रियर–ह्विल–ड्राइभकै कारण किन फरक छ बीएडब्ल्यू ब्रम्बी ?

काठमाडौं । काठमाडौं उपत्यकाका साँघुरा सडक, तीखा मोड, उकालो–ओरालो र दिनप्रतिदिन बढ्दो ट्राफिक जामका कारण शहरी यात्राका लागि उपयुक्त विद्युतीय सवारीको खोजी बढ्दै गएको छ । यस्तै अवस्थामा चीनको सात दशकभन्दा लामो अटोमोबाइल इतिहास बोकेको बेइजिङ अटो वर्क्स (बीएडब्ल्यू) ले आफ्नो कम्प्याक्ट विद्युतीय गाडी ब्रम्बी मार्फत नेपाली बजारमा फरक विकल्प प्रस्तुत गरिरहेको दाबी गरेको छ ।

नेपालमा विद्युतीय सवारीको प्रयोग तीव्र गतिमा विस्तार भइरहेको छ । इन्धनको मूल्य वृद्धि, कम सञ्चालन खर्च, वातावरणीय सचेतना र सरकारी नीतिका कारण धेरै उपभोक्ता ईभीतर्फ आकर्षित भइरहेका छन् । तर गाडी छनोट गर्दा अधिकांश ग्राहकको ध्यान ब्याट्री क्षमता, ड्राइभिङ रेन्ज वा मूल्यमा केन्द्रित हुने गरेको छ । जबकि वास्तविक ड्राइभिङ अनुभव निर्धारण गर्ने महत्वपूर्ण पक्षमध्ये ड्राइभ प्रणाली पनि एक हो ।

बीएडब्ल्यूका अनुसार ब्रम्बीलाई आफ्नै वर्गमा फरक बनाउने प्रमुख विशेषता यसको रियर–ह्विल–ड्राइभ (आरडब्ल्यूडी) प्लेटफर्म हो । कम्पनीको दाबी अनुसार करिब २० लाख रुपैयाँ मूल्य वर्गका अधिकांश कम्प्याक्ट ईभीमा फ्रन्ट–ह्विल–ड्राइभ प्रणाली प्रयोग हुने भए पनि ब्रम्बीमा पछाडिका पाङ्ग्रामा शक्ति प्रवाह हुने आरडब्ल्यूडी प्रणाली अपनाइएको छ ।

सात दशकभन्दा लामो इन्जिनियरिङ अनुभव

सन् १९५१ मा स्थापना भएको बेइजिङ अटो वर्क्स चीनका सबैभन्दा पुराना अटोमोबाइल उत्पादकमध्ये एक हो । प्रारम्भिक चरणमा सैनिक तथा सरकारी प्रयोजनका सवारी निर्माणबाट पहिचान बनाएको कम्पनीले पछि यात्रुवाहक, व्यावसायिक तथा विद्युतीय सवारी उत्पादनमा आफ्नो उपस्थितिलाई विस्तार गरेको हो ।

विशेषगरी बीजे २१२ अफरोड मोडलले कम्पनीलाई बलियो तथा भरपर्दो सवारी निर्माता बनाएको मानिन्छ । अहिले बीएडब्ल्यूका सवारी एशिया, अफ्रिका, मध्यपूर्व र दक्षिण अमेरिकासहित विभिन्न अन्तर्राष्ट्रिय बजारमा उपलब्ध छन् ।

आरडब्ल्यूडीले के फरक दिन्छ ?

सामान्यतया फ्रन्ट–ह्विल–ड्राइभ गाडीमा अगाडिका पाङ्ग्राले स्टेयरिङ र शक्ति प्रवाह दुवैको जिम्मेवारी लिन्छन् । तर आरडब्ल्यूडी प्रणालीमा शक्ति पछाडिका पाङ्ग्रामा पुग्छ भने अगाडिका पाङ्ग्रा स्टेयरिङका लागि मात्र प्रयोग हुन्छन् ।

कम्पनीका अनुसार यसले गाडीको तौल सन्तुलित रूपमा वितरण गर्न मद्दत गर्ने भएकाले मोडमा स्थिरता बढ्छ । उकालो सडकमा ट्र्याक्सन राम्रो हुने, स्टेयरिङ हलुका र बढी उत्तरदायी महसुस हुने तथा यात्रु वा सामान धेरै हुँदा पनि सन्तुलन कायम रहने कम्पनीको दाबी छ । नेपालजस्ता धेरै उकालो भएका शहरमा यस्तो प्रणालीले सहज ड्राइभिङ अनुभव दिन सक्ने कम्पनीले जनाएको छ ।

काठमाडौंको सडकलाई ध्यानमा राखेर

बीएडब्ल्यूका अनुसार ब्रम्बीको कम्प्याक्ट आकार र आरडब्ल्यूडी प्लेटफर्मको संयोजनले यसलाई काठमाडौंजस्ता भीडभाड भएका शहरका लागि उपयुक्त बनाएको छ । साँघुरा सडक, सीमित पार्किङ, तीखा मोड तथा दैनिक ट्राफिकलाई ध्यानमा राखेर यसको डिजाइन गरिएको कम्पनीको भनाइ छ ।

सानो टर्निङ रेडियस, सहज पार्किङ, विद्युतीय मोटरबाट तत्काल उपलब्ध हुने टर्क तथा कम सञ्चालन खर्चले दैनिक शहरी आवतजावतलाई सहज बनाउने कम्पनीको विश्वास छ ।

कम्पनीको भनाइ

बीएडब्ल्यू ब्रम्बीका सेल्स हेड सुमन बज्राचार्य का अनुसार आज विद्युतीय सवारी छनोट गर्नु भनेको केवल मूल्य वा ड्राइभिङ रेन्ज हेर्ने विषय मात्र होइन ।

उनका अनुसार, "ब्रम्बीको रियर–ह्विल–ड्राइभ प्रणालीले नेपालको शहरी सडकको वास्तविक आवश्यकतालाई ध्यानमा राखेर सन्तुलित, सुरक्षित र आत्मविश्वासपूर्ण ड्राइभिङ अनुभव दिन्छ । काठमाडौंलगायत प्रमुख शहरका साँघुरा सडक, उकालो र भारी ट्राफिकका कारण यही प्रविधिले ब्रम्बीलाई आफ्नै वर्गमा फरक बनाएको छ ।"

उनले कम्पनीले सात दशकभन्दा बढीको इन्जिनियरिङ अनुभवलाई आधुनिक विद्युतीय प्रविधिसँग जोडेर व्यावहारिक ईभी विकास गरेको बताए ।

प्रयोगकर्ताको अनुभव

काठमाडौंका ब्रम्बी प्रयोगकर्ता रमेश अधिकारीले सुरुमा कम्प्याक्ट ईभीले उकालोमा राम्रो प्रदर्शन गर्छ कि गर्दैन भन्ने शंका लागेको बताए ।

उनका अनुसार धापासीदेखि बुढानीलकण्ठसम्मको उकालो सडकमा ब्रम्बीले अपेक्षाभन्दा राम्रो प्रदर्शन गरेको अनुभव भएको छ ।

यस्तै पाल्पा–बुटवल क्षेत्रमा नियमित आवतजावत गर्ने कृषि उद्यमी रमेश रोकायाले पनि ब्रम्बी साँघुरा सडकमा सहज, पार्किङ गर्न सजिलो तथा उकालो र हिलो सडकमा पनि सन्तुलित महसुस भएको बताए ।

उनका अनुसार सञ्चालन खर्च निकै कम हुनुका साथै सानो आकार भए पनि गाडी चलाउँदा आत्मविश्वास बढ्ने अनुभव भएको छ ।

अब आउँदैछ बीएडब्ल्यू ई७ प्रो

ब्रम्बीपछि कम्पनीले नेपाली बजारमा बीएडब्ल्यू ई७ प्रो ल्याउने तयारी गरिरहेको जनाएको छ । कम्पनीका अनुसार नयाँ मोडलमा डाइरेक्ट फास्ट चार्जिङ, अझ आधुनिक बाह्य डिजाइन, फराकिलो इन्टेरियर, सुधारिएको सस्पेन्सन, उन्नत सुरक्षा प्रणाली, स्मार्ट डिजिटल फिचर तथा अझ परिस्कृत आरडब्ल्यूडी प्लेटफर्म उपलब्ध हुनेछ ।

कम्पनीले ब्रम्बीबाट प्राप्त सकारात्मक प्रतिक्रियालाई आधार बनाउँदै ई७ प्रोले नेपालको शहरी विद्युतीय सवारी बजारमा नयाँ मापदण्ड स्थापित गर्ने विश्वास व्यक्त गरेको छ ।

हालको अवस्थामा विद्युतीय सवारी केवल इन्धन खर्च बचाउने विकल्पमा सीमित नरही स्मार्ट प्रविधि, सहज ड्राइभिङ अनुभव र कम सञ्चालन खर्चको संयोजन बन्दै गएको छ । यस्तै बदलिँदो आवश्यकतालाई लक्षित गर्दै बीएडब्ल्यूले आफ्नो नयाँ पुस्ताको ईभीमार्फत नेपाली बजारमा थप प्रतिस्पर्धी उपस्थिति बनाउने तयारी गरेको जनाएको छ ।