भेन्टिलेटेड सिटदेखि ६४–कलर एम्बियन्ट लाइटसम्म, नयाँ ब्रेजामा के–के नयाँ ?

काठमाडौं । मारुती सुजुकीले आफ्नो लोकप्रिय कम्प्याक्ट एसयूभी ब्रेजाको फेसलिफ्ट संस्करण आगामी २४ जुलाई मा सार्वजनिक गर्ने तयारी गरेको छ । औपचारिक लन्चअघि नै यसको स्पेसिफिकेसन र फिचर सम्बन्धी विवरण बाहिरिएपछि नयाँ ब्रेजामा यसपटक उल्लेखनीय परिवर्तन गरिएको पुष्टि भएको छ ।

यसपटकको सबैभन्दा ठूलो आकर्षण भनेको नयाँ १.० लिटर बुस्टरजेट टर्बो पेट्रोल इन्जिनको आगमन हो । हाल प्रयोग हुँदै आएको १.५ लिटर नेचुरली एस्पिरेटेड पेट्रोल इन्जिनसँगै यो नयाँ इन्जिन पनि विकल्पका रूपमा उपलब्ध हुने बताइएको छ । यसले ब्रेजालाई प्रदर्शन र मूल्य दुवै हिसाबले अझ प्रतिस्पर्धी बनाउने अपेक्षा गरिएको छ ।

लिक भएको विवरणअनुसार १.० लिटर बुस्टरजेट इन्जिनले १०९ बीएचपी शक्ति र १७० एनएम टर्क उत्पादन गर्नेछ । प्रारम्भिक चरणमा यो इन्जिन ६-स्पिड म्यानुअल ट्रान्समिसनसँग मात्र उपलब्ध हुने उल्लेख गरिएको छ । भविष्यमा अटोमेटिक ट्रान्समिसन थपिने सम्भावना भने खुला राखिएको छ ।

यस्तै, हाल बिक्रीमा रहेको १.५ लिटर पेट्रोल इन्जिनलाई पनि निरन्तरता दिइनेछ । यो इन्जिनले ९८ बीएचपी शक्ति र १३९ एनएम टर्क उत्पादन गर्नेछ । ग्राहकले यसमा ५-स्पिड म्यानुअल वा ६-स्पिड अटोमेटिक ट्रान्समिसन रोज्न सक्नेछन् ।

फेसलिफ्टसँगै ब्रेजाको फिचर सूची पनि उल्लेखनीय रूपमा विस्तार गरिएको छ । बाहिरी डिजाइनमा एलईडी फग ल्याम्प, नयाँ डिजाइनका अलोय ह्विल तथा अन्डरबडी सीएनजी ट्याङ्क जस्ता परिवर्तन देखिनेछन् । विशेषगरी सीएनजी संस्करणमा अन्डरबडी ट्याङ्क प्रयोग गरिएकाले बुट स्पेसमा सुधार हुने अपेक्षा गरिएको छ ।

इन्टेरियरतर्फ पनि ब्रेजालाई थप प्रिमियम बनाउने प्रयास गरिएको छ । नयाँ मोडलमा भेन्टिलेटेड फ्रन्ट सिट, १०.१ इन्च इन्फोटेन्मेन्ट डिस्प्ले तथा ६४–कलर एम्बियन्ट लाइटिङ जस्ता सुविधा समावेश हुने जानकारी बाहिरिएको छ । यी फिचरहरू कम्पनीको भिक्टोरिस एसयूभीमा पनि उपलब्ध रहेका कारण सम्भवतः ब्रेजाको टप भेरियन्टमा मात्र सीमित हुने अनुमान गरिएको छ ।

मारुतीका लागि यो अपडेट अत्यन्त महत्वपूर्ण मानिएको छ । पछिल्लो समय कम्प्याक्ट एसयूभी सेग्मेन्टमा प्रतिस्पर्धा निकै तीव्र बनेको छ । बजारमा रहेका अधिकांश मोडलले नयाँ प्रविधि र प्रिमियम सुविधासहित आफूलाई निरन्तर अपडेट गरिरहेका बेला ब्रेजालाई पनि समयअनुसार परिमार्जन गर्न कम्पनी बाध्य भएको देखिन्छ ।

विशेषगरी नयाँ १.० लिटर टर्बो इन्जिनले कम्पनीलाई भारतको सब–४ मिटर कर संरचनाअनुसार थप प्रतिस्पर्धी मूल्य निर्धारण गर्न सहयोग पुग्ने विश्वास गरिएको छ । यसले प्रारम्भिक मूल्यलाई आकर्षक राख्दै नयाँ ग्राहक तान्ने रणनीतिमा पनि बल पुर्‍याउनेछ ।

यद्यपि यसपटक थपिएका अधिकांश सुविधा अब सेग्मेन्टमा नयाँ होइनन् । बरु अहिलेका ग्राहकले अपेक्षा गर्ने न्यूनतम मापदण्डकै रूपमा यी फिचरलाई हेरिएको छ । त्यसैले ब्रेजाको यो अपडेट प्रतिस्पर्धीभन्दा धेरै अगाडि उक्लिने प्रयासभन्दा पनि बजारमा आफ्नो उपस्थितिलाई पुनः बलियो बनाउने रणनीतिको हिस्सा भएको विश्लेषण गरिएको छ ।

नयाँ ब्रेजाले बजारमा टाटा नेक्सन, मारुती फ्रोन्क्स, टोयोटा टाइसर, महिन्द्रा एक्सयूभी थ्री एक्स ओ, किया सोनेट, किया साइरोस र हुन्डाई भेन्युसँग प्रत्यक्ष प्रतिस्पर्धा गर्नेछ । आगामी केही महिनाभित्र आउने रेनोको नयाँ कम्प्याक्ट एसयूभी, त्यसकै निसान संस्करण तथा अर्को वर्ष अपेक्षित होन्डाको सब–कम्प्याक्ट एसयूभीले पनि यो सेग्मेन्टको प्रतिस्पर्धालाई अझ रोचक बनाउने निश्चित देखिएको छ ।