मूल्य कटौतीपछि इन्धन अभाव कि कृत्रिम संकट? सरकारी टोलीको अनुगमनले खुलायो तथ्य

मंगलबार रातिदेखि लागू भएको इन्धनको नयाँ मूल्यसूचीपछि काठमाडौं उपत्यकाका केही निजी पेट्रोल पम्प सञ्चालनमा नदेखिएपछि उपभोक्तामाझ विभिन्न आशंका उत्पन्न भएको थियो । मूल्य घटेपछि कृत्रिम अभाव सिर्जना गरिएको हुन सक्ने गुनासो आएसँगै वाणिज्य, आपूर्ति तथा उपभोक्ता हित संरक्षण विभाग र नेपाल आयल निगमको संयुक्त टोलीले बुधबार आकस्मिक निरीक्षण गरेको हो ।

अनुगमनका क्रममा पाँच वटा पेट्रोल पम्पको अवस्था अध्ययन गरिएको थियो । तीमध्ये चार वटा पम्पमा कारोबार रोकिएको भेटिए पनि कारण इन्धन लुकाइएको नभई मौज्दात सकिएको पुष्टि भएको विभागले जनाएको छ । एउटा पम्प भने नियमित रूपमा सञ्चालनमा रहेको र इन्धन बिक्री भइरहेको पाइएको थियो ।

निरीक्षणमा बन्द रहेका पम्पहरूमा पेट्रोल वा डिजेलको भण्डारण नै नरहेको देखिएकाले कृत्रिम रूपमा बिक्री रोकेको प्रमाण फेला परेन । त्यसैले ती व्यवसायीमाथि कुनै कारबाही अघि नबढाइएको उनले जानकारी दिए ।

नेपाल आयल निगमले मंगलबार रातिबाट पेट्रोलको मूल्य प्रतिलिटर २० रुपैयाँ, डिजेल तथा मट्टितेलको मूल्य प्रतिलिटर ३० रुपैयाँ र खाना पकाउने एलपी ग्यासको मूल्य प्रति सिलिन्डर १०० रुपैयाँले घटाएको थियो । त्यसपछि बुधबार बिहानदेखि राजधानीका केही निजी पम्प बन्द देखिएपछि उपभोक्ताहरू वैकल्पिक रूपमा भद्रकालीस्थित नेपाली सेनाको पेट्रोल पम्पमा पुग्न बाध्य भएका थिए, जहाँ लामो लाइन लागेको दृश्य देखिएको थियो ।

निगमका अनुसार मूल्य समायोजनअघि सबै मागअनुसार इन्धन आपूर्ति हुन नसक्दा केही पम्पको मौज्दात सकिएको थियो । यही कारणले उनीहरूले अस्थायी रूपमा सेवा रोक्नुपरेको अवस्था सिर्जना भएको जनाइएको छ ।

यता, नेपाल पेट्रोलियम डिलर्स व्यवसायी महासंघले पनि काठमाडौं उपत्यकासहित केही अन्य स्थानमा देखिएको सेवा अवरोधको मुख्य कारण इन्धनको अभाव नै भएको स्पष्ट पारेको छ । महासंघका अनुसार आवश्यक आपूर्ति हुन थालेपछि बुधबार साँझसम्म अधिकांश पम्प पुनः सञ्चालनमा आइसकेका छन् ।