट क्लस्टर तथा प्रयोग गर्न सहज रहने फिजिकल बटनहरू राखिएको छ । साथै डुअल वायरलेस चार्जर, १०० वाट यूएसबी चार्जिङ, एम्बियन्ट लाइटिङ, बाङ एन्ड ओलुफसेन साउन्ड सिस्टम, ३६० डिग्री क्यामेरा, रिमोट पार्किङ असिस्ट, डिजिटल की तथा ओभर–द–एयर अपडेटजस्ता सुविधा पनि उपलब्ध छन् ।

सुरक्षाका लागि नयाँ एलान्ट्रामा १० वटा एयरब्याग, एडास, हाइवे ड्राइभिङ असिस्ट २, स्मार्ट क्रुज कन्ट्रोल २, पेडल मिसएप्लिकेसन सेफ्टी असिस्ट तथा इमर्जेन्सी ब्रेकिङ सिस्टम समावेश गरिएको छ ।

दक्षिण कोरियाली बजारमा यो सेडान २.० लिटर पेट्रोल र १.६ लिटर हाइब्रिड गरी दुई विकल्पमा उपलब्ध हुनेछ । पेट्रोल इन्जिनले करिब १४९ एचपी शक्ति उत्पादन गर्छ भने हाइब्रिड संस्करणको संयुक्त आउटपुट करिब १५७ एचपी रहेको छ । हाइब्रिडमा स्मार्ट रिजेनेरेटिभ ब्रेकिङ, प्रिडिक्टिभ हाइब्रिड कन्ट्रोल तथा ‘स्टे मोड’ जस्ता नयाँ प्रविधि पनि समावेश गरिएको छ ।

हालका लागि नयाँ एलान्ट्रा भारतमा ल्याइने सम्भावना न्यून देखिए पनि यसको डिजाइन, प्रविधि तथा हाइब्रिड प्रणालीले भविष्यका हुन्डाई सेडान मोडलहरूमा प्रभाव पार्ने अपेक्षा गरिएको छ । एसयूभीको बढ्दो लोकप्रियताबीच पनि हुन्डाईले सेडान सेग्मेन्टलाई अझ आधुनिक, प्रविधिमैत्री र प्रिमियम बनाउने रणनीति अघि सारेको यस मोडलले स्पष्ट संकेत दिएको छ ।