छ सिट, लिडार र १४०४ किमि रेन्ज : हाभल एच१०मा के विशेष छ ?

काठमाडौं । ठूलो परिवारका लागि ठाउँ, प्रविधि र दमदार प्रदर्शनलाई एउटै गाडीमा खोज्ने ग्राहकको संख्या बढिरहेका बेला नयाँ बक्सी एसयूभीले चिनियाँ बजारमा चासो बढाएको छ । सार्वजनिक हुनुअघि नै यसले पाएको बुकिङले यो गाडी केवल आकर्षक बाहिरी बनोटमा सीमित नरहेको संकेत दिएको छ ।

ग्रेट वाल मोटर्सअन्तर्गतको हाभल ब्रान्डले आफ्नो नयाँ एच१० प्लग–इन हाइब्रिड एसयूभी अगस्ट ५ मा औपचारिक रूपमा बजारमा ल्याउने भएको छ । जुलाई १८ देखि सुरु भएको अग्रिम बुकिङमा यसले पहिलो १२ घण्टामै २२ हजार ६१५ बुकिङ पाएको कम्पनीको दाबी छ ।

एच१०को प्रवर्द्धनात्मक सुरुआती मूल्य २ लाख १४ हजार ८ सय चिनियाँ युआन तोकिएको छ । पाँच सिटको हाइ४ १.५ टी म्याक्स र छ सिटको प्रो संस्करण समान मूल्यमा उपलब्ध हुनेछन् । छ सिटको म्याक्स र अल्ट्रा संस्करणको मूल्य क्रमशः २ लाख २४ हजार ८ सय र २ लाख ३४ हजार ८ सय युआन छ ।

यो हाभलको ग्लोबल वन प्लेटफर्ममा बनेको पहिलो बक्सी मोडेल हो । अफरोड देखिने धेरै एसयूभीजस्तो छुट्टै फ्रेममा नभई यसमा एकीकृत बडी संरचना प्रयोग गरिएको छ । यसले अत्यन्त कठिन अफरोडभन्दा सहरको सडकमा आरामदायी यात्रा र ठूलो परिवारको दैनिक प्रयोगलाई प्राथमिकता दिएको देखिन्छ ।

पाँच सिटको एच१०को लम्बाइ ५ हजार १३८ मिलिमिटर छ भने छ सिटको संस्करण ५ हजार २९९ मिलिमिटर लामो छ । दुवैको ह्विलबेस ३ हजार मिलिमिटर भएकाले दोस्रो र तेस्रो पंक्तिका यात्रुका लागि पर्याप्त ठाउँ हुने अपेक्षा गरिएको छ ।

यसमा १.५ लिटर टर्बो पेट्रोल इन्जिनसँग अगाडि र पछाडि विद्युतीय मोटर जोडिएको दोस्रो पुस्ताको हाइ४ हाइब्रिड प्रणाली छ । संयुक्त रूपमा ५९० हर्सपावर र ७२२ न्युटन मिटर टर्क उत्पादन गर्ने दाबी गरिएको यो एसयूभीले शून्यदेखि १०० किमि प्रतिघण्टा गति ४.९ सेकेन्डमा लिन सक्छ ।

४२.८ किलोवाट आवरको लिथियम आइरन फस्फेट ब्याट्रीबाट यसले संस्करणअनुसार २२७ देखि २३२ किमिसम्म शुद्ध विद्युतीय रेन्ज दिने कम्पनीको दाबी छ । पेट्रोल र ब्याट्री दुवैको प्रयोगमा कुल रेन्ज १ हजार ४०४ किमिसम्म पुग्ने बताइएको छ ।

सबै संस्करणमा लिडार र २७ सेन्सरमा आधारित कफी पाइलट ३ चालक सहायता प्रणाली दिइएको छ । यसले राजमार्ग र सहरका सडकमा नेभिगेसन सहायतासहित चल्ने सुविधा, साथै तीन किमिसम्मको मार्ग सम्झेर पार्किङ गर्ने क्षमता पनि दिनेछ ।

नेपालमा एच१० ल्याउनेबारे हालसम्म कुनै औपचारिक जानकारी आएको छैन । तर ठूलो सिट क्षमता, प्लग–इन हाइब्रिड प्रविधि र सहरमै सहज चल्ने बक्सी एसयूभीको अवधारणाले नेपाली बजारका पारिवारिक एसयूभी ग्राहकको चासो तान्न सक्ने देखिन्छ ।