नौ मिनेटमै ४५० किमि रेन्ज थप्ने एक्सपेङ जी९एल सार्वजनिक, कति शक्तिशाली छ नयाँ एसयूभी ?

काठमाडौं । ठूला विद्युतीय एसयूभीमा अब केवल धेरै सिट वा ठूलो ब्याट्री राख्ने प्रतिस्पर्धा मात्र छैन । चार्जिङमा बित्ने समय घटाउँदै, शक्तिशाली पावरट्रेन र प्रिमियम केबिन एकैसाथ दिने होड पनि तीव्र बन्दै गएको छ ।

यही प्रतिस्पर्धामा चिनियाँ ब्रान्ड एक्सपेङले नयाँ पाँच सिटे एसयूभी ‘जी९एल’ सार्वजनिक गरेको छ । ग्लोबल मोडलका रूपमा ल्याइएको यो गाडी छिट्टै चीनमा बिक्रीमा जाने तयारीमा छ ।

कम्पनीले जी९एलको सबैभन्दा आकर्षक पक्षका रूपमा यसको ८ सय भोल्ट प्लेटफर्मलाई अघि सारेको छ । एक्सपेङको दाबीअनुसार, उपयुक्त फास्ट चार्जरमा यसले नौ मिनेटमै ४५० किलोमिटरसम्म यात्रा पुग्ने रेन्ज थप्न सक्छ ।

पाँच सिटमै किन केन्द्रित ?

जी९एललाई छ सिटे मोडलसँग जुध्न नपरोस् भनेर एक्सपेङले यसलाई पाँच सिटमै सीमित गरेको जनाएको छ । यसको लम्बाइ ५ हजार १२० मिलिमिटर, चौडाइ १ हजार ९९९ मिलिमिटर र ह्विलबेस ३ हजार १०० मिलिमिटर छ ।

यो आकार बीएमडब्ल्यू एक्स५ भन्दा करिब १९८ मिलिमिटर लामो हो । त्यसैले, पाँच जनाको परिवार वा प्रिमियम व्यक्तिगत यात्रा खोज्ने ग्राहकका लागि पर्याप्त फराकिलो केबिन र ठूलो लगेज स्पेस यसका मुख्य आकर्षण हुन सक्छन् । कम्पनीले बुट स्पेस १ हजार १५२ लिटर रहेको जनाएको छ ।

५७७ हर्सपावरको अल–ह्विल ड्राइभ

जी९एलमा अगाडि १६० किलोवाट र पछाडि २७० किलोवाटको विद्युतीय मोटर राखिएको छ । दुवै मोटरको संयुक्त पावर ४३० किलोवाट अर्थात् ५७७ हर्सपावर पुग्छ ।

अल–ह्विल ड्राइभ पावरट्रेनसहितको यो एसयूभीको उच्च गति प्रतिघण्टा २०० किलोमिटर रहेको कम्पनीले जनाएको छ । बाहिरी डिजाइनमा बन्द फ्रन्ट, फ्लस डोर ह्यान्डल, इलेक्ट्रिक सफ्ट–क्लोजिङ डोर, चौडा रियर फेन्डर र २२ इन्चका ह्विल दिइएका छन् ।

केबिनमा अगाडिका सिटमा पावर एडजस्टमेन्ट, लम्बर तथा साइड सपोर्ट र यात्रु सिटमा जिरो ग्राभिटी मोड उपलब्ध छ । बिल्ट–इन फ्रिज र एआर–हेडअप डिस्प्लेले यसलाई प्रिमियम यात्रातर्फ केन्द्रित मोडल बनाउने प्रयास देखिन्छ ।

एआईमा पनि जोड

ड्राइभिङ सहायताका लागि जी९एलमा कम्पनीको दोस्रो पुस्ताको भिजन–ल्याङ्ग्वेज–एक्सन प्रणाली राखिएको छ । चारवटा एआई ट्युरिङ चिपले २ हजार २५० टप्स कम्प्युटिङ पावर दिने एक्सपेङको भनाइ छ ।

यसमा नेभिगेट अन अटोपाइलट र सेल्फ पार्किङजस्ता सुविधा समावेश छन् । यद्यपि, यस्ता एडास सुविधा कुन–कुन बजारमा कस्तो रूपमा उपलब्ध हुन्छन् भन्ने कुरा स्थानीय नियममा निर्भर रहनेछ ।

चीनमा यसको मूल्य करिब ३ लाख युआनबाट सुरु हुने अनुमान छ । नेपालमा आउनेबारे कुनै आधिकारिक जानकारी छैन । तर, ठूलो ब्याट्री, द्रुत चार्जिङ र प्रिमियम पाँच सिटे लेआउटतर्फ बढ्दो रुचिका बीच जी९एलजस्ता मोडलले नेपाली बजारमा पनि भविष्यको ईभी प्रतिस्पर्धा कता जाँदैछ भन्ने संकेत भने दिएको छ ।