विश्व बजार आउनुअघि भित्ते चित्रबाटै स्मार्ट नम्बर २ को चर्चा
काठमाडौं । सहरका साँघुरा सडक, भीडभाडयुक्त बजार र पार्किङको सीमित ठाउँले साना गाडीप्रतिको आकर्षण फेरि बढाइरहेका बेला एउटा नयाँ विद्युतीय गाडीले विश्वका प्रमुख सहरका भित्तामै आफ्नो उपस्थिति देखाउन थालेको छ ।
स्मार्टले आफ्नो नयाँ दुई सिटे विद्युतीय गाडी ‘स्मार्ट नम्बर २’ को औपचारिक विश्वव्यापी सार्वजनिकरणअघि भित्ते चित्रमार्फत प्रचार अभियान थालेको हो । कम्पनीले अक्टोबर २०२६ मा हुने पेरिस मोटर शोमा यस गाडीको थप विवरण सार्वजनिक गर्ने तयारी गरेको छ ।
सांघाई, हङकङ, ब्युनस आयर्स र
मेलबर्नका भवनका भित्तामा स्मार्ट नम्बर २ का चित्र देखिएका छन् । कम्पनीले यसलाई
केवल विज्ञापनको माध्यम मात्र नभई सहरको सडक संस्कृति र सानो विद्युतीय गाडीको
सम्बन्ध देखाउने प्रयासका रूपमा प्रस्तुत गरेको छ ।
मेलबर्नमा बनाइएको भित्ते चित्रबाट गाडीको उत्पादन संस्करणबारे केही संकेत पनि देखिन्छ । कालो रूफ र पिलर, सामान्य डोर ह्यान्डल, साना आकर्षक हेडलाइट, अगाडिको बम्परमा हावा जाने दुई भाग र आठ स्पोकका ह्विल यसमा देखिएका छन् ।
मर्सिडिज बेन्जको ग्लोबल डिजाइन
टोलीले यसको बाहिरी बनोट तयार गरेको हो भने चेसिस र मुख्य प्रविधि जिलीबाट आउनेछ ।
गाडी रियर ह्विल ड्राइभ प्रणालीमा आधारित हुने बताइएको छ ।
स्मार्ट नम्बर २ मा ३५ दशमलव ७ किलोवाट आवर क्षमताको ब्याट्री रहने अनुमान छ । यसले डब्लुएलटीपी मापदण्डमा करिब ३०० किलोमिटर रेन्ज दिने लक्ष्य राखिएको छ । डीसी फास्ट चार्जरबाट १० देखि ८० प्रतिशतसम्म चार्ज हुन करिब २० मिनेट लाग्ने दाबी छ ।
यसको टर्निङ सर्कल ६ दशमलव ९५ मिटर
मात्र हुने जनाइएको छ, जसले साँघुरा सडक र पार्किङ क्षेत्रमा गाडी मोड्न सहज
बनाउने अपेक्षा गरिएको छ ।
नेपालजस्ता तीव्र रूपमा शहरीकरण
भइरहेको बजारमा पनि यस्ता साना विद्युतीय गाडीको सम्भावना देखिन्छ । काठमाडौं
उपत्यकाका व्यस्त सडक, सीमित पार्किङ र दैनिक छोटो दूरीको यात्राका लागि सानो
आकार, कम ऊर्जा खपत र सहज मोड्न सकिने विशेषता उपयोगी हुन सक्छ । यद्यपि स्मार्ट
नम्बर २ नेपाल आउने वा नआउनेबारे कुनै आधिकारिक जानकारी सार्वजनिक भएको छैन ।
स्मार्टले यसअघि फोर्टु मोडलमार्फत साना दुई सिटे गाडीको छुट्टै पहिचान बनाएको थियो । अब नम्बर २ त्यसैको आधुनिक विद्युतीय उत्तराधिकारी बन्ने अपेक्षा गरिएको छ ।
