१,१९३ हर्सपावरसहित बीवाईडी डेन्जा एन८ ईभी सार्वजनिक हुने तयारीमा

काठमाडौं । चीनको अग्रणी विद्युतीय सवारी निर्माता बीवाईडीअन्तर्गतको प्रिमियम ब्रान्ड डेन्जाले आफ्नो नयाँ पूर्ण विद्युतीय एसयूभी डेन्जा एन८ र डेन्जा एन८एलको आधिकारिक प्राविधिक विवरण सार्वजनिक गरेको छ । उच्च क्षमताको तीन मोटर, दोस्रो पुस्ताको ब्लेड ब्याट्री र अत्याधुनिक स्मार्ट ड्राइभिङ प्रविधिसहित आउने यी मोडलले प्रिमियम विद्युतीय एसयूभी बजारमा कम्पनीको उपस्थिति थप बलियो बनाउने अपेक्षा गरिएको छ ।

चीनमा नियामक निकायमा दर्ता गरिएका विवरणअनुसार डेन्जाले नयाँ मोडललाई पाँच सिट र छ सिट गरी दुई संस्करणमा ल्याउनेछ । दुवै मोडलको ह्विलबेस ३,०७५ मिमि समान भए पनि पाँच सिटे डेन्जा एन८ को लम्बाइ ५,१५० मिमि र छ सिटे डेन्जा एन८एलको लम्बाइ ५,२०० मिमि रहनेछ । चौडाइ १,९९९ मिमि र उचाइ १,८२० मिमि दुवै संस्करणमा समान छ ।

नयाँ डेन्जा एन८ को सबैभन्दा ठूलो आकर्षण यसको उच्च क्षमताको तीन मोटरयुक्त पावरट्रेन हो । टप भेरियन्टमा अगाडिको एक्सलमा २७० किलोवाट क्षमताको एक मोटर र पछाडिको एक्सलमा ३१०–३१० किलोवाट क्षमताका दुई मोटर जडान गरिएको छ । यसले संयुक्त रूपमा ८९० किलोवाट अर्थात् करिब १,१९३ हर्सपावर उत्पादन गर्ने कम्पनीको दाबी छ । यो शक्ति अहिले बजारमा उपलब्ध धेरै प्रिमियम विद्युतीय एसयूभीभन्दा उल्लेखनीय रूपमा बढी हो ।

तीन मोटर संस्करणसँगै कम्पनीले ३२० किलोवाट र ३७० किलोवाट क्षमताका एकल मोटर संस्करण पनि उपलब्ध गराउनेछ, जसले ग्राहकलाई आवश्यकता अनुसार विकल्प छनोट गर्ने सुविधा दिनेछ ।

ऊर्जा भण्डारणका लागि सबै संस्करणमा फिनड्रिम्सद्वारा विकसित दोस्रो पुस्ताको ब्लेड ब्याट्री प्रयोग गरिएको छ । कम्पनीका अनुसार यसमा नयाँ पुस्ताको फ्ल्यास चार्जिङ प्रविधि समावेश गरिएको छ, जसले चार्जिङ समय उल्लेखनीय रूपमा घटाउनुका साथै अत्यधिक चिसो, माइनस ३० डिग्री सेल्सियससम्मको तापक्रममा पनि ब्याट्रीको कार्यक्षमता र रेन्जलाई प्रभावकारी रूपमा कायम राख्न सहयोग गर्नेछ ।

सुरक्षासँगै स्मार्ट ड्राइभिङ अनुभवलाई प्राथमिकता दिँदै डेन्जाले यसमा ‘गड आई ५.०’ स्मार्ट ड्राइभिङ प्रणाली समावेश गरेको छ । वास्तविक सडकबाट सङ्कलित डाटामा आधारित ठूलो आर्टिफिसियल इन्टेलिजेन्स मोडल प्रयोग गर्ने यो प्रणालीले राजमार्गदेखि सहरी सडकसम्म स्वचालित मार्ग छनोट तथा सहायक ड्राइभिङ क्षमता प्रदान गर्ने कम्पनीको भनाइ छ ।

यसका लागि गाडीको छानामा लिडार सेन्सर तथा अगाडिको बम्परमा मिलिमिटर–वेभ राडार जडान गरिएको छ, जसले वरपरको वातावरणलाई निरन्तर स्क्यान गर्दै सुरक्षित सञ्चालनमा सहयोग पुर्‍याउँछ ।

ग्राहकले २० वा २१ इन्चका विभिन्न डिजाइनका ह्विल, बडी–कलर रूफ, फरक रंगका ब्रेक क्यालिपर तथा इलेक्ट्रोनिक साइड स्टेपजस्ता विकल्प पनि रोज्न सक्नेछन् । पछाडिको भागमा दुईवटा समानान्तर एलईडी लाइट बार प्रयोग गरिएको छ, जसले डेन्जाको पछिल्लो डिजाइन भाषालाई निरन्तरता दिएको छ ।

हाल बजारमा उपलब्ध डेन्जा एन८ को प्लग–इन हाइब्रिड संस्करणको मूल्य २,९९,८०० युआनदेखि ३४९,८०० युआनसम्म रहेको छ । पूर्ण विद्युतीय संस्करण सार्वजनिक भएपछि कम्पनीले अझ फराकिलो ग्राहक समूहलाई आकर्षित गर्ने लक्ष्य लिएको छ ।

बिक्रीको हिसाबले पनि डेन्जाले चीनमा उल्लेखनीय वृद्धि गरिरहेको छ । सन् २०२६ को जुन महिनामा मात्रै कम्पनीले १८,६३१ वटा सवारी बिक्री गरेको थियो, जुन अघिल्लो महिनाको तुलनामा १९.३ प्रतिशत र अघिल्लो वर्षको सोही अवधिको तुलनामा ३१.१ प्रतिशतले बढी हो । कम्पनीले यही सकारात्मक वृद्धिलाई निरन्तरता दिन नयाँ पूर्ण विद्युतीय डेन्जा एन८ र एन८एललाई यसै वर्ष व्यावसायिक रूपमा बजारमा ल्याउने तयारी गरिरहेको छ ।